Nýlega voru birtar niðurstöður úr könnun þar sem tékkað var á því hvað færi helst í taugarnar á ökumönnum. Um helmingi fleiri voru pirraðir út í þá sem keyra að þeirra mati of hægt heldur en þá sem keyra of hratt. En það var þó almennt tillitsleysi í umferðinni sem fór mest í taugarnar á þeim sem svöruðu könnun Umferðarstofu – eða hjá 72% þeirra sem þátt tóku. Meira…

Það getur oft verið athyglisvert að skoða hvaða fréttir eru þær mest lesnu á fréttasíðum landans. Föstudagsmorguninn 22. október er vinsælasta fréttin á mbl.is “Of kynþokkafull til að kenna börnum” og önnur mest lesna fréttin er “Berar að ofan í vinnunni”. Á dv.is er hinsvegar fréttin “Gilzenegger hjólar í eldri borgara” mest lesin. En hvað með feykir.is? Ja, hér er fréttin “Dansað í rúman sólarhring” mest lesin. – Allt eru þetta auðvitað hinar merkilegustu fréttir sem skipta sköpum í lífi fólks…

Það getur oft verið kostulegt að fylgjast með hvernig ökumönnum tekst til við að fylgja Hægri reglunni í umferðinni. Fjölmargir virðast hreinlega ekki vita hvað sú regla stendur fyrir; nefnilega: Á vegamótum þar sem hvorki er stöðvunarskylda né biðskylda gildir hægri reglan, þ.e. sá bíll sem kemur frá hægri hefur forgang. Meira…

Moggavefurinn Mbl.is rammvilltist um helgina þegar sagt var frá týndum gangnamanni sem björgunarsveitir á Norðurlandi vestra leituðu að með góðri hjálp frá þyrlusveit Landhelgisgæslunnar. Að sögn Mbl.is var leitað á skaganum milli Skagafjarðar og Eyjafjarðar – semsagt á Tröllaskaga – en maðurinn kom fram á Ketu á Skaga, sem er vel að merkja á Skaga milli Húnaflóa og Skagafjarðar en ekki á Akranesi…

Hvað er að gerast með pulsurnar? Gömlu góðu sjoppupulsurnar við þjóðveginn, með ýmist öllu eða sumu, eru ekki lengur eins og þær voru. Reykingabragðið er orðið yfirþyrmandi og minnir pulsubitinn alltof mikið á hangikjöt. Sem er ekki nógu gott því hver borðar tómat, steiktan og remúlaði með hangikjöti?

Toppgírsmenn frá breska sjónvarpinu léku listir á eða við nýlagt hraun á Fimmvörðuhálsi á dögunum. Það þótti ekki til eftirbreytni hjá þeim sem vit hafa á hrauni. Nú gæti því verið komin upp sú staða að þeir sem hætta sér of nálægt hrauninu, að mati lögreglu, endi á Hrauninu.

Í Morgunútvarpi Ríkisútvarpsins voru Þorsteinn Pálsson og Kolbrún Halldórsdóttir í ágætu spjalli nú í morgun. Eitt atriði sló mann þó í viðtalinu. Kolbrún sagði að haustið 2008 hefðu möguleikar á myndun þjóðstjórnar verið eyðilagðir því þá hefði Davíð Oddsson komið fram og þóst hafa átt þessa hugmynd. -Sem er auðvitað svo hræðileg tilhugsun að tekur ekki nokkru tali.

Helga Vala var í morgunútvarpi Rásar 2 í morgun en þar var verið að ræða um Icesave. Helga var ekki sérlega ánægð með þjóðaratkvæðagreiðsluna og fannst vitlaust að vera að kjósa þegar þó nokkur fjöldi kjósenda héldi enn að með því að segja nei þá þyrftu Íslendingar ekki að borga krónu vegna Icesave. -Ef þetta er rétt hjá Helgu Völu er það þá ekki áfellisdómur yfir ríkisstjórninni? Það lítur í það minnsta þannig út að stjórnin, sem gladdist lítið yfir því þegar forsetinn neitaði að skrifa undir lög um Icesave nú um áramótin, hefur ekki haft mikinn áhuga á að kynna fyrir þjóðinni um hvað er kosið?

Geyspinn hefur upp á síðkastið skoðað fréttir á DV.is og Eyjunni.is en þar gefst fólki kostur á að skrifa athugasemdir við fréttirnar. Mikið er sorglegt að sjá hvað fólk getur verið andstyggilegt í skrifum sínum hvort um annað og í garð þeirra sem fréttirnar fjalla um.

“Nú tíðkast þær smjörklípurnar,” sagði Atli Ásmundsson nánast, en þó ekki, þegar Þorbjörn öxnamegin rak hann í gegn með fjaðraspjótinu í Grettis sögu.

Íslenska handboltalandsliðið hefur enn á ný rifið upp þjóðarrembinginn í Íslendingum með ágætri frammistöðu á EM á Íslandi. Þannig háttar þó til að allir leikir liðsins í milliriðli hefjast kl. 15 og eru því sýndir á vinnutíma. Það eru kannski einhverjir nógu útspekuleraðir til að fylgjast með leikjum liðsins í vinnutíma sínum á netinu eða hlusta á útvarpssendingar – en ekki allir. Það er því frekar lélegt að Sjónvarpið bjóði upp á endursýningar á leikjum íslenska landsliðsins um miðjar nætur í stað þess að endursýna leikina til dæmis áður en Kastljós er endursýnt því flestir þeir sem vinna venjulegan vinnutíma eiga alla möguleika á því að horfa á Kastljós á réttum tíma. Það held ég nú!

Geyspi desember-mánuðar telst vera Loftslagsráðstefnan sem haldin var í Kaupmannahöfn um miðjan mánuðinn. Ráðstefnan sem slík var auðvitað góðra gjalda verð en fljótlega varð ljóst að ekki voru allir á eitt sáttir. Fór svo að stóra málið varð hvort forseti Bandaríkjanna gæti lent á Kastrup vegna snjókomu og kæmist burt heill á húfi. Niðurstaða ráðstefnunnar varð því miður sú að ríki heimsins hafa ekki efni á því að bjarga jörðinni.

Einhver mistök virðast hafa orðið hjá þeim sem segja fréttir úr enska boltanum en nú um helgina var greint frá því að Tottenham Hotspur hafi sigrað Wigan Athletics með 9 mörkum gegn 1. Þetta getur ómögulega staðist. Ég meina, við erum að tala um að Tottenham hafi skorað 9 mörk í sama leiknum. Klárlega mistök hjá þeim á fréttastofunni… nema þetta hafi verið mistök í vörn Wigan?

Það styttist í jólin. Sumir geta vart beðið eftir að fá leyfi starfsfélaganna til að spila jólalögin og sumir starfsfélagarnir vilja helst ekki vita af jólalögunum fyrr en á Þorláksmessu. Til að jólalögin verði ekki leiðinlega hversdags þá er kveðið á um það í óskráðu lögunum að leyfilegt er að hefja spilun jólalaga strax í byrjun desember. Það er því hálf undarlegt að jafn hversdagslegur hlutur og mjólkurfernan skuli vera komin í jólabúninginn strax í byrjun nóvember sem þýðir þá að mjólkin er í jólafötunum í um tvo og hálfan mánuð á ári. Kommon!?

Það eru óskráð lög í landinu sem segja að það er bannað öllu skynsamlegu fólki að kaupa sér innbundnar nýjar skáldsögur til einkabrúks. Innbundnar skáldsögur eru eingöngu ætlaðar til gjafa og þá alls ekki til að gefa sjálfum sér. Það er óheilbrigt. Öðru máli gegnir um kiljur, en þær koma vanalega út nokkrum mánuðum eftir að innbundna bókin hefur fengið að láta ljós sitt skína í bókabúðum og stórmörkuðum.
Geyspinn verður nú að gangast við lögbroti. Honum datt á dögunum í hug að gefa sjálfum sér nýjustu bók Jóns Kalmans Stefánssonar, Harm englanna, sem er framhaldið af Himnaríki og helvíti. Eftir að hafa velt þessu lögbroti fyrir sér í nokkrar mínútur sá hann glufu á þessum óskráðu lögum sem ætluð eru skynsömu fólki. Þannig að óskynsemin tók völdin. Um leið og heim var komið var plastið rifið utan af bókinni, lagst í sófa og lesið eins og lífið lægi við.
-En bókin? Jú, hún var auðvitað tóm snilld. Segir hér mestmegnis af Stráknum og Póstinum og svaðilförum þeirra á Vetrarströndinni, en ekki síst lífinu og dauðanum. -Yfir einu verður þó að kvarta á þessum tímum ljóshraðans.  Bókin skilur lesendur eftir með bauki og bramli í lausu lofti. To be continued nefnilega. Framhaldið og lokaþátturinn í sögunni væntanlegur eftir tvö ár takk fyrir.

Stundum dettur þjóðin í frasafyllerí. Það er varla að fólk geti talað saman öðruvísi en það löðrungi hvort annað með þreyttum frasa sem oftar en ekki er hirtur upp úr sjónvarpinu. Sumir endast árum saman og eru alltaf jafn flottir eða skemmtilega þreyttir. Eins og til dæmis – já sæll – sem er enn í stanslausri notkun og – alltaf í boltanum Hemmi minn!? Aðrir frasar geta verið hundleiðinlegir frá upphafi en ná einhverra hluta vegna flugi. Dæmi um svona frasa er einn ættaður frá Geir Haarde og eru allir löngu komnir með uppí kok af honum en hann heldur áfram að dynja á þjóðinni eins og dapurleg minning um gamlan rassskell. Plís – spariði Guð blessi Ísland!

Það er nú kannski ekki hugmyndin að vera með vikulega gagnrýni á Spaugstofuna í þessum dálki. Í síðustu viku þótti Geyspanum lítil ástæða til að fagna fyrsta þætti þeirra grínara en það er ekki sanngjarnt að vera síknt og heilagt að berja allt niður – það er um að gera að hæla þegar vel er gert. Annar þáttur þeirra Spaugstofumanna var nefnilega fullur af fínu gríni sem hægt var að hlæja að – jafnvel upphátt.

Margir biðu með öndina í hálsinum eftir fyrsta þætti Spaugstofunnar síðastliðinn laugardag. Enda ekki annað að sjá en að Íslendingar hafi upplifað nægan skammt af  harm- og spaugrænum uppákomum í sumar og haust til að fylla einn 25 mínútna Spaugstofuþátt af þéttu spaugi. Margir urðu fyrir sárum vonbrigðum og heyrst hefur að sumir hafi setið svipbrigðalausir undir þættinum. Það virðist sem spaughöfundarnir séu svo fastir í gremjufeni kreppunnar að grínið hefur breyst í alvöru sem flestir hafa þegar fengið nóg af. Er ekki kominn tími á að Spaugstofan fari aftur að koma þjóðinni til að hlægja í stað þess að gera hana reiða?

Stuðningsmenn Tindastóls hafa að líkindum yfirgefið Sauðárkróksvöll talsvert frústreraðir á laugardaginn eftir að hafa horft upp á liðið sitt kasta frá sér sigri – og þar með sæti sínu í 2. deild – með undarlega slökum leik. Þegar leikmenn hófu leik í síðari hálfleik með vænlegt 2-0 forskot virtist flestum ljóst hvað Stólarnir þyrftu að gera í síðari hálfleik. Seinni hálfleikurinn var hins vegar skelfilegur að flestu leiti og leikurinn tapaðist 2-4. Nú hinsvegar er ekkert annað að gera en snúa bökum saman og rífa liðið upp úr 3. deildinni að ári.

Hinn ágæti Hrafn Gunnlaugsson sat í Kilju Egils Helgasonar á dögunum og hélt því blákalt fram með stríðnisglampa í augum að Húnvetningurinn Grettir Ásmundsson, síðast með póstadressu í Drangey á Skagafirði, hafi augljóslega verið hommi. Hrafn hefur margsinnis lesið Grettissögu og hefur með tímanum styrkst í þessari skoðun sinni. Hvort fræði- og áhugamenn hér á Norðurlandi vestra (eða annars staðar á byggðu bóli) eru sammála Hrafni er alls óvíst því ekki hefur heyrst hósti né stuna frá þeim þrátt fyrir þetta ágæta tilefni til að láta ljós sín skína. Nema þögnin sé sama og samþykki!?