Malen gefur út nýtt lag
Malen Áskelsdóttir, sem við þurfum nú ekki að kynna fyrir fólki, er að gefa út nýtt lag á öllum helstu streymisveitum, núna næstkomandi föstudag. Lagið „Right?“ samdi hún fyrir rúmu ári síðan. Upptökuferlið byrjaði svo í maí á þessu ári og tók nokkra mánuði. Malen samdi lag og texta og það var Baldvin Hlynsson sem útsetti lagið með henni og sá um hljóðblöndun.
Lagið var tekið upp í stúdóinu hans Baldvins í miðbæ Reykjavíkur ásamt frábæru tónlistarfólki. „Söngkonan Raven söng lagið með mér, Jón Arnar sem er leiðari básúnudeildar Sinfó spilaði á básúnu og Kristinn Þór, sem hefur til dæmis unnið mikið með hljómsveitinni Hipsumhaps, spilaði á gítar,“ segir Malen.
En hvernig kom samstafið við Baldvin og Raven til? „Ég byrjaði að vinna með Baldvini fyrir tveimur árum þegar ég var að taka upp mína fyrstu plötu og langaði að finna fleira tónlistarfólk til þess að vinna með. Í dag hefur hann, liggur við, unnið með öllu helsta tónlistarfólki landsins, en á þessum tíma hafði ég ekki heyrt um hann þangað til ég komst að því að hann var búinn að vinna með söngkonunni Kristínu Sesselju. Mér fannst þau búin að vera að gera flotta hluti svo ég ákvað að bara að senda honum skilaboð á Instagram og hann var opinn fyrir því að vinna með mér. Mér fannst við vinna vel saman og ég endaði á því að taka upp tvö lög á plötunni með honum og svo héldum við áfram að vinna saman eftir að platan kom út,“ segir Malen.
„Hrafnhildur Magnea, eða Raven, var að útskrifast með háskólagráðu í söng fyrr á þessu ári í Amsterdam. Hún hefur verið að koma fram og gefa út lög í einhver ár, sem eflaust mörg ykkar hafið heyrt í útvarpinu. Svo ég hef lengi vitað af henni, við eigum marga sameiginlega vini og ég man að hún hjálpaði mér aðeins áður en ég fór í söngnám í Köben árið 2019. Þá var hún búin að fara í sama nám. Ég hef lengi litið upp til hennar sem söngkonu, texta- og lagahöfundar, svo það er algjör draumur að hafa fengið hana til að syngja þetta lag með mér, “ segir Malen.
Hvernig verður lag eins og þetta til? „Ég bjó til sögu í hausnum mínum þegar ég samdi þetta lag og reyndar líka næsta lag sem ég mun gefa út. Sagan er um reynslu tveggja einstaklinga og lögin tvö eru skrifuð frá sitthvoru sjónarhorni þeirra. Ég myndi segja að lagið „Right?“ fjalli aðallega um efasemdir og nafnið á laginu er spurningin „Right?,“ eða á íslensku „er það ekki ?.“
Það er ekki hægt að sleppa því að forvitanst aðeins um hvort það sé eitthvað meira á döfunni í tónlistinni hjá Malen. „Það að búa til tónlist er eitt af því skemmtilegasta sem ég geri og mér finnst að markmiðið hjá öllum ætti að vera að gera það sem þeim finnst skemmtilegt, svo það er markmiðið mitt að halda áfram að búa til tónlist. Ég vona líka að ég haldi áfram að kynnast nýju tónlistarfólki, mér finnst það gaman og ég held að það gætu alls konar hugmyndir, innblástur og tækifæri fæðst við það. Ég mun klárlega halda áfram að syngja og halda tónleika. Undanfarið hefur mér líka fundist spennandi að búa til tónlist fyrir aðra artista og jafnvel fyrir sjónvarpsefni eða auglýsingar, svo kannski á sú pæling eftir að fara ennþá lengra.“ Það gefur auga leið að þessi unga og frábæra tónlistarkona er bara rétt að byrja og hvetjum alla til að fylgjast með þegar nýja lagið kemur út.
Fleiri fréttir
-
Þörfin fyrir heimilislækna | Bjarni Jónsson skrifar
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 16.05.2024 kl. 16.16Að geta notið þjónustu heimilislæknis er ein af grunnþörfum okkar allra hvar sem við búum á landinu. Það er ekki síður mikilvægt að fólk hafi aðgang að föstum heimilislækni til að tryggja samfellu í þjónustunni. Þurfa ekki sífellt að bera sig upp við nýja lækna með mein sín, áhyggjur eða við heilsufarseftirlit. Aðgengi að góðri heilbrigðisþjónustu í heimabyggð eru grundvallarmannréttindi. Hér á landi höfum við búið við traust opinbert heilbrigðiskerfi þar sem öll eiga sama rétt til þjónustu óháð efnahag og stöðu. Um það er þjóðarsátt.Meira -
Lengi lifi rokkið - Gildran með tónleika í Gránu
feykir.is Skagafjörður, Austur-Húnavatnssýsla, Vestur-Húnavatnssýsla, Fréttir 16.05.2024 kl. 15.00Hljómsveitin Gildran fagnar á næsta ári fjörtíu ára afmæli sínu og nú er hafa Skagfirðingar og nærsveitungar tækifæri til að mæta í Gránu nk.laugardagskvöld 18. maí og hefjast tónleikarnir kl. 20:30. Trommari Gildrunnar Kalli Tomm sem fæddur er og uppalinn í Mosfellssveit og hefur búið þar meira og minna öll sín ár er nú búsettur á Hofsósi. Feykir heyrði í nýbúanum á Hofósi og tók tal af honum í tilefni flutninga og komandi tónleika.Meira -
Ólík nálgun á snjallfækkun
feykir.is Skagafjörður, Mannlíf 16.05.2024 kl. 14.21Um fjörtíu háskólanemar og kennarar frá sex erlendum háskólum, af tólf þjóðernum, heimsóttu Byggðastofnun í gær á vegum Háskólaseturs Vestfjarða sem er hluti af alþjóðlegu samstarfi og skipuleggur sumarskóla í samstarfslöndunum Svíþjóð, Lettlandi, Finnlandi, Eistlandi, Litháen auk Íslands.Meira -
Liðið þarf smá tíma til að slípast saman
feykir.is Austur-Húnavatnssýsla, Íþróttir, Vestur-Húnavatnssýsla 16.05.2024 kl. 13.46„Leikurinn við Reyni var heilt yfir nokkuð vel spilaður. Sóknarlega náðum við að halda betur í boltann en við gerðum á móti Selfossi og við vorum að fá góðar opnanir hátt á vellinum en náðum ekki að nýta þær stöður nægilega vel,“ sagði Ingvi Rafn Ingvarsson, þjálfari Kormáks/Hvatar, þegar Feykir spurði hann út í leikinn gegn Reyni Sandgerði í 2. umferð 2. deildar en leikurinn fór fram á Dalvík um helgina. Leikurinn endaði með 1-3 sigri Sandgerðinga líkt og Feykir sagði frá.Meira -
Sigurbjörg ráðin yfirlæknir á HSN á Króknum
feykir.is Skagafjörður, Mannlíf 16.05.2024 kl. 11.25Sigurbjörg Ólafsdóttir, heimilislæknir, hefur verið ráðin yfirlæknir á HSN Sauðárkróki. Sigurbjörg lauk námi frá læknadeild Háskóla Íslands árið 2012 og hóf sérnám í heimilislækningum á HSN Sauðárkróki 2014. Hún hélt síðar til Svíþjóðar hvaðan hún lauk sérnámi árið 2020 og hefur síðan starfað þar á heilsugæslustöðvum sem heimilislæknir.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.