Margrét Sigurðardóttir dýralæknir og Vésteinn Vésteinsson rafeinda- og mjólkurróbótavirki Varmahlíð buðu lesendum Feykis upp á dýrindis uppskriftir í janúar 2009. Þau skoruðu á Sigfríði Halldórsdóttur og Kára Gunnarsson í Varmahlíð að koma með næstu uppskriftir.

Forréttur eða létt máltíð

Kjúklingasalat

• Rifinn kjúklingur-kaldur
• gúrka
• tómatar
• jarðaber
• vínber
• blaðlaukur
• paprika
• klettasalat
• ristaðar hnetur
• Góður kostur Salat
• Dressing
• 3msk olivuolía-extra virgin
• 1-2 rifnir hvítlauksgeirar
• Balsamik edik-lítið
• síróp –Steeves Maples
• feta ostur
• 1 tsk Dion sinnep
• salt, pipar

Hlutföllin  í salatið fer eftir smekk hvers og eins. Efni  í dressingu blandað í skál og hellt yfir rétt áður en salatið er borið fram.

Aðalréttur
Sjávarréttarpanna með banönum og mangó. (Fyrir 4)

• 200 gr hörpudiskur
• smjör til steikingar
• salt og pipar
• 1 sellerístöngull
• 1 stór gulrót
• 1 laukur
• matarolía
• 1 tsk karrý
• 2 tsk Mangó-mauk
• 3 dl kjúklingasoð
• 2 vel þroskaðir bananar
• 1 tsk fersk, rifin engiferrót eða engiferkrydd
• 2 dl rjómi
• 250 gr rækjur

Snöggsteikið hörpudiskinn í smjöri og kryddið með salti og pipar. Takið af pönnunni. Skerið sellerí og gulrót í bita og saxið laukinn. Hitið matarolíuna á pönnu og stráið karríi út á og léttsteikið grænmetið í olíunni. Bætið mangó-maukinu, kjúklingasoðinu, sneiddum banönum og engiferi út í og látið krauma í 15-20 mínútum. Bætið rjómanum saman við og bragðbætið með salti og pipar. Setjið steikta hörpudiskinn og rækjurnar út í rétt áður en rétturinn er borinn fram, hitið en sjóðið ekki. Berið fram með hrísgrjónum,  mangó-mauki og sellerí. Hægt  er að setja epli í stað sellerís, bragðast mjög vel. Og svo er hægt að bæta í uppskrifina öðru fiskmeti ef fólk vill.

Eftirréttur
Áströlsk bomba með heitri sósu

• 250 gr döðlur
• 1 ½ tsk natron
• 180 gr mjúkt smjör
• 7 ½ msk sykur
• 3 egg
• 4 ½ dl hveiti
• 1 tsk vanilludropar
• 2 tsk lyftiduft

Döðlurnar settar í pott og vatni bætt út í,  látið rétt fljóta yfir. Látið suðuna koma upp, slökkvið undir og látið standa í 3 mínútur. Stráið natroni yfir, látið kólna. Smjör og sykur hrært saman og eggjunum síðan bætt út í einu og einu í senn. Síðan er þurrefnunum blandað saman við ásamt vanilludropum. Og að lokum er döðlunum bætt saman við deigið  ásamt hluta af soðinu(það á að vera frekar þunnt).  Sett í hringlaga form og bakað við 180° í 40-60 mínútur.

Karamellusósa

• 120 gr smjör
• 115 gr púðursykur
• ½ tsk vanillusykur
• 2 ½ dl rjómi

Soðið í 3 mínútur. Kakan er borin fram með þeyttum rjóma og heitri karamellusósunni .

Verði ykkur að góðu!