Glanni besti töltarinn – Hestamaðurinn :: Ingimar Jónsson á Flugumýri
Ingimar Jónsson, bóndi á Flugumýri, er hestamaður vikunnar á Feyki. Hann er kvæntur Margréti Óladóttur og eiga þau miklu barnaláni að fagna en börn þeirra eru þau Dagur Már f. 1991, Katarína f. 1995, Rakel Eir f. 1999, Jón Hjálmar f. 2003, Matthildur f. 2008 og Árni Þór f. 2015. Foreldrar hans eru þau Jón Ingimarsson frá Flugumýri og Sigríður Valdimarsdóttir frá Sauðárkróki en af þeim tóku þau hjón við búskap á Flugumýri 1998-9. Aðspurður um hrossafjölda segir Ingimar hann vera aðeins meiri en nauðsynlegt getur talist.
Hver er fyrsta minningin tengd hestum? -Fyrsta minningin er nú í einhverri móðu en ég held samt að það sé að einhver fullorðinn batt strigapoka aftan við hnakkinn og svo var riðið niður að vötnum og vitjað um silunganet.
Hver er uppáhaldshesturinn þinn og af hverju? -Maður á alltaf einhvern uppáhaldshest hverju sinni og yfirleitt einhvern sem maður er að þjálfa í það skiptið. Núna er minn uppáhaldshestur ungur foli úr ræktun vinar míns Agnars á Miklabæ og við eigum hann saman. Hann heitir Lífeyrissjóður. Það segir nú allt um hann.
Hvað var það skemmtilegasta sem þú gerðir í sumar, tengt hestum? -Í sumar fór ég í ferð sem var ákveðin í fimmtugsafmælinu mínu með góðum vinum. Bjarni Páll vinur minn, sem rekur Saltvíkurhesta, skipulagði. Við lögðum upp frá Meiðavöllum við Ásbyrgi í Þeistareyki, þaðan á Mývatn, Grímsstaða á fjöllum, í Möðrudal og enduðum í Sænautaseli sem er efst á Jökuldal. Þetta voru mörg hundruð kílómetrar af Austurlandsauðn og frábærum reiðgötum. Og ekki skemmdi félagsskapurinn.
Áttu einhverja sögu tengda hesti sem fallinn er frá? -Einn besti hestur sem ég hef átt um dagana hét Glanni og var frá Guðnabakka í Borgarfirði. Ég var búinn að heyra af honum inni í hesthúsi hjá Sveini á Lýtingsstöðum, að þar væri sérlega fallegur og reistur foli sem vert væri að skoða. Ég fór og heilsaði upp á „kunningja“, sem svaraði að bragði sæll „félagi“, og falaðist eftir að prófa hestinn. Einhverjar vöflur voru nú á Sveini en fyrir rest fékk ég að prófa þegar búið var að ákveða verðið. Ég komst í fyrstu beygju og lá þar eftir í skurði. Þetta voru kannski 200 metrar. Það var nóg, hesturinn fór með heim og er enn í dag besti töltari sem ég hef riðið og hef þó prófað allavega tvo heimsmeistara í tölti. Hann náði ágætis árangri í keppni á sínum tíma en spattaðist og þar með lauk því.
Hvað ertu að gera þessa dagana, eða á næstunni, tengt hestum? -Í dag er ég með vetrarsetu á Akureyri, af ýmsum ástæðum sem ekki verða ræddar hér. Og hafði með mér fjögur hross til að líta til með og reyna að gera eitthvað úr. Ríð út með Eyfirðingum sem er auðvitað ekkert líkt og að ríða út með Skagfirðingum eins og þið skiljið sem lesið.
Áður birst í 11. tbl. Feykis 2020
Fleiri fréttir
-
Liðsheildin skilaði þessum sigri - segir Helgi þjálfari
feykir.is Skagafjörður, Íþróttir 19.04.2024 kl. 03.09„Þessi leikur var mjög jafn og spennandi allan tímann, algjör naglbítur tveggja góðra liða sem bæði lögðu allt i að vinna,“ sagði Helgi þjálfari Margeirs þegar Feykir bað hann að lýsa leik Tindastóls og Snæfells í gærkvöldi. „Frábær stemning í húsinu en Snæfell var með flotta stuðningsmannasveit og Síkið vel mannað og stuðningsmannasveitin í essinu sínu,“ en samkvæmt leikskýrslu voru um 300 áhorfendur í húsinu sem gerist ekki á hverjum degi í kvennaboltanum.Meira -
Lið Tindastóls sló út Subway-deildar lið Snæfells
feykir.is Skagafjörður, Íþróttir 18.04.2024 kl. 22.53Það var gleði og gaman í Síkinu í kvöld en sennilega þó ekki síður stress og naglanögun fram á síðustu sekúndu framlengingar þegar Tindastóll og Snæfell mættust í fjórða leik einvígis síns um réttinn til að spila um sæti í efstu deild. Leikurinn var jafn og spennandi allan tímann en gestirnir náðu góðum kafla snemma í fjórða leikhluta, náðu 13 stiga forystu og virtust ætla að tryggja sér oddaleik í Stykkishólmi. Lið Tindastóls gafst ekki upp og náði að jafna í blálokin og tryggja sér framlengingu þar sem heimaliðið reyndist sterkara. Lokatölur 82-78 og rjúkandi stemning hjá Stólastúlkum.Meira -
Jordyn Rhodes komin með leikheimild
feykir.is Skagafjörður, Íþróttir 18.04.2024 kl. 18.42Tindastóll teflir fram liði í þriðja skipti í efstu deild kvennafótboltans eftir ansi gott tímabil síðastliðið sumar. Besta deildin hefst nú á sunnudag og þá kemur FH í heimsókn á Krókinn. Það vita allir að það er bara ein Murr en hún hefur nú skipt um heimavöll og spilar með Fram í sumar í Lengjudeildinni. Jordyn Rhodes tekur hennar stöðu í fremstu víglínu og eru miklar vonir bundnar við hana.Meira -
Snjódýpt í Fljótum yfir meter að jafnaði
feykir.is Skagafjörður, Ljósmyndavefur 18.04.2024 kl. 14.31„Tíðarfarið hefur verið nokkuð óvenjulegt frá 21. mars en allar helgar síðan þá hafa skollið á norðan stórhríðir en lítill snjór var annars þennan vetur,“ segir Halldór Gunnar Hálfdansson, bóndi á Molastöðum í Fljótum en hann sér einnig um skólaakstur í sveitinni. Halldór bætir við að það sé nokkuð óvenjulegt að fá svona mikinn snjó seint og segir að yfirleitt þegar snjóþungt sé í Fljótum hafi sá snjór verið að safnast allan veturinn, oft frá því í október.Meira -
Máttur menntunar | Álfhildur Leifsdóttir skrifar
feykir.is Skagafjörður, Aðsendar greinar 18.04.2024 kl. 13.45Það hefur lengi verið sagt að menntun sé máttarstólpi samfélagsins. Fjöreggið. Skólakerfið okkar á að vera öflugasta jöfnunartækið, þar eiga allir að hafa sömu tækifærin. En er það svo? Við getum vissulega fagnað þeim breytingum að fríar skólamáltíðir verða að veruleika, aðgerð sem jafnar leikinn að einhverju leyti og er breyting til batnaðar fyrir öll.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.