Fréttir

Himnastigi Húnabyggðar hefur verið reistur en um er að ræða ansi hreint magnaðan útsýnisstað á Skúlahóli í Vatnsdal. Af hólnum er gott úsýni yfir Flóðið, Jörundarfell og Vatnsdalshólana svo eitthvað sé nefnt en Skúlahóll má segja að sé suðaustastur Vatnsdalshóla á bakka Flóðsins og eini hóllinn sem er austan vegar.

Á fundi byggðarráðs Skagafjarðar, 12. júlí sl., lagði meirihluti byggðarráðs það til að sveitarstjóra verði falið að gera tillögu að stofnun fasteigna- og rekstrarfélags með aðkomu fleiri aðila, sem myndi hafa það að markmiði að auka skrifstofurými í Skagafirði.

Unadalur í austanverðum Skagafirði er ekki beinlínis í alfaraleið og alla jafna ekki margir sem hafa lagt leið sína þangað inn. Allt er þó breytingum háð og nú er komið visst aðdráttarafl í þennan fallega dal því fyrir rúmu ári opnaði Dalasetrið í fallegu umhverfi á Helgustöðum í Unadal fyrir gestum. Fyrir um mánuði var bætt um betur en eftir tveggja ára undirbúning var kaffihús opnað á staðnum og kallast Dalakaffi.

Í tilefni af 20 ára afmæli fornleifadeildar Byggðasafns Skagfirðinga eru allir boðnir velkomnir í Kotið í Hegranesi laugardaginn 15. júlí. Þar verður deildarstjóri fornleifadeildar Byggðasafnsins, Ásta Hermannsdóttir, ásamt teymi bandarískra fornleifafræðinga, og munu þau fræða gesti og gangandi um uppgröftinn.

Vegna viðhalds á dreifikerfi RARIK verður rafmagnslaust frá Gilslaug að Sólgörðum og út að Molastöðum í Fljótum fimmtudaginn 13. júlí frá kl 13:00-16:00.

Nú er unnið að dýpkun og landfyllingu við Sauðárkrókshöfn. Dagur Þór Baldvinsson, hafnarstjóri Skagafjarðarhafna, segir verkið skiptast í eftirfarandi verkhluta; gerð fyrirstöðugarðs innan hafnar og viðhaldsdýpkun innan hafnar.

Húnavökumótið í golfi verður haldið um helgina, laugardaginn 15. júlí, á Vatnahverfisvelli við Blönduós.

Í sumar eru liðin 40 ár frá því að Skagfirðingabúð fór að selja Skagfirðingum vörur en búðin opnaði þann 19. júlí árið 1983. Í tilefni af því verður blásið til grillveislu fyrir utan búðina laugardaginn 15. júlí frá kl. 13-15. Einnig verður hægt að gera kostakaup í búðinni á föstudag og laugardag því það verður 40% afsláttur af fatnaði, skóm, gjafavöru, leikföngum, búsáhöldum, garni, bókum, ritföngum og 10% afsláttur af raftækjum og matvöru.

Húnahornið segir af því að byggðarráð Húnaþings vestra fagni áformum Landsnets um að reisa 220 kV háspennulínu frá fyrirhuguðu tengivirki á Holtavörðuheiði að Blöndustöð. „Um er að ræða brýna framkvæmd sem eykur afhendingaröryggi og bætir aðgengi að orku í sveitarfélaginu sem hefur verið af skornum skammti um langt árabil. Aukið afhendingaröryggi og bætt aðgengi að orku í sveitarfélaginu er ein meginforsenda bættra búsetuskilyrða og atvinnuuppbyggingar,“ segir í umsögn ráðsins til Skipulagsstofnunar.

Opið kvennamót í golfi fór fram í blíðskaparveðri á golfvellinum í Vatnahverfi við Blönduós síðastliðinn sunnudag en mótið var haldið til minningar um Evu Hrund Pétursdóttir. Í frétt á Húnahorninu segir að 28 konur hafi mætt til leiks og var keppnisfyrirkomulagið punktakeppni með forgjöf í þremur flokkum.