Stjórnarformaður Drangeyjarfélagsins gagnrýnir stjórnsýslu Umhverfisstofnunar
Viggó Jónsson, stjórnarformaður Drangeyjarfélagsins í Skagafirði, birti í gær færslu á Facebook þar sem hann furðar sig á vinnubrögðum Umhverfisstofnunar varðandi skipan í starfshóp sem vinnur við stjórnunar- og verndaráætlun lunda og fjallar því að hans sögn um mögulegt bann á sölu lunda. „Ég tel skipan starfshópsins fáránlega stjórnsýslu og augljóst að markmiðið er skýrt og niðurstaðan ákveðin fyrirfram,“ segir Viggó í færslunni.
Hann er að sjálfsögðu ekki hlutlaus sjálfur, enda kemur fram í færslunni að markmið Drangeyjarfélagsins sé m.a. að viðhalda veiðiskap í Drangey. Hann segir hins vegar að Umhverfisstofnun hafi það að markmiði að hafa gott samráð við hagsmunaaðila – hverjir sem það nú eru.
Hann telur upp að í starfshópnum sé einn skotveiðimaður, þrír aðilar frá Umhverfisstofnun, einn frá Náttúrustofu Suðurlands, tveir frá Fuglavernd, einn frá Náttúrustofnun Íslands, einn aðili er í hópnum frá háskóla í Danmörku og Umhverfis-, orku- og loftslagsráðuneytið tilnefnir einn aðila. „Nú er spurt; hvaða hagsmunaaðilar eru þetta?“ spyr Viggó og finnst augljóslega undarlegt að svo virðist sem lundaveiðimenn teljist ekki til hagsmunaaðila og enginn vilji virðist til að hlusta á þeirra hugmyndir eða skoðanir.
„Ég er ekki viss um að skotveiðimenn skjóti mikið af lunda, ég fullyrði að það er ekki gert hér í Skagafirði,“ segir Viggó um leið og hann veltir fyrir sér hvers má vænta af fulltrúum Fuglaverndar í starfshópnum. „Það eru til víða um land veiðifélög sem stunda háfaveiði og mér finnst nú lágmark að fá sjónarmið þeirra á þetta borð,“ bætir hann við.
„Vera má að það sé góð stjórnsýsla að ganga fram hjá þeim veiðimönnum sem þekkja hvað best til atferlis lundans og hafa með eigin augum í áratugi séð viðkomu hans á þeim stöðum sem þeir veiða. Hnignun stofnsins á einu svæði, vegna fæðuskorts, þýðir ekki að stofninn standi [illa] á öðrum svæðum,“ segir Viggó fyrir hönd Drangeyjarfélagsins í færslunni og klikkir út með því að tjá Feyki að sér finnist algjörlega út í hött hvernig menn haga sér.
Þess má geta að Viggó fullyrðir að lunda hafi farið fjölgandi í Drangey.
Fleiri fréttir
-
Gjöf foreldrafélagsins til Leikskóla Húnabyggðar
feykir.is Austur-Húnavatnssýsla, Mannlíf 19.05.2024 kl. 11.27Á dögunum afhenti Foreldrafélag Leikskóla Húnabyggðar leikskólanum að gjöf tvær barnakerrur fyrir 4-6 börn. Í tilkynningu frá Foreldrafélagi Leikskóla Húnabyggðar segir að hugmyndin sé að þær nýtist sérstaklega yngstu deild leikskólans sem nú er til húsa við Húnabraut 6 og auðveldi þannig heimsóknir þeirra upp í aðalbyggingu leikskólans. Ein 6-barna kerra hefur nú þegar verið afhent og von er á annarri 4-barna kerru í sendingu á komandi vikum.Meira -
„Get talað endalaust um kaffi“
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 19.05.2024 kl. 09.00Vala tekur á móti blaðamanni Feykis á heimili sínu, Páfastöðum 2 í Skagafirði, þar sem þær Vala Stefánsdóttir og Rannveig Einarsdóttir hafa búið sér fallegt heimili og eru langt komnar með að útbúa litla kaffibrennslu í skúrnum sem á sumum heimilum er byggður fyrir bíla. Vala hefst strax handa við að útbúa kaffi handa blaðamanni, sem er venjulegur leikmaður þegar kemur að kaffi – kaupir Grænan Braga í búðinni og hellir upp á kaffi í venjulegri kaffivél og hellir því svo á brúsa, drekkur það svo svart og sykurlaust. Það er ekki ferlið sem Vala tekur blaðamanninn með sér í. Hún byrjar á að setja kaffibaunir í kvörn, sem koma frá samnefndu fyrirtæki, Kvörn, sem Vala er hluthafi í. Hún hellir „upp á gamla mátann“ eins og blaðamaður hefur heyrt sagt um aðferðina hennar Völu. Hún malar kaffið í kvörninni og hellir svo soðnu vatni yfir það. Það er kúnst, því bleyta þarf fyrst upp í öllu kaffinu og hægt er að segja til um ferskleika kaffisins eftir loftbólumynduninni þegar vatnið fer yfir kaffið. – Það er vel hægt að fullyrða að fyrir Völu er kaffi ekki bara kaffi.Meira -
Lagfæringar á gervigrasvellinum komnar á fullt
feykir.is Skagafjörður, Íþróttir 18.05.2024 kl. 22.12Það horfir til betri vegar á gervigrasvellinum á Króknum en hann varð fyrir skemmdum fyrir um fjórum vikum síðan í all harkalegum vorleysingum. Viðgerðir hófust í gærmorgun en í frétt á síðu Skagafjarðar segir að á meðan á viðgerðum stendur verður hluta vallarins lokað en hægt verður að æfa á þeim hluta sem ekki varð fyrir skemmdum.Meira -
Útboð á nýrri leikskólabyggingu Húnabyggðar
feykir.is Austur-Húnavatnssýsla 18.05.2024 kl. 21.35Húnabyggð óskar eftir tilboðum í uppsetningu og afhendingu á ca. 650-700 m2 leikskóla úr húseiningum, timbur- eða gámaeiningum til leigu á lóð við hlið núverandi leikskóla að Hólabraut 17 með kaupsréttarákvæðum. Í byggingunni verða fjórar leikskóladeildir.Meira -
Stólastúlkur dottnar út eftir hörkuleik gegn sameinuðum Akureyringum
feykir.is Skagafjörður, Íþróttir 18.05.2024 kl. 16.12Tindastóll og Þór/KA mættust á Dalvíkurvelli í hádeginu í dag í fyrsta leiknum í 16 liða úrslitum Mjólkurbikars kvenna. Nokkur vindur var og einstaka slyddubakki gekk yfir Eyjafjörðinn meðan á leik stóð og lék vindurinn nokkuð hlutverk í því hvernig leikurinn þróaðist. Öll mörkin komu í fyrri hálfleik og leiddu gestirnir í Þór/KA 1-2 í hálfleik en ekki tókst liðunum að skora í þeim síðari þrátt fyrir sénsa á báða bóga.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.