Nýtt vín á gömlum belgjum :: Leiðari Feykis
Sæluvika Skagfirðinga stendur nú sem hæst og er ýmislegt þar að finna af alls kyns afþreyingu og listviðburðum eins og lesa má um hér í blaðinu. Söngur, leikur, tónlist, bíó, myndlist, íþróttakappleikir og fjörugt mannlíf.
Það er mikill auður sem felst í því að hafa öflugt fólk sem gefur sér tíma til að standa fyrir hinum ýmsu verkefnum og viðburðum sem í boði eru og ekki sjálfgefið að svo sé. Skagfirðingar, sem komnir eru yfir miðjan aldur, muna kannski eftir því að deyfð var kominn í mannskapinn nokkru fyrir síðustu aldamót en með samhentu átaki var spýtt í lófana og þessari menningarviku komið í fyrra horf. Það sýnir að ekkert gerist ef enginn er til í tuskið.
Hinir sömu, sem komnir eru á aldur, minnast enn með hlýju hinna mörgu dansleikja sem haldnir voru í Bifröst, kvöld eftir kvöld, gleðskaparins og stemningarinnar sem skapaðist í Græna salnum. Það er liðin tíð og leitt til þess að hugsa enda ekki ballfært lengur í húsinu.
Endurbótum er nú nýlokið á samkomuhúsinu, sem brátt fer að nálgast hundrað ára aldurinn, og aðallega felast í bættu aðgengi hreyfihamlaðra með tilkomu hjólastólabrautar að inngangi og lyftu innan dyra upp á efri hæð og veitti ekki af.
Því miður lánaðist ekki að skipta um sæti í salnum eða öllu heldur rúmaðist það ekki innan fjármagnsrammans. Það hefði samt ekki þurft að kosta miklu til til að mála salinn og gera hann örlítið snyrtilegri.
Setning Sæluvikunnar fór fram í Safnahúsinu og stólum raðað upp í sal bókasafnsins og fór vel fram. Málverkasýning var opnuð þar sem myndir ungrar listakonu hanga á takmörkuðu plássi veggja húsnæðisins og varð mér hugsað til menningarhússins sem til stendur að byggja í framtíðinni og nýlega var greint frá að sé nokkurn veginn að komast á einhvers konar skrið. Alla vega sagði Lilja Dögg Alfreðsdóttir, menningarmálaráðherra, í svari sínu til Sigurjóns Þórðarsonar, sem þá sat á Alþingi, að hún hafi metnað til að bæta aðstöðu listsýninga og sviðslista á Sauðárkróki og að fjármögnun væri nánast lokið. Vonandi lifi ég það að njóta fjölbreyttrar listar í því húsi og jafnvel að fá að vera með í því að koma einhverjum viðburði á laggirnar.
Þrátt fyrir þrá mína eftir nýju menningarhúsi langar mig í lokin til að minnast á eitt elsta menningarhús landsins, Gúttó á Sauðárkróki, sem reist var árið 1897 og hýsti leiksýningar þangað til þær fluttust í Bifröst, sem byggt var 1925. Þar fer nú fram samsýning myndlistarfólks í Sólon, félagi myndlistarmanna í Skagafirði.
Þetta minnir mann svolítið á líkingar Jesús á borð við það að nýtt vín verði að setja á nýja belgi því ef nýtt vín er sett á gamla belgi sprengir vínið belgina og allt ónýtist. Nei, ég segi bara svona.
Ég hvet alla til að kíkja í heimsókn í gömlu belgina og að sjálfsögðu á alla aðra viðburði sem boðið er upp á í þeim yngri.
Góðar stundir!
Páll Friðriksson
Fleiri fréttir
-
Hagur allra að samningar náist sem fyrst
feykir.is Skagafjörður, Lokað efni 31.10.2024 kl. 14.56Verkföll eru eins og áður hefur komið fram í níu skólum á landinu en kennarar eiga nú í samningaviðræðum við samninganefnd sveitarfélaganna um bætt kjör. Leikskólinn Ársalir á Sauðárkróki er einn þessara níu skóla en í Ársölum eru alls 65 starfsmenn á launaskrá og af þeim eru 26 í verkfalli.Meira -
Skandall sigraði Viðarstauk annað árið í röð
feykir.is Austur-Húnavatnssýsla, Listir og menning, Lokað efni 31.10.2024 kl. 13.27Hljómsveitin Skandall gerði sér lítið fyrir og sigraði í Viðarstauk sem haldinn var í 41. sinn nú á dögunum. Viðarstaukur er hljómsveitarkeppni innan Menntaskólans á Akureyri en hljómsveitin Skandall er að mörgu leyti óvenjuleg; ekki einungis er hún skipuð fimm stúlkum sem stunda nám í MA heldur eru þrjár þeirra úr Austur Húnavatnssýslu og ein þeirra spilar á flautu. Feykir lagði nokkrar spurningar fyrir aðalsöngkonu Skandals, Ingu Rós Suska.Meira -
Ný brunavarnaáætlun Skagafjarðar tekur gildi
feykir.is Skagafjörður, Austur-Húnavatnssýsla, Lokað efni 31.10.2024 kl. 13.20Skagafjörður samþykkti þann 23. október síðastliðinn nýja brunavarnaáætlun sveitarfélagsins til næstu fimm ára og er þetta önnur stafræna brunavarnaáætlun landsins. Brunavarnaáætlunin er nú aðgengileg á vefsíðu viðkomandi sveitarfélags en einnig er hún birt á vef HMS.Meira -
Lið Þórs með grobbréttinn á Norðurlandi
feykir.is Skagafjörður, Íþróttir, Lokað efni 31.10.2024 kl. 12.53Lið Þórs og Tindastóls mættust í Höllinni á Akureyri í gærkvöld en um 220 áhorfendur mættu og fengu að sjá fjörugan leik og bæði lið sýndu fínan sóknarleik. Bæði lið frumsýndu erlenda leikmenn og var stuðningsfólk Tindastóls sérlega ánægt með það sem Mélissa Diawakana hafði fram að færa. Lið Þórs hafði yfirhöndina frá upphafi til enda en náði þó aldrei að hrista lið Tindastóls af sér. Sex stigum munaði þegar innan við mínúta var eftir en Stólastúlkur komust ekki nær sterku Þórsliði þar sem Maddie Sutton reyndist erfið. Lokatölur 102-95.Meira -
Nú skiptir Feykir.is yfir í læstar fréttir
feykir.is Skagafjörður, Austur-Húnavatnssýsla, Vestur-Húnavatnssýsla 31.10.2024 kl. 12.33Eins og nefnt var í leiðara Feykis í síðustu viku þá hefur verið ákveðið að loka fyrir ókeypis aðgang að megninu af fréttum og öðru efni sem hingað til hefur staðið öllum opið á Feykir.is. Eru lesendur hvattir til að styrkja útgáfuna og gerast rafrænir áskrifendur.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.