Grunsemdir Sigurlaugar eru ekkert minna en hræðilegar
Sigurlaug Axelsdóttir, kirkjuvörður og rollubóndi, hringdi í Dreifarann á dögunum og sagðist vera orðin verulega áhyggjufull. „Já, ég held að hann Palli minn, maðurinn minn sko, sé alveg að missa það. Hann hefur nú alltaf verið upp eins og fjöður á morgnana þó hann hafi nú kannski ekki verið upp á sitt besta svona eftir jólin. En hann hefur nú yfirleitt náð sér á skrið í kringum þorrablótin, mætt með kúffullt trogið og verið kátur. Núna vildi hann ekki hafa neitt með sér nema súrar gúrkur frá ORA. Ég skil þetta bara ekki.“
Hvað heldurðu að ami að honum Palla, Sigurlaug? „Mig grunar nú ýmislegt. Ég hélt nú kannski að hann væri kominn með aðra en ég held að það sé alveg útilokað. Og þá, já, þá er eiginlega bara eitt ... sko ... en ég get eiginlega ekki hugsað þá hugsun til enda sko ...“
Hvað gæti það verið? „Mig grunar hreinlega að hann sé ... að hann sé orðinn VEGAN!“
Nei, andskotinn hafi það! „Já, ég veit, það væri bara hræðilegt. En ég sé ekki neitt annað sem getur verið að honum. Hann er leiður í skapinu, stanslaust að segja mér hvernig ég eigi að haga mér og svona. Mér sýnist þetta allt stefna í eina átt sko...“
Já! Þú segir mér fréttir. Hvað er til ráða Sigurlaug? „Ja, ég hef verið að hugsa. Ég hef tekið eftir því að hann er oft svona uppþembdur, þú skilur, maginn eins og þanin blaðra. Mig grunar helst að ég þurfi að höfða til umhverfissinnans í honum til að tjónka eitthvað við honum.“
Nú já, hvernig ætlarðu að láta það ganga upp? „Jú hérna, sjáðu til. Það er alltaf verið að tala um þessir vegan borði bara kál og sojabaunir eða hvað þetta nú heitir. Og hann Palli minn er svo agalega uppblásinn, hérna, og þú veist hvað sagt er um beljurnar, á hérna túnunum, þegar þær ropa og reka við?“
Nei, hvað er það Sigurlaug? „Nú að þær eyði ózonlaginu! Ég ætla að segja honum Palla að hann sé að eyða því. Fyrr eða síðar á þetta loft nefnilega eftir að fara úr honum og ég hef áhyggjur af þessu, að hann eyði því bara hérna yfir hverfinu okkar. Það væri auðvitað hræðilegt.“
Þú heldur þá að þessi veganismi sé hættulegur? „Já, það er alveg kristaltært. Hann er stórhættulegu öllu mannkyni. Heyrðu, hann er að koma, hérna hann Palli. Við heyrumst síðar ... kannski... vertu blessaður!“
Fleiri fréttir
-
Umhverfisdagur FISK Seafood 2024
feykir.is Skagafjörður, Austur-Húnavatnssýsla, Vestur-Húnavatnssýsla, Fréttir 20.04.2024 kl. 00.12Umhverfisdagur FISK Seafood verður haldinn 4. maí nk. frá klukkan 10-12. Áætlað er að tína rusl á strandlengjunni á Sauðárkróki (sem verður skipt upp í svæði), Nöfunum, í Varmahlíð, á Hólum og á Hofsósi. Frá 12:15 mun FISK Seafood bjóða öllum þátttakendum að þiggja veitingar að Sandeyri 2.Meira -
Ævintýrið úti hjá liði Tindastóls
feykir.is Skagafjörður, Íþróttir 19.04.2024 kl. 23.34Strax í haust voru bara þrjú hjól undir bíl meistara Tindastóls og eftir það var nánast sama hvaða hindrun varð á vegi hans, það varð allt til að hægja ferðina. Hann hökti reyndar inn í bikarúrslit og í úrslitakeppnina þó með naumindum væri. Stólakagginn sem allir biðu eftir að hrykki í gírinn, kæmi sterkur inn á endasprettinum, var eiginlega hálf vélarvana allt tímabilið. Leikurinn í Smáranum í kvöld var reyndar góður en enn og aftur voru Stólarnir sjálfum sér verstir. Lokakarfan var Grindvíkinga og hún skipti sköpum – lokastölur 91-89. Stólarnir því snemma í sumarfrí þennan veturinn og kannski allir fegnir – þessi bíll þarf í allsherjar yfirhalningu.Meira -
Gul viðvörun á Norðurlandi vestra
feykir.is Skagafjörður, Austur-Húnavatnssýsla, Vestur-Húnavatnssýsla 19.04.2024 kl. 22.24Veðurstofan hefur smellt á okkur gulri veðurviðvörun mest allan laugardaginn og fram á aðfaranótt sunnudags. Gert er ráð fyrir ört hækkandi hita og því má búast má við miklum leysingum, auknu afrennsli og vatnavöxtum í ám og lækjum. Mikilvægt er að hreinsa frá niðurföllum til að forðast vatnstjón vegna rigningar og leysingavatns. Gula viðvörunin gildir fyrir Vestfirði og allt Norðurland.Meira -
Venju samkvæmt er Stólastúlkum spáð falli
feykir.is Skagafjörður, Íþróttir 19.04.2024 kl. 15.44Það eru nokkrir fjölmiðlar sem spá fyrir tímabilið í Bestu deild kvenna í knattspyrnu og jafnan er liði Tindastóls spáð falli, ýmist 9. eða 10. sæti. Í árlegri spá fyrirliða, þjálfara og forráðamanna er liðinu spáð níunda sæti en liði Keflavíkur því neðsta. Íslandsmeisturum Vals er aftur á móti spáð titlinum og Blikum öðru sæti. Grönnum okkar í Þór/KA er síðan spáð þriðja sætinu.Meira -
Við erum ótrúlega rík af fólki | LS Lulla í spjalli
feykir.is Skagafjörður, Listir og menning, Mannlíf 19.04.2024 kl. 14.40„Litla hryllingsbúðin er skemmtilega fjölbreytt verk með miklum söng og er skemmtileg dramatísk hrollvekja,“ segir Sigurlaug Dóra Ingimundardóttir (Lulla), formaður Leikfélags Sauðárkróks, þegar Feykir spyr hana hvað hún geti sagt um Sæluvikustykki LS þetta árið. Æfingar standa nú yfir en frumsýnt verður í Bifröst á Sauðárkróki sunnudaginn í Sæluviku en samkvæmt áreiðanlegum heimildum Feykis er hér um að ræða 146. sýningu Leikfélags Sauðárkróks frá því það var endurvakið árið 1941.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.