Blóma- og gjafabúðin skiptir um eigendur
Um síðustu mánaðamót urðu eigendaskipti á Blóma- og gjafabúðinni á Sauðárkróki þegar Hrafnhildur Skaptadóttir tók við rekstrinum af Brynhildi Sigtryggsdóttur, eða Binný í Blómabúðinni, sem hafði rekið búðina um árabil. Eins og kunnugir vita er Hrafnhildur þó enginn nýgræðingur í blómaversluninni þar sem hún hefur starfað í búðinni hjá Binný undanfarin níu ár.
Þegar Hrafnhildur er spurð um aðdraganda þess að hún keypti reksturinn af Binný segir hún að hann sé í raun nokkuð langur. Binný hafði fyrir löngu ákveðið að hætta með búðina þegar hún yrði sextug og það hafi í raun oft komið til tals að hún tæki við þó ákvörðunin hafi ekki legið fyrir. Síðasta eitt og hálfa árið hefur Hrafnhildur svo fylgst náið með rekstrinum og og því fengið góðan undirbúning til viðbótar við þá reynslu sem hún býr að eftir að hafa starfað í búðinni árum saman.
Hrafnhildur, sem var varla skriðin upp úr grunnskóla þegar hún byrjaði að vinna í blómabúð, segir áhugann hafa verið fyrir hendi frá blautu barnsbeini. „Ég beið eftir því á vorin að blómin spryttu í garðinum hjá mömmu svo ég gæti klippt þau og gekk svo í hús í götunni til að selja, bisnessmanneskja fram í fingurgóma.“ Gróðurhús mömmu hennar varð blómabúð Hrafnhildar og svo átti hún heilu bækurnar með þurrkuðum blómum. Hún segist líka alltaf hafa haft mjög gaman af alls kyns föndri og handavinnu, þó ekki prjóni og hekli, og sé mjög „aktív“ í höndunum.
Aðspurð um hvort viðskiptavinir megi búast við einhverjum breytingum á búðinni segir Hrafnhildur að auðvitað fylgi nýjar áherslur með nýju fólki en þó séu engar rótækar breytingar fyrirhugaðar. „Mig langar að auka við vöruúrvalið og koma kannski með eitthvað nýtt sem ekki fæst í bænum. Svo gæti verið að búðin skipti um útlit að einhverju leyti. En það er öruggt að búðin skiptir ekki um nafn,“ segir Hrafnhildur og bætir því við að Blóma- og gjafabúðin verði 35 ára á þessu ári.
Rekstur blómabúðar á svona litlu svæði er mjög sveiflukenndur og oft koma dauðir tímar en svo miklir álagstoppar inn á milli. Hrafnhildur segist ekki ætla að ráða til sín fasta manneskju, búðin beri það varla, heldur séu móðir hennar, systur og fleiri fúsar til aðstoðar þegar þörf krefur.
Meðan blaðamaður staldrar við hringir síminn og auðheyrt er að þjónustan við viðskiptavininn getur orðið mjög persónuleg. „Já, hún skiptir miklu máli,“ segir Hrafnhildur, „þú hittir fólk í allavega ástandi, bæði gleði og sorg. Maður getur lent í því að þurfa að fara inn á heimili þar sem erfiðir atburðir hafa átt sér stað og líka þangað sem fólk er í hæstu hæðum með nýbakað barn. Fólkið sem kemur í búðina getur verið í alls konar ástandi. Stundum sendir fólk blóm en treystir sér ekki strax til aðstandenda þannig að blómabúðin verður eins konar fulltrúi. Þetta er partur af starfinu og mjög þroskandi að takast á við, horfast á við lífið eins og það er í raun og veru,“ segir Hrafnhildur að lokum.
Fleiri fréttir
-
Umhverfisdagur FISK Seafood 2024
feykir.is Skagafjörður, Austur-Húnavatnssýsla, Vestur-Húnavatnssýsla, Fréttir 20.04.2024 kl. 00.12Umhverfisdagur FISK Seafood verður haldinn 4. maí nk. frá klukkan 10-12. Áætlað er að tína rusl á strandlengjunni á Sauðárkróki (sem verður skipt upp í svæði), Nöfunum, í Varmahlíð, á Hólum og á Hofsósi. Frá 12:15 mun FISK Seafood bjóða öllum þátttakendum að þiggja veitingar að Sandeyri 2.Meira -
Ævintýrið úti hjá liði Tindastóls
feykir.is Skagafjörður, Íþróttir 19.04.2024 kl. 23.34Strax í haust voru bara þrjú hjól undir bíl meistara Tindastóls og eftir það var nánast sama hvaða hindrun varð á vegi hans, það varð allt til að hægja ferðina. Hann hökti reyndar inn í bikarúrslit og í úrslitakeppnina þó með naumindum væri. Stólakagginn sem allir biðu eftir að hrykki í gírinn, kæmi sterkur inn á endasprettinum, var eiginlega hálf vélarvana allt tímabilið. Leikurinn í Smáranum í kvöld var reyndar góður en enn og aftur voru Stólarnir sjálfum sér verstir. Lokakarfan var Grindvíkinga og hún skipti sköpum – lokastölur 91-89. Stólarnir því snemma í sumarfrí þennan veturinn og kannski allir fegnir – þessi bíll þarf í allsherjar yfirhalningu.Meira -
Gul viðvörun á Norðurlandi vestra
feykir.is Skagafjörður, Austur-Húnavatnssýsla, Vestur-Húnavatnssýsla 19.04.2024 kl. 22.24Veðurstofan hefur smellt á okkur gulri veðurviðvörun mest allan laugardaginn og fram á aðfaranótt sunnudags. Gert er ráð fyrir ört hækkandi hita og því má búast má við miklum leysingum, auknu afrennsli og vatnavöxtum í ám og lækjum. Mikilvægt er að hreinsa frá niðurföllum til að forðast vatnstjón vegna rigningar og leysingavatns. Gula viðvörunin gildir fyrir Vestfirði og allt Norðurland.Meira -
Venju samkvæmt er Stólastúlkum spáð falli
feykir.is Skagafjörður, Íþróttir 19.04.2024 kl. 15.44Það eru nokkrir fjölmiðlar sem spá fyrir tímabilið í Bestu deild kvenna í knattspyrnu og jafnan er liði Tindastóls spáð falli, ýmist 9. eða 10. sæti. Í árlegri spá fyrirliða, þjálfara og forráðamanna er liðinu spáð níunda sæti en liði Keflavíkur því neðsta. Íslandsmeisturum Vals er aftur á móti spáð titlinum og Blikum öðru sæti. Grönnum okkar í Þór/KA er síðan spáð þriðja sætinu.Meira -
Við erum ótrúlega rík af fólki | LS Lulla í spjalli
feykir.is Skagafjörður, Listir og menning, Mannlíf 19.04.2024 kl. 14.40„Litla hryllingsbúðin er skemmtilega fjölbreytt verk með miklum söng og er skemmtileg dramatísk hrollvekja,“ segir Sigurlaug Dóra Ingimundardóttir (Lulla), formaður Leikfélags Sauðárkróks, þegar Feykir spyr hana hvað hún geti sagt um Sæluvikustykki LS þetta árið. Æfingar standa nú yfir en frumsýnt verður í Bifröst á Sauðárkróki sunnudaginn í Sæluviku en samkvæmt áreiðanlegum heimildum Feykis er hér um að ræða 146. sýningu Leikfélags Sauðárkróks frá því það var endurvakið árið 1941.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.