Vill sjá Tindastólsfólk fjölmenna á völlinn
Lið Tindastóls í Bestu deild kvenna krækti í sjöunda sætið í deildinni þegar liðið gerði jafntefli við Norðurlandsrisann Þór/KA á sunnudaginn. Stelpurnar okkar náðu að hala inn 19 stig í 18 leikjum sem er fimm stigum meira en í Pepsi Max deildinni fyrir tveimur árum. Feykir lagði nokkrar léttar spurningar fyrir þjálfara liðsins, Donna Sigurðsson, því ekki er sopið kálið þó í ausuna sé komið – úrslitakeppni um að halda sæti í Bestu deild að ári hefst um næstu helgi.
Fyrst var Donni spurður hvað honum hafi þótt um frammistöðu liðsins í leiknum við Þór/KA. „Við erum mjög ánægð með frammistöðu liðsins i heild sinni. Við fengum fínar stöður til að skora auk þess að fá besta færi leiksins. Við fengum nokkur færi á okkur en bæði vörnin og Monica náðu að verjast öllu sem að marki kom. Orkan, stemningin, barráttan og dugnaðurinn var algerlega til fyrirmyndar. Við hefðum gjarnan viljað geta fært boltann aðeins oftar á milli kanta og nýta föstu leikatriðin betur en annars ætla ég alla ekkert að kvarta, stelpurnar gáfu allt í þetta. Hörkuleikur frekar jafnra liða. Þór/KA náði aðeins betri stjórn á boltanum en mér fannst við eiga vel við þær lang oftast.
Ertu ánægður með árangur liðsins í deildarkeppninni í sumar? „Við vildum klárlega ná sjötta sætinu og stefndum á það. Það munaði alla vega ekki miklu þar og okkur finnst að við hefðum verðskuldað það sæti miðað við frammistöðu sumarsins. Stelpurnar eru klárlega búnar að bæta sig mikið og leikur liðsins í framför og þetta er vonandi eitthvað sem er hægt að halda áfram að bæta í þessari deild á næstu árum. En eftir þessa 18 leiki eru komin fleiri stig í hús heldur en áður hefur verið og við öll getum verið stolt af því. Við erum með okkar eigin örlög í okkar höndum og það er staða sem við öll vildum vera í fyrir úrslitakeppnina.
Þú ert farinn að treysta Elísu Bríeti og Birgittu í ansi stór verkefni þó þær séu aðeins 15 ára. Í leiknum síðasta sunnudag komu þær t.d. inn á í einum mikilvægasta leik sumarsins og helgina áður gegn Íslandsmeisturum Vals. Hverjir eru helstu kostir þeirra? „Elísa er ansi fjölhæfur leikmaður. Hún er tæknilega mjög góð og hefur mikinn leikskilning. Elísa er harðdugleg og hefur tekið stór skref. Birgitta er eldsnögg og með mjög góð skot. Hún er tæknilega góð og með flottan leikskilning. Þær eru klárlega framtíðarleikmenn liðsins ásamt þónokkrum öðrum hjá okkur. Við stöndum vel þegar kemur að framtíðar leikmönnum og mikilvægt að reyna að gefa þeim sénsa þegar hægt er.“
Hvernig leggst úrslitakeppnin í þig? „Úrslitakeppnin leggst mjög vel í okkur og við öll mjög spennt. Við erum mjög glöð að fá tvo heimaleiki og vonumst til að fólkið okkar mæti á völlinn og búi til sturlaða stemningu og hjálpi okkur að skrifa sögu Tindastóls þar sem félagið hefur aldrei haldið sér uppi tvö tímabil í röð.“
Stólastúlkur taka á móti liði Keflavíkur í fyrstu umferð úrslitakeppninnar núna á sunnudaginn og hefst leikurinn kl. 16:15. Allir á völlinn – áfram Tindastóll!
Fleiri fréttir
-
Hagur allra að samningar náist sem fyrst
feykir.is Skagafjörður, Lokað efni 31.10.2024 kl. 14.56Verkföll eru eins og áður hefur komið fram í níu skólum á landinu en kennarar eiga nú í samningaviðræðum við samninganefnd sveitarfélaganna um bætt kjör. Leikskólinn Ársalir á Sauðárkróki er einn þessara níu skóla en í Ársölum eru alls 65 starfsmenn á launaskrá og af þeim eru 26 í verkfalli.Meira -
Skandall sigraði Viðarstauk annað árið í röð
feykir.is Austur-Húnavatnssýsla, Listir og menning, Lokað efni 31.10.2024 kl. 13.27Hljómsveitin Skandall gerði sér lítið fyrir og sigraði í Viðarstauk sem haldinn var í 41. sinn nú á dögunum. Viðarstaukur er hljómsveitarkeppni innan Menntaskólans á Akureyri en hljómsveitin Skandall er að mörgu leyti óvenjuleg; ekki einungis er hún skipuð fimm stúlkum sem stunda nám í MA heldur eru þrjár þeirra úr Austur Húnavatnssýslu og ein þeirra spilar á flautu. Feykir lagði nokkrar spurningar fyrir aðalsöngkonu Skandals, Ingu Rós Suska.Meira -
Ný brunavarnaáætlun Skagafjarðar tekur gildi
feykir.is Skagafjörður, Austur-Húnavatnssýsla, Lokað efni 31.10.2024 kl. 13.20Skagafjörður samþykkti þann 23. október síðastliðinn nýja brunavarnaáætlun sveitarfélagsins til næstu fimm ára og er þetta önnur stafræna brunavarnaáætlun landsins. Brunavarnaáætlunin er nú aðgengileg á vefsíðu viðkomandi sveitarfélags en einnig er hún birt á vef HMS.Meira -
Lið Þórs með grobbréttinn á Norðurlandi
feykir.is Skagafjörður, Íþróttir, Lokað efni 31.10.2024 kl. 12.53Lið Þórs og Tindastóls mættust í Höllinni á Akureyri í gærkvöld en um 220 áhorfendur mættu og fengu að sjá fjörugan leik og bæði lið sýndu fínan sóknarleik. Bæði lið frumsýndu erlenda leikmenn og var stuðningsfólk Tindastóls sérlega ánægt með það sem Mélissa Diawakana hafði fram að færa. Lið Þórs hafði yfirhöndina frá upphafi til enda en náði þó aldrei að hrista lið Tindastóls af sér. Sex stigum munaði þegar innan við mínúta var eftir en Stólastúlkur komust ekki nær sterku Þórsliði þar sem Maddie Sutton reyndist erfið. Lokatölur 102-95.Meira -
Nú skiptir Feykir.is yfir í læstar fréttir
feykir.is Skagafjörður, Austur-Húnavatnssýsla, Vestur-Húnavatnssýsla 31.10.2024 kl. 12.33Eins og nefnt var í leiðara Feykis í síðustu viku þá hefur verið ákveðið að loka fyrir ókeypis aðgang að megninu af fréttum og öðru efni sem hingað til hefur staðið öllum opið á Feykir.is. Eru lesendur hvattir til að styrkja útgáfuna og gerast rafrænir áskrifendur.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.