Skyldusigur í Hertz-hellinum
Tindastólsmenn fóru nokkuð létt með ÍR-inga í Hertz-hellinum í Seljaskóla í gær þegar þriðja umferð Dominos-deildarinnar hófst. Stólarnir náðu undirtökunum upp úr miðjum fyrsta leikhluta en náðu þó ekki að stinga heimamenn af fyrr en í þriðja leikhluta. Pétur Birgis og Chris Caird voru bestir í liði Stólanna en lokatölur voru 68-82.
Breiðhyltingar voru reyndar án þriggja kempna; Kristins Marinós, Stefáns Karels og Matthíasar Orra en Stólarnir voru án Viðars. Costa og Martin ákváðu að fá meiri hraða í lið Stólanna til að nýta sér þetta og því byrjaði Pape Seck leikinn í stað Samb. Seck gerði reyndar aðeins eina körfu í leiknum, setti niður þrist og kom Stólunum í 4–5, en hann komst lítið í takt við leikinn og Samb endaði á því að spila talsvert meira. Stólarnir komust í 9-18 en þá gerðu ÍR-ingar næstu 10 stig en Stólarnir enduðu fyrsta leikhluta betur og voru yfir 19-24.
Lið Tindastóls var fljótt að byggja upp tíu stiga forskot í öðrum leikhluta en þá voru Caird, Pétur og Samb að gera góða hluti. Mestur varð munurinn 15 stig, 25–40, en ÍR-ingar náðu að klóra í bakkann fyrir hlé. Staðan 34–44 í hálfleik.
ÍR-ingar komu einbeittir til leiks í þriðja leikhluta og minnkuðu muninn í þrjú stig, 44–47, en þeim tókst ekki að komast nær þrátt fyrir möguleika til þess. Stólarnir hrukku hinsvegar í gang og nú fór Pétur fyrir sínum mönnum. Þegar þriðja leikhluta lauk var staðan orðin 48–67 og fjórði leikhluti nánast formsatriði. Munurinn á liðunum var þá yfirleitt 15 til 20 stig og fátt markvert sem gerðist annað en að Matthew Hunter gerði flautakörfu í blálokin með skoti fyrir aftan miðju.
Svona leikir þar sem annað liðið kemur skaddað til leiks geta oft reynst snúnir en Stólarnir voru aldrei nálægt því að missa leikinn úr höndum sér, þrátt fyrir nokkra spretti ÍR. Bestir í liði Tindastóls voru Pétur og Caird. Pétur var með 22 stig, níu fráköst og fimm stoðsendingar. Caird hitti vel og var stigahæstur með 26 stig og gaman að sjá þegar hann finnur fjölina. Helgi Margeirs var ekkert að misnota fjölina sína og var spar á skotin, ávöxtunin var þó betri en gengur og gerist í bankageiranum því skotin þrjú skiluðu níu stigum. Björgvin átti fínan leik en þó sérstaklega í vörninni þar sem hann hirti ellefu fráköst og stal þremur boltum.
Mamadou Samb er ágætur skotmaður og hann skilaði 15 stigum og átta fráköstum í gærkvöldi en það er niðurdrepandi að sjá þennan hávaxna leikmann virka hálf ónýtan undir körfu andstæðinganna. Í gærkvöldi var hann að skrefa, honum ýtt frá körfunni og boltinn sleginn úr höndunum á honum alltof auðveldlega. Reyndar komust ÍR-ingar upp með að brjóta á honum en Samb virðist alls ekki vera sá sterki leikmaður sem stuðningsmenn Stólanna áttu von á að berja augum í vetur. Vonandi nær hann vopnum sínum og sýnir okkur hvar Davíð keypti ölið.
Næsti leikur Tindastól er í Síkinu fimmtudaginn 27. október en þá koma Njarðvíkingar í heimsókn.
Fleiri fréttir
-
Alvarleg vanræksla á nautgripum kærð til lögreglu
feykir.is Skagafjörður, Austur-Húnavatnssýsla, Vestur-Húnavatnssýsla 19.04.2024 kl. 10.05Í tilkynningu á vef Matvælastofnunar er greint frá því að MAST hafi kært til lögreglu alvarlega vanrækslu eftir að 29 nautgripir fundust dauðir í gripahúsi við eftirlit á lögbýli á Norðurlandi vestra. Í kjölfarið aflífuðu starfsmenn stofnunarinnar 21 grip til viðbótar á staðnum sökum slæms ástands, allt gripi sem voru hýstir í húsinu.Meira -
Nærandi ferðaþjónusta | Freyja Rut Emilsdóttir skrifar
feykir.is Skagafjörður, Aðsendar greinar 19.04.2024 kl. 09.03Nærandi ferðaþjónusta er hugtak sem fær sífellt meiri athygli í umræðunni bæði hér á Íslandi sem og um heim allan. Hugtakið felur í sér markvissar aðgerðir sem fólk og fyrirtæki geta gripið til með það að markmiði að hafa jákvæð áhrif á nærumhverfi og náttúru og skilja þannig við áfangastaðinn, samfélagið og náttúruna í betra ástandi en áður. Þannig er farið skrefi lengra en sjálfbærni þar sem markmiðið er að skilja ekki við umhverfið í verra ástandi en áður og ganga ekki á auðlindir framtíðar.Meira -
Liðsheildin skilaði þessum sigri - segir Helgi þjálfari
feykir.is Skagafjörður, Íþróttir 19.04.2024 kl. 03.09„Þessi leikur var mjög jafn og spennandi allan tímann, algjör naglbítur tveggja góðra liða sem bæði lögðu allt i að vinna,“ sagði Helgi þjálfari Margeirs þegar Feykir bað hann að lýsa leik Tindastóls og Snæfells í gærkvöldi. „Frábær stemning í húsinu en Snæfell var með flotta stuðningsmannasveit og Síkið vel mannað og stuðningsmannasveitin í essinu sínu,“ en samkvæmt leikskýrslu voru um 300 áhorfendur í húsinu sem gerist ekki á hverjum degi í kvennaboltanum.Meira -
Lið Tindastóls sló út Subway-deildar lið Snæfells
feykir.is Skagafjörður, Íþróttir 18.04.2024 kl. 22.53Það var gleði og gaman í Síkinu í kvöld en sennilega þó ekki síður stress og naglanögun fram á síðustu sekúndu framlengingar þegar Tindastóll og Snæfell mættust í fjórða leik einvígis síns um réttinn til að spila um sæti í efstu deild. Leikurinn var jafn og spennandi allan tímann en gestirnir náðu góðum kafla snemma í fjórða leikhluta, náðu 13 stiga forystu og virtust ætla að tryggja sér oddaleik í Stykkishólmi. Lið Tindastóls gafst ekki upp og náði að jafna í blálokin og tryggja sér framlengingu þar sem heimaliðið reyndist sterkara. Lokatölur 82-78 og rjúkandi stemning hjá Stólastúlkum.Meira -
Jordyn Rhodes komin með leikheimild
feykir.is Skagafjörður, Íþróttir 18.04.2024 kl. 18.42Tindastóll teflir fram liði í þriðja skipti í efstu deild kvennafótboltans eftir ansi gott tímabil síðastliðið sumar. Besta deildin hefst nú á sunnudag og þá kemur FH í heimsókn á Krókinn. Það vita allir að það er bara ein Murr en hún hefur nú skipt um heimavöll og spilar með Fram í sumar í Lengjudeildinni. Jordyn Rhodes tekur hennar stöðu í fremstu víglínu og eru miklar vonir bundnar við hana.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.