Herra Hundfúll – eða Herra Handfúll – var alveg harðákveðinn í því fyrir HM í handbolta að sleppa því alveg að fylgjast með þessu handboltalandsliði Íslands sem árlega leggur taugakerfi landans í rúst. Gekk jafnvel svo langt að Hundfúll var að hugsa um að segja upp Stöð2 Sport en það hefði auðvitað þýtt að einhvern fótbolta hefði vantað í sjónvarpið svo sú hugmynd var ekki að fúnkera. Meira…

Að venju söfnuðust stjórnmálaforingjar saman í Kryddsíld á Stöð 2 á gamlársdag þar sem kveðja átti gamla árið og ræða málin sem brenna á fólki. Það kom sennilega engum á óvart að samræðurnar voru út og suður og lítið annað endurteknar og óspennandi orðskylmingar sem gerðu lítið annað en ergja þá sem nenntu að horfa á þáttinn. Herra Hundfúll var í það minnsta ekki spenntur og spyr hvort ekki sé rétt að fara með þennan þátt í aðra átt? Reyna að taka upp léttara hjal þannig að fólk fái að sjá aðra hlið á þessum “foringjum” – en kannski er þessu fólki bara fyrirmunað að koma saman öðruvísi en að þeirra kappsmál sé að moka sem mestum skít á viðmælendur sína?

Herra Hundfúll skemmtir sér ágætlega við að hlusta á skýringar á lélegri þátttöku í kosningum til Stjórnlagaþings. Bendir nú hver á annan í leit að sökudólgum.

-Ríkisútvarpið stóð sig ekki nógu vel við að kynna alla rúmlega 500 frambjóðendurna, Gunnar í Krossinum stal senunni, stjórnmálafræðingurinn Gunnar Helgi í Háskólanum hræddi fólk frá þátttöku þegar hann sagði kosningarnar vera flóknar og þá var ritstjóri Moggans með alkunn leiðindi og ósanngirni. Einhverjir voru svo fífldjarfir að segja frambjóðendur hafa klikkað á að kynna sig. Já og Háskóli Íslands hélt ekki málþing um stjórnarskrána. Öss!

-En hafði fólk kannski lítinn áhuga á kosningunum? Hefur fólk almennt þekkingu á stjórnarskránni? Eða raunverulegan áhuga? Getur fólk á skömmum tíma gert upp á milli rúmlega 500 frambjóðenda og stefnu þeirra varðandi stjórnarskrá Íslands? Fannst fólki kosningarnar kannski vera tóm vitleysa, peningaeyðsla og húmbúkk á tímum niðurskurðar og sparnaðar?

-Ekki bætti úr skák að frambjóðendum var uppálagt að nota helst ekki meira en 2 milljónir til að kynna sig. Það var sagt gert til að  jafnræðis væri gætt (sem er undarlegt þegar sumir höfðu þjóðþekktari andlit og skoðanir en aðrir og hafa kannski notið þess). En kannski voru bara frambjóðendurnir svo óspennandi að meirihluti þjóðarinnar – þjóðar sem er alla jafna dugleg að mæta á kjörstað – stóð annað hvort á sama um kosningarnar eða hreinlega nennti ekki á kjörstað?

-Herra Hundfúll er með athyglisverða tilgátu: Veðrið klikkaði. Það var alltof gott á kjördag.

Herra Hundfúll er ekki par hrifinn af hugmyndum um að skera niður fjárveitingar til Heilbrigðisstofnana á Norðurlandi vestra. Nóg var skorið á síðasta ári en nú er hugmyndin að gera enn betur (eða verr). Nú er stefnt að 33% niðurskurði á Króknum og 16% á Blönduósi. Þetta er ekkert annað en einelti og ætti að kæra undir eins!

Herra Hundfúll samgleðst Poolurum ynnilega með frábæra byrjun á keppnistímabilinu í ensku úrvalsdeildinni í fótbolta enda eru þeir á flottum stað í efri hluta deildarinnar eftir fjórar umferðir.[athugið: hér er að sjálfsögðu verið að tala um Blackpool]

Sóley er fjarskyldur ættingi Herra Hundfúls. Það er staðreynd.

Nú hafa Tindastólsmenn lokið leikjum sínum í C-riðli 3. deildar og ljóst að liðið endar í fyrsta eða öðru sæti riðilsins. Vanalega er það þannig að síðustu leikir liðanna í deild eru spilaðir sama dag svo eitt lið hafi ekki ávinnig af stöðu sinni, eins og til dæmis lið KB hefur núna gagnvart Stólunum. Meira…

Herra Hundfúll henti saman tveimur vísum í nótt og kannski ekki verulega góðum. Svona til útskýringar er kannski rétt að segja frá því að Palli blaðamaður Friðriks spáir líkt og nafni hans, Páll kolkrabbi frá Þýskalandi, Spánverjum sigri gegn Hollendingum á HM í kvöld og fjallar fyrri vísan um það. Meira…

Það er slatti af fótbolta í sjónvörpum landsmanna og ekki sér Herra Hundfúll annað en að allir gláparar ættu að geta verið sáttir við sitt. Tónlistarunnendur fá blásturstónleika í beinni (að vísu nokkuð eintóna), þeir sem eru gefnir fyrir dramatík og njósnaþætti geta fylgst með prímadonnunum í franska landsliðinu, handboltaáhugamenn gætu lært margt af Fabiano hinum brasilíska og þeir sem eru fyrir grínið horfa vitaskuld á ensku klaufabárðana en þar eru sannarlega einhverjir fremstu grínarar heims á ferðinni. -Hvað er fólk svo að kvarta yfir dagskránni?

Herra Hundfúll las í Mogganum að þrír menn voru handteknir á höfuðborgarsvæðinu fyrir að vinna skemmdarverk á bifreiðum með exi. Hundfúll er á því að lögreglan mætti í það minnsta taka til yfirheyrslu þá sem unnu tjón í sínum sveitarfélögum með exi í kosningunum þann 29. maí.

Besti flokkurinn nýtur ótrúlegra vinsælda í Reykjavík fyrir kosningarnar sem fram fara laugardaginn 29. maí. Þar er Jón Gnarr karlinn í brúnni og allt ágætt um það að segja. Herra Hundfúll hefur samt verið að velta því fyrir sér hvort Reykvíkingar vakni að sunnudagsmorgni með snillinginn og Jókerinn Jón Gnarr eða Georg skelfilega Bjarnfreðarson sem borgarstjóra. Og verða þá allir Reykvíkingar áður en langt um líður orðnir hugstola eins og fangavörðurinn ólánsami í Fangavaktinni?

Annan í páskum hófu ábúðarfullir fréttamenn Ríkiskassans að sýna hörmulegt myndband af skotárásum bandarískra hermanna á saklausa borgara í Írak. Hjálpsamur fjölskyldufaðir á sendibíl ætlaði að koma særðum blaðamanni í skjól, sem þyrlumenn höfðu skotið á í misgripum, en var sjálfur drepinn af sömu hermönnum. Inni í bílnum horfðu börn mannsins uppá þessa skelfingu en lifðu sjálf árásina af.

Lífið virðist ansi oft lítils virði í stríðsátökum og erfitt fyrir venjulega borgara fjarri þessum óhugnanlega raunveruleika að setja sig í spor Íraka og þeirra hermanna sem þar starfa. Það er fátt sem getur réttlætt framgöngu þeirra hermanna sem tóku þátt í þessum ójafna “bardaga”.

Íslenskir sjónvarpsmenn fóru til Bagdad og ræddu við börnin og eiginkonu mannsins sem var drepinn. Í það minnsta syninum var sýnt myndbandið af árásinni og hann myndaður meðan hann horfði á. Þetta kom Herra Hundfúlum nokkuð undarlega fyrir sjónir.

Herra Hundfúll var ekkert ánægður með framkomu stjórnmálamanna sem bönkuðu uppá gegnum imbann um helgina. Hvað átti það að þýða hjá Bjarna Ben í Silfri Egils að segja að kjósendur hefðu með því að segja nei í þjóðaratkvæðagreiðslu sagt nei við áframahaldandi setu ríkisstjórnarinnar? Fyrir kosningar var ekki annað að heyra en kosningarnar snérust alls ekki um þetta. Og hvað átti það að þýða hjá Steingrími og Jóhönnu að reyna telja fólki trú um að kosningaþátttakan hefði verið léleg þegar þau höfðu með sínum gjörðum [annað er útúrsnúningur] hvatt til að fólk tæki ekki þátt? Hvernig væri nú að stjórnmálamennirnir færu að snúa bökum saman og hættu að grilla gráa silfrið?

Væntanleg þjóðaratkvæðagreiðsla vegna væntanlegra laga um óvæntanlegan Icesave samning fer væntanlega fram næstkomandi væntanlegan laugardag að mati væntanlega hvorki bjartsýns né svartsýns fjármálaráðherra sem væntanlega kemst að niðurstöðu um það hvort hann muni krossa við já eða nei við spurningunni á kjörseðlinum áður en hann væntanlega kýs – sem hann er þó ekki viss um að hann geri.

Ljóst er að fæstir skilja upp eða niður í þjóðaratkvæðagreiðslu um eitthvað sem kannski er ekki en gæti verið, því það virðist ljóst að nýr og betri samningur (en besti samningur sem hægt er að semja um) er þegar uppi eða undir borðinu.

Herra Hundfúll er ákveðinn í að fara á kjörstað og krossa við nei ef hann fær á því færi. Nei við samningnum sem er bestur í heimi (en þó ekki bestastur), nei við skringilegri þjóðaratkvæðagreiðslu og nei við kaffi ef honum verður boðið upp á slíkt á kjörstað!

Herra Hundfúll horfði einu sinni sem oftar á Silfur Egils síðasta sunnudag. Oft rekur forvitnilegt fólk inn nefið hjá Agli og meðal viðmælenda hans þennan sunnudaginn var Norðmaður sem boðaði fagnaðarerindi Evrópusambandsins, Íslendingum (og Norðmönnum) til handa. Í Evrópu sagði hann hagana vera grænni, hitann meiri, áleggið ódýrara, bræðralagið fallegra og þar fram eftir götunum. Sumt hljómaði sennilegra en annað, eins og gengur. Sannfæringarmátturinn skein úr augunum og hendurnar hófust á flug til áherslu orðum hans. Einhverra hluta vegna minnti þessi hallelúja-söngur norska mannsins Herra Hundfúlann á óvænta upphringingu frá vottum Jehóva á laugardagskvöldi – eða kannski bara samtal við bílasala í notuðum bílum.

Þá var loksins valtað yfir danska leppalúðann en ef lesendur hafa ekki tekið eftir því þá er íslenska landsliðið á fullu í Evrópukeppninni í handbolta sem fer fram í Austurríki þessa dagana. Eftir að hafa leyft andstæðingunum að jafna í lok tveggja fyrstu leikjanna stigu strákarnir upp í leiknum gegnum dönum og unnu góðan sigur. Herra Hundfúll hefur ekki taugar í þessa vitleysu en er nokkuð sáttur við að horfa á sigurleiki í endursýningu. Hann hjó að vísu eftir því að í útvarpinu var hjartveikum og öðrum sem þola illa yfirspennu bent á að horfa á leikinn gegn dönum, sem fram fór á laugardagskvöldið, í endursýningu. Það var þó kannski verra að endursýna leikinn ekki fyrr en 21 klukkutíma eftir að honum lauk!

Herra Hundfúll rak augun í það nú í vikunni að Sjónvarpið hefur aftur hafið sýningar á Klaufabárðunum. Þessir tveir fyrstu þættir hafa reyndar verið í lengra lagi og meira að segja með hléi en atburðarásin er upp á gamla móðinn og allt klúðrast í lokin. Það er þó öðruvísi núna en í gömlu þáttunum að það hefur verið fenginn maður til að lýsa því sem fyrir augu ber og hefur hann jafnan allt á hornum sér nema þegar eitthvað gengur upp en þá er klaufabárðunum lýst með fögrum lýsingarorðum. Það er líka nýbreytni að þegar Klaufabárðarnir hafa lokið leik sínum eru menn í Sjónvarpssal sem stara orðlausir í gaupnir sér og þusa ráðalitlir að því er virðist mest við sjálfa sig um það sem fyrir augu bar. Herra Hundfúlum hefur reynst erfitt að horfa á þessa þætti sem eru talsvert dramatískari en fyrri syrpur með þeim félögum en vonast þó til að betri tímar séu framundan.

Herra Hundfúll heyrði í hádeginu að verið var að kjósa mann ársins á Rás 2. Frekar þótti honum þetta nú undarleg kosning þegar fólk var farið að hringja inn og segjast vera að kjósa fyrir tvo og jafnvel þrjá í einu. Þetta er umhugsunarverð framkvæmd á kosningu og kannski upplögð fyrir ríkisstjórnina? Steingrímur Joð gæti þá kannski greitt atkvæði um Icesave fyrir alla Vinstri græna í einu o.s.fr.

Herra Hundfúll er alveg gáttaður á nýju nafni á Búnaðarbankanum / Kaupþingi / KB banka / Nýja Kaupþing banka en í dag heitir bankinn hinu óíslenska nafni, Arion banki. Nafnið ku vera skírskotun í grískan guð sem var rændur af sjóræningjum, henti sér síðan í sjóinn og var bjargað af höfrungum! Nafnið fékk bankinn eftir að efnt var til samkeppni um nýtt nafn meðal starfsmanna bankans. Herra Hundfúlum finnst þetta allt saman pínu rosalega mikið eitthvað 2007 og svona eins og hrun bankanna hafi allt saman verið leiðinda óhapp og -Strákar! Nú skulum við skella okkur aftur í útrás!

En kannski eru það bara tóm leiðindi að vera með svona leiðindi – bara svolítið svona nóvember desember 2008?

Herra Hundfúll er ekki sérlega natinn við að stunda líkamsrækt. Gæti alla jafna verið á svipaðri bylgjulengd og Sverrir Stormsker í þeim efnum en hann er víst einkum þekktur fyrir að stunda augnlokalyftingar. Það kemur þó fyrir að Hundfúll rölti Ósbrúahringinn og þá fer nokkuð fyrir brjóstið á honum hversu litla tillitssemi ökumenn sína gangandi vegfarendum. Að vísu passa flestir ökumenn sig á því að sveigja frá gangandi vegfarendum en sumum finnst engin ástæða til að hægja ferðina – sumir bæta jafnvel í frekar en hitt. Sýnum tillitssemi – hún kostar ekkert!