Ljósmyndavefur

Síðasta sunnudag var Sæluvika Skagfirðinga sett með pompi og prakt, og endaði dagurinn venju samkvæmt á frumsýningu Sæluvikuleikrits Leikfélags Sauðárkróks. Sæluvikustykkið þetta árið er Fylgd – frumsamið leikrit eftir hann Guðbrand okkar Ægi Ásbjörnsson sem við Sauðárkróksbúar getum stolt sagt að við „eigum“. Það hefur náttúrulega verið í almannavitund í mörg ár að maðurinn er einn af auðlindum okkar Skagfirðinga, og olli hann svo sannarlega ekki vonbrigðum með þessu verki!

Það var hörkuleikur í úrslitum C riðli Lengjubikars kvenna á Sauðárkróksvelli sl. sunnudag þegar stelpurnar í Tindastóli tóku á móti Þrótturum úr Reykjavík. Leikurinn endaði 4-4 og því var strax í vítaspyrnukeppni til að ná fram úrslitum og þar komust Stólar yfir á ný þegar ein gestanna skaut í þverslá. Þá þurftu Stólar að nýta sínar spyrnur en eins og áður var lukkan ekki með þeim því tvær spyrnanna fóru forgörðum og Þróttarar fögnuðu sigri.

Sæluvika Skagfirðinga var formlega sett í Safnahúsi Skagfirðinga á Sauðárkróki í dag að viðstöddum fjölda gesta. Regína Valdimarsdóttir, forseti sveitarstjórnar Svf. Skagafjarðar sagði frá sinni upplifun af hátíðinni sem nýlegum íbúa samfélagsins en hún flutti á Krókinn um jólin 2016.

Fullt var út úr dyrum á Mælifelli á Sauðárkróki í gærkvöldi þegar „gömlu góðu söngkonurnar“ voru heiðraðar á tónleikunum Út við himinbláu sundin. Flutt voru þekkt lög sem eiga það sameiginlegt að konur gerðu þeim skil fyrr á árum eins og Svanhildur Jakobs, Erla Þorsteins, Erla Stefáns, Hallbjörg Bjarna, Adda Örnólfs, Soffía Karls, Helena Eyjólfs, Mjöll Hólm og fleiri.

Um leið og ég frétti að Leikflokkur Húnaþings vestra ætlaði að setja söngleikinn Hárið á svið var ég staðráðin í að láta þessa sýningu ekki framhjá mér fara. Enda hef ég verið mikill aðdáandi að söngleiknum til margra ára, horfði á kvikmyndina oft og ítrekað á táningsárunum og hef í ófá skipti sungið hástöfum með stórkostlegri tónlistinni úr söngleiknum við hin ýmsu tilefni. Söngleikurinn er eftir Gerome Ragni og James Rado, kvikmyndahandrit eftir Michael Weller en íslensk leikgerð er eftir félagana Baltasar Kormák og Davíð Þór Jónsson.

Kaupfélag Skagfirðinga fagnar 130 ára afmæli um þessar mundir en það var stofnað á Sauðárkróki þann 23. apríl árið 1889 þegar tólf menn úr Skagafirði og Bólstaðarhlíðarhreppi komu saman í þeim tilgangi að stofna til þessa félagsskapar.

Mikið var um dýrðir um síðustu helgi þegar nýtt fjós var tekið í notkun af Hofdalabúinu ehf. á bænum Syðri Hofdölum í Viðvíkursveit. Eigendur að Hofdalabúinu ehf. eru hjónin Trausti Kristjánsson og Ingibjörg Aadnegard, sonur þeirra Atli Már Traustason og kona hans, Klara Helgadóttir, en auk þeirra starfa þau Friðrik Andri Atlason, Lilja Dóra Bjarnadóttir, Aníta Ýr Atladóttir og Trausti Helgi Atlason við búið.

Í dag frumflytja nemendur 10. bekkjar Árskóla ævintýrið um konung ljónanna þar sem segir frá Simba og vinum hans. Eins og margir vita þráir Skari, föðurbróðir hans, völd og verður uppvís að miklum pólitískum undirróðursklækjum og kemur öllu konungsríkinu í miklar hremmingar. En spurningin er alltaf sú, tekst Simba að snúa heim úr útlegðinni og öðlast krúnuna sem hann sannarlega á tilkall til. Sýnt verður alla daga í Bifröst fram á sunnudag.

Feyki bárust nokkrar skemmtilegar stemningsmyndir úr Skagafirði frá Jóni Herði Elíassyni á Sauðárkróki. Minna þær okkur á að stutt er til vorsins með birtu og yl.

Karlakórinn Heimir er á faraldsfæti um þessar mundir. Á sunnudaginn var hélt kórinn tvenna tónleika, í Siglufjarðarkirkju og á Hofsósi og var aðsókn með ágætum. Efnisskrá tónleikanna var að hluta til afmælisdagskrá sem flutt var á síðasta ári í tilefni af 90 ára afmæli kórsins þar sem þeir Agnar Gunnarsson og Björn Björnsson röktu feril kórsins á gamansömum nótum og nokkrir kórfélagar ásamt leikurum úr Leikfélagi Hofsóss túlkuðu nokkur atriði úr sögu hans.