Kormákur Hvöt tryggði sér sæti í 2. deild
Það fór eins og allt benti til. Lið Kormáks Hvatar gerði sér lítið fyrir og tryggði sér sæti í 2. deild að ári sem er í fyrsta sinn sem sameinað lið félaganna spilar í þeirri deild. Í gær fengu Húnvetningar lið Augnabliks úr Kópavogi í heimsókn og þurftu stig til að tryggja farseðilinn upp um deild. Heimamenn voru komnir með tveggja marka forystu eftir 17 mínútur og unnu á endanum magnaðan 3-0 sigur og tryggðu sér þar með annað sætið í 3. deild. Til hamingju Kormákur Hvöt!
Leikurinn var aðeins níu mínútna gamall þegar Viktor Ingi Jónsson smellti vinsti fæti í boltann utan teigs og kom sínum mönnum í 1-0. Átta mínútum síðar var það Kristinn Bjarni Andrason sem bætti um betur og staðan 2-0 í hálfleik. Eftir 59 mínútna leik hljóp smá spenna í leikinn þegar Goran Potkozarac fékk að líta sitt annað gula spjald og heimamenn því orðnir einum færri. Gestunum tókst ekki að nýta sér það, enda við ofurefli að etja í marki Kormáks Hvatar þar sem fyrirliðinn stóð vaktina þriðja leikinn í röð. Ismael Moussa tryggði sér síðan markakóngstitil 3. deildar með því að gera þriðja mark heimamanna á 90. mínútu og gulltryggja stigin þrjú. Kappinn gerði 18 mörk í sumar.
Hreint út sagt frábær árangur hjá liði Húnvetninga sem var spáð hálfgerðum hrakförum fyrir tímabilið. Eftir nokkuð erfiða byrjun á mótinu og þjálfaraskipti hafa liðsmenn Kormáks Hvatar snúið bökum saman og horft einbeittir á silfurlænuna. Þeir áttu nokkur feilspor undir lok mótsins en náðu alltaf taktinum á ný og nú eru spennandi tímar framundan.
Það var lið Reynis úr Sandgerði sem endaði efst í deildinni með 47 stig en Sandgerðingar töpuðu þó í gær á heimavelli sínum gegn liði Árbæjar sem var eina liðið sem gat skákað liði Kormáks Hvatar hefðu Húnvetningar tapað í dag. Lið Kormáks Hvatar nældi í 45 stig í sumar en Árbæingar 42. Liðin sem féllu í 4. deild voru KFS frá Vestmannaeyjum og Ýmir úr Kópavogi.
Feykir sendir hamingjuóskir á liðs- og stuðningsmenn Kormáks Hvatar.
Fleiri fréttir
-
Blanda og Svartá til leigu frá og með sumrinu 2025
feykir.is Austur-Húnavatnssýsla 07.05.2024 kl. 19.52Húnahornið greinir frá því að laxveiðiárnar Blanda og Svartá hafi verið auglýstar til leigu frá og með sumrinu 2025. Einkahlutafélagið Starir er með vatnasvæðið á leigu í dag en núgildandi leigusamningur rennur út í haust. Því óskar Veiðifélag Blöndu og Svartár eftir tilboðum í leigu eða umboðssölu á öllum veiðirétti félagsins í laxveiðiánum frá og með sumrinu 2025 til og með 2029 með almennu útboði.Meira -
Sr. Guðrún Karls Helgudóttir næsti biskup Íslands
feykir.is Skagafjörður, Austur-Húnavatnssýsla, Vestur-Húnavatnssýsla, Fréttir 07.05.2024 kl. 15.15Nú liggur það ljóst fyrir hver verður biskup Íslands eftir síðari umferð biskupskosninganna lauk á hádegi í dag 7. maí og hlaut Sr. Guðrún Karls Helgudóttir flest atkvæði 1060 eða 52,19%. Sr. Guðmundur Karl Brynjarsson fékk 954 atkvæði eða 46,97%.Meira -
Katrín heimsækir Norðurland vestra
feykir.is Skagafjörður, Austur-Húnavatnssýsla, Vestur-Húnavatnssýsla, Mannlíf 07.05.2024 kl. 14.40Fyrstu kappræður þeirra tólf frambjóðenda sem stefna á Bessastaði fóru fram í Sjónvarpinu sl. föstudag og vöktu talsverða athygli og gott áhorf. Nú eru tæpar fjórar vikur til kjördags og því eru forsetaefnin komin á fulla ferð í eltingaleiknum um atkvæði kjósenda. Katrín Jakobsdóttir er mætt til leiks og er á ferð um landið en næstu tvo daga verður hún á Norðurlandi vestra; fundar á Blönduósi og Sauðárkróki miðvikudaginn 8. maí og á Hvammstanga degi síðar.Meira -
Hryllingsbúðin fer alveg að opna
feykir.is Skagafjörður, Austur-Húnavatnssýsla, Vestur-Húnavatnssýsla, Fréttir 07.05.2024 kl. 14.13Nú er útlit fyrir að að Litla hryllingsbúðin fari að opna. Stefnt er að frumsýningu föstudaginn 10. maí. Sýningin sem átti að fara fram miðvikudaginn 8. maí fellur hinsvegar niður.Meira -
Hópslysaæfing við Blönduós á laugardaginn
feykir.is Skagafjörður, Austur-Húnavatnssýsla, Vestur-Húnavatnssýsla, Mannlíf 07.05.2024 kl. 11.37Nú laugardaginn 11. maí verður haldin stór hópslysaæfing í umdæmi lögreglustjórans á Norðurlandi vestra. Fram kemur í tilkynningu á FB-síðu LNV að vettvangur æfingarinnar/slyssins verður ofan Blönduóss eða á gatnamótum Ennisbrautar og Neðribyggðarvegar. Af þeim sökum verður Ennisbraut lokuð við Mýrarbraut og Þverárfjallsveg frá kl.11:00 og fram eftir degi.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.