Sveitarstjóri Svf. Skagafjarðar sendir samúðarkveðjur til borgarstjóra Kongsberg

Frá Kongsberg í Noregi. MYND AF NETINU
Frá Kongsberg í Noregi. MYND AF NETINU

Fólki var brugðið í gærkvöldi þegar spurnir bárust af skelfilegum atburði í Kongsberg í Noregi, vinabæ Sveitarfélagsins Skagafjarðar, þar sem maður á fertugsaldri varð fimm manns að bana og særði tvo til viðbótar. Hann var handtekinn og hefur við yfirheyrslur játað sök að sögn lögreglunnar.

Þeir sem létu lífið í árásinni voru fjórar konur og einn karl og voru öll á milli fimmtugs og sjötugs. Fólkið skaut hann með boga og örvum. Maðurinn hafði áður komist í kast við lögin en hann er talinn hafa snúist til öfgahyggju. Lögreglan rannsakar málið sem hryðjuverk.

Á Facebook-síðu Sveitarfélagsins Skagafjarðar segir að Sigfús Ingi Sigfússon, sveitarstjóri, hafi í morgun „...komið á framfæri til borgarstjóra Kongsberg í Noregi, vinabæjar Skagafjarðar, innilegum samúðarkveðjum fyrir hönd íbúa Skagafjarðar til fjölskyldu og aðstandenda þeirra sem létust af völdum ódæðisverks sem framið var í borginni í gærkvöldi.“

Heimildir: Svf. Skagafjörður og mbl.is

Athugasemdir eru á ábyrgð þeirra sem þær skrá.

Feykir áskilur sér þó rétt til að eyða ummælum sem metin verða sem ærumeiðandi eða ósæmileg.

Smelltu hér til að tilkynna óviðeigandi athugasemdir.

Fleiri fréttir