A-Húnavatnssýsla

Í nýrri skýrslu frá efnahagssviði Samtaka atvinnulífsins um stöðu atvinnulífsins er lagt til að sveitarfélögum verði fækkað úr 74 í níu. Lagt er til að Norðurland vestra, frá vestanverðum Tröllaskaga að Borðeyri, verði eitt sveitarfélag. Vísir.is greindi frá þessu í dag.

Í tilefni af 50 ára afmæli Héraðsskjalasafns Austur-Húnavatnssýslu, mánudaginn 5. desember 2016, verður opið hús frá kl. 15-17 í húsnæði safnsins. Boðið verður upp á ljósmyndasýningu og skoðun á safninu. Kaffi og meðlæti og lifandi tónlist. Allir eru velkomnir.

Karólína í Hvammshlíð varð til þegar hin þýsk-ættaða Caroline Kerstin Mende festi kaup á eyðijörðinni Hvammshlíð á síðasta ári og breytti nafni sínu á Fésbókinni til samræmis við ný heimkynni. Aðkoma að bænum er frá Þverárfjallsvegi þar sem hann hæst stendur og skaflar loka fyrir umferð þegar þannig háttar veðri. Þegar blaðamaður Feykis fór þar um eitt sinn velti hann vöngum yfir því hvernig það væri að búa á slíkum stað, hvort ekki væri veður ill á vetrum með ófærð og tilheyrandi einangrun. Til að komast að því heimsótti hann húsfrúna einn dumbungsdag í nóvember, fékk kaffi og spurði hana út í hennar hugarefni.

Vinkonur Guðnýjar Ragnarsdóttur hafa síðan í vor staðið fyrir söfnun til styrktar Guðnýju Ragnarsdóttur og fjölskyldu hennar en Guðný berst við illkynja eitlakrabbamein. Söfnuninni lýkur á mánudaginn.

Í gær voru Landgræðsluverðlaunin 2016 afhent í Sagnagarði í Gunnarsholti og er það í 26. sinn sem Landgræðsla ríkisins þau eru veitt. Verðlaunahafar að þessu sinni voru annars vegar hjónin Ingimundur Sigfússon og Valgerður Valsdóttir á Þingeyrum og hins vegar Landgræðslufélag Hrunamanna.

Skipulags- umhverfis- og umferðarnefnd Blönduósbæjar hefur samþykkt endurskoðaða aðalskipulagstillögu er varðar æfinga- og keppnissvæði Skotfélagsins Markviss og verður hún send Skipulagsstofnun til áframhaldandi meðferðar.

Aðventuhátíð verður haldin í Blönduósskirkju fyrir allar sóknir Þingeyraklaustursprestakalls næstkomandi sunnudag, sem er sá annar í aðventu. Athöfnin hefst klukkan 16:00 og er lofað glæsilegri dagskrá í tali og tónum.

Sagt er frá því á vefsíðu Skagastrandar að Jónína Guðrún Valdimarsdóttir frá Kárastöðum, nú búsett á Skagaströnd, hafi orðið 100 ára í gær, 29. nóvember.

Hjónin Hjalti Jónsson frá Blönduósi og Lára Sóley Jóhannsdóttir héldu stofutónleika í Heimilisiðnaðarsafninu á Blönduósi á sunnudaginn var. Að sögn Láru Sóleyjar tókust tónleikarnir „ljómandi vel.“

Sagt er frá því á Húnahorninu að starfsemi Fjölritunarstofunnar Grettir sf. á Blönduósi verði hætt um áramót. Þar með verður útgáfu á auglýsinga- og sjónvarpsdagskránni Glugganum hætt, sem og annarri starsemi fyrirtækisins í núverandi mynd.