Fréttir

Þann 19. janúar næstkomandi verða Mannamót Markaðsstofa landshlutanna haldin. Mannamót hafa vaxið mjög sem viðburður síðustu ár, eins og norðlensk ferðaþjónusta sem hefur alltaf verið áberandi á Mannamótum og vakið verðskuldaða athygli. Þar hefur sú samstaða sem hefur ríkt meðal norðlenskra ferðaþjónustu fyrirtækja skipt miklu máli. Samstaðan og slagkrafturinn hefur einnig skilað því að næsta sumar munu fjögur flugfélög bjóða upp á millilandaflug til Akureyrar. Þar býr að baki mikil vinna við markaðssetningu áfangastaðarins og ferðaþjónustunnar, og áherslan er sem áður á að efla ferðaþjónustu sem heilsárs atvinnugrein.

Næstkomandi sunnudag, þann 18. desember, verður haldið útgáfupartý í Listakoti Dóru Vatnsdalshólum í tilefni þess að Guðrún Ósk Aðalsteinsdóttir er að gefa út sína fyrstu bók Dagbók Drekagyðjunnar. Höfundurinn verður á staðnum og áritar bókina ef fólk vill og lesið verður partur úr sögunni um klukkan 15.

Stofnfundur nýs félags Harmonikufélagsins Grettis var haldinn í VSP húsinu á Hvammstanga 15. desember. Tilgangur félagsins er að kynna almenningi harmonikutónlist og gömlu dansana og efla tónlistarlíf á þessu sviði.

Í gærkvöldi var notaleg kvöldstund í útbænum á Króknum í boði Menningarfélags Gránu. Þá mætti Páll Snævar Brynjarsson í heimsókn í Gránu og rifjaði upp ævintýri og búðarrölt þar sem hann og Sverrir Björn Björnsson léku jólasveina í Aðalgötunni á aðventunni 1978. Segja má að aðsókn hafi farið fram úr björtustu vonum, veitingasalurinn í Gránu troðfullur, og margur gamall og genginn Króksarinn lifnaði við í hugum gesta þegar sögur voru rifjaðar upp og myndir sýndar á tjaldi.

Á vef Skagastrandar birtist vikulega mynd úr Ljósmyndasafni bæjarins og það eru margir sem hafa gaman að því að skyggnast aftur í tímann, sjá gömul og stundum kunnugleg andlit og lífið eins og það var. Eins og flestir hér á Norðurlandi vestra vita þá eru vegframkvæmdir milli Blönduóss og Skagastrandar og meðal annars verið að byggja brú yfir Laxá í Refasveit – þá þriðju frá upphafi. Það er því gaman að sjá mynd vikunnar að þessu sinni sem sýnir byggingu fyrstu brúarinnar.

Knattspyrnudeild Tindastóls hefur samið við tvo af máttarstólpum liðsins frá í sumar um að spila með Bestu deildar liði Stólastúlkna næsta sumar. Það eru þær Hannah Cade og að sjálfsögðu Muriel okkar Tiernan. Þetta hljóta að teljast hinar bestu fréttir enda eru undirbúningsmót fyrir komandi tímabil að rúlla af stað þessa dagana.

Gömlu góðu jólalögin verða flutt af vöskum söngvurum og hljóðfæraleikurum úr Skagafirði næstkomandi laugardagskvöld í Háa salnum í Gránu á Sauðárkróki. Að sögn Huldu Jónasar, tónleikahaldara, er um ljúfa tónleika að ræða þar sem þemað eru gömlu góðu jólalögin sem allir þekkja og hafa fylgt okkur í gegnum áranna rás.

Undirbúningur er í fullum gangi fyrir Jólahúna-tónleika þetta árið sem verða í Félagsheimilinu á Hvammstanga föstudagskvöldið 16. desember kl. 20:00 og í Blönduóskirkju sunnudaginn 18. desember kl. 17:00. „Um 60 manns koma að Jólahúnum þetta árið og eigum við von á frábærum tónleikum á báðum stöðum,“ sagði Elvar Logi Friðriksson, einn forsprakka Jólahúna, þegar Feykir leitaði frétta.

Nú er búið að loka sundlaugunum í Varmahlíð og á Sauðárkróki og lækka rennsli á íþróttavöllum en einnig hafa fyrirtæki með mikla notkun verið beðin um að spara heita vatnið eftir bestu getu. Á heimasíðu Skagafjarðarveitna segir að það dugi þó ekki til og nefna nokkur sparnaðarráð til heimila og fyrirtækja í kuldatíðinni sem nú ríkir.

Í dag, fimmtudaginn 15. desember verða sundlaugarnar í Varmahlíð og Sauðárkróki lokaðar en samkvæmt tilkynningu frá sveitarfélaginu verður sundlaugin á Hofsósi þó áfram opin. Um fyrirbyggjandi aðgerð er að ræða til að forgangsraða heitu vatni til heimila en mikið álag hefur verið á hitaveitukerfi Skagafjarðar vegna langvarandi kuldatíðar.