Stólastúlkur léku topplið Einherja grátt á Sauðárkróksvelli í kvöld
Kvennalið Tindastóls fékk Einherja frá Vopnafirði í heimsókn í C-riðli 1. deildar kvenna í kvöld. Tindastólsstúlkurnar áttu góðan leik og var sigurinn öruggur en þegar upp var staðið höfðu þær gert sex mörk á meðan gestirnir áttu varla eitt einasta færi.
Leikurinn hófst kl. 18 og spilaði lið Tindastóls undan norðan strekkingi. Til að gera langa sögu stutta þá ógnuðu gestirnir aldrei í fyrri hálfleik en lið Tindastóls fékk mörg ágæt færi. Fyrsta markið kom strax á 9. mínútu og það gerði Jesse Shugg af harðfylgi. Jesse er feykiöflugur leikmaður; eldsnögg, áræðin og með gott auga fyrir að spila boltanum hratt. Hugrún Pálsdóttir var næst til að skora, fylgdi vel eftir á fjærstöng og kassaði boltann í markið á 27. mínútu. Kolbrún Hjaltadóttir gerði síðan laglegt mark eftir góða sókn á 38. mínútu og þremur mínútum síðar bætti Jesse við öðru marki sínu. Staðan 4-0 í hálfleik og ekki líklegt að gestirnir gerðu Stólastúlkum einhvern óskunda í þeim síðari, þó þær léku undan vindi.
Það kom á daginn. Leikurinn jafnaðist þó talsvert og gestirnir reyndu að pressa en Stólastúlkur komust fljótlega upp á lagið með að spila boltanum út úr vörninni í stað þess að negla upp í vindinn. Það var helst að lið Einherja reyndi að nýta sér aukaspyrnur og skjóta á mark Tindastóls. Það var þó aðeins einu sinni sem Charlotte Ferguson í markinu þurfti að taka á honum stóra sínum og varði með glæsibrag. Á 76. mínútu gerði Bryndís Rut Haraldsdóttir fimmta mark Tindastóls eftir góða sendingu frá Hugrúnu en Bryndís var þá nýkomin inná og skoraði með sinni fyrstu snertingu. Það var síðan Vigdís Edda Friðriksdóttir sem rak smiðshöggið á leik Tindastóls þegar hún gerði sjötta markið í uppbótartíma.
Flottur sigur hjá stelpunum sem spiluðu vel. Þær voru kannski aðeins of óþolinmóðar í byrjun en sýndu í síðari hálfleik að þær voru fullfærar um að láta boltann ganga. Á miðjunni voru Ólína Sif Einarsdóttir og Kasey Wyer mjög sterkar og vörnin komst mjög vel frá sínu og kæfðu alla sóknartilburði gestanna í fæðingu.
Þrátt fyrir að hafa nú tapað öðru sinni í sumar gegn liði Tindastóls eru stelpurnar í Einherja á toppi C-riðils með 13 stig en þær hafa reyndar spilað þremur leikjum meira en lið Tindastóls sem er í fjórða sæti sem stendur, með níu stig að loknum fjórum leikjum. Leikirnir hjá Stólastúlkum kom þétt og hratt á næstunni en liðið leikur sex leiki á átján dögum og hefst leikjahrinan þann 10. ágúst. Það verður spennandi að fylgjast með liðinu í þeim leikjum.
Fleiri fréttir
-
Lukkudísirnar voru í liði með FH
feykir.is Skagafjörður, Íþróttir 22.04.2024 kl. 20.44Fyrsti leikur Tindastóls í Bestu deild kvenna þetta árið fór fram nú undir kvöld en þá tóku Stólastúlkur á móti liði FH við ágætar aðstæður. Það verður varla annað sagt en að lukkudísirnar hafi verið í liði með gestunum því í það minnsta þrívegis skall boltinn í stangir FH marksins. Það voru hins vegar Hafnfirðingarnir sem gerðu eina mark leiksins snemma í síðari hálfleik og þrátt fyrir talsverða pressu og nokkur ágæt færi þá tókst liði Tindastóls ekki að jafna.Meira -
Vortónleikar í Blönduóskirkju
feykir.is Austur-Húnavatnssýsla, Listir og menning 22.04.2024 kl. 09.56Sunnudaginn 28. apríl vera haldnir tónleikar í Blönduóskirkju þar sem kirkjukórinn mun syngja nokkur hugljúf vorlög undir stjórn Eyþórs Franzsonar Wechner organista. Jafnframt mun Eyþór sýna snilli sína og leyfa okkur að heyra hvað orgelið hefur upp á að bjóða. Mun hann leika vel valin orgelverk.Meira -
Stólastúlkur mæta FH á gervigrasinu klukkan fimm í dag
feykir.is Skagafjörður, Íþróttir 22.04.2024 kl. 08.31Leik Tindastóls og FH í fyrstu umferð Bestu deildar kvenna sem fram átti að fara kl. 16:00 í gær var frestað sökum vallaraðstæðna á Króknum í gær. Í leysingum laugardagsins skiluðu snjóalög í Grænuklaufinni sér niður á vallarsvæðið og var gervigrasvöllurinn á floti og ekki leikhæfur. Gærdagurinn reyndist þurr og í dag er sól og fínerí og leikurinn mun fara fram í dag og hefst kl. 17:00.Meira -
Nóg af verkefnum framundan hjá Fornverkaskólanum
feykir.is Skagafjörður, Listir og menning 21.04.2024 kl. 13.44Það er óhætt að segja að það verður nóg að gera hjá Fornverkaskólanum á árinu. Í lok apríl ætlum við að bregða fyrir okkur betri fætinum og taka stefnuna austur á Seyðisfjörð, þar sem Fornverkaskólinn ætlar að kynna torfarfinn fyrir nemendum LungA lýðskóla. Námskeiðið verður að stórum hluta í máli og myndum og ef veður verður skaplegt og sæmilegt færi verður mögulega hægt að grípa í skóflu og undirristuspaða til ánægju og yndisauka. Setji snjór og vetrarfærð okkur skorður er e.t.v. hægt að fara í tilraunaverkefni með snjóhnausa og streng.Meira -
Heiminn vantar fleiri faðmlög | Leiðari 14. tbl 2024
feykir.is Aðsendar greinar 21.04.2024 kl. 12.08Faðmlag er eitt af mörgum fallegum orðum í íslenskunni. „Faðmlög eru einstaklega jákvæð leið til samskipta og til að sýna væntumþykju. Vinir faðmast og við sýnum fólkinu okkar væntumþykju með faðmlögum,“ segir á netsíðunni Hjartalíf.is og þar er reyndar sagt að faðmlög minnki hættuna á hjarta- og æðasjúkdómum og losi um streytu. Það eru því fá – ef einhver – lög betri en faðmlögin og þau ættu að ósekju að tróna á toppi vinsældalista okkar íbúa bláa hnattarins.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.