A-Húnavatnssýsla

Listamenn Listamiðstöðvar Textílseturs Íslands sem dvöldu í Kvennaskólanum á Blönduósi í apríl mánuði héldu listasýningu í Bílskúrsgalleríi þriðjudaginn 26. apríl sl. Sagt er frá sýningunni á Húnahorninu og þar er einnig að finna fleiri myndir sem teknar voru við þetta tilefni.

Nemendur í leiklistarvali í 8.-10.bekk í Höfðaskóla á Skagaströnd frumsýna í kvöld söngleikinn Mamma Mia í leikstjórn Ástrósar Elísdóttur. Sýningin, sem er ríflega klukkustundar löng, byggir á sama handriti og sú sem nú nýtur mikillar vinsælda á fjölum Borgarleikhússins. Er þar um að ræða glænýja og frábæra þýðingu Þórarins Eldjárn.

Stjórn Bændasamtaka Íslands skipaði á fundi þann 20. apríl síðastliðinn nýja stjórn RML en stjórnin hefur að mestu leyti verið óbreytt frá stofnun fyrirtækisins. Fyrirkomulagi varafulltrúa í stjórn var einnig breytt en fram til þessa hafa verið varamenn fyrir hvern og einn stjórnarmann. Nú verður því háttað þannig að varamenn verða tveir, 1. og 2. varamaður.

Aðalfundur Beint frá býli, félags heimavinnsluaðila fór fram 16. apríl sl. að Hraunsnefi í Borgarbyggð. Í upphafi fundar flutti gestur fundarins, Elfa Björk Sævarsdóttir frá Rauðabergi á Mýrum, stutt erindi um hugmynd sem hún er með og gengur út á að veita faglega aðstoð við uppsetningu á gæðakerfi í heimavinnslum. Elfa er matvælafræðingur að mennt og hefur unnið hjá Actavis síðustu 18 ár við gæðastjórnun.

Karlatölt Norðurlands fór fram á Hvammstanga á laugardaginn. „Var það samróma álit allra að mótið hefði verið hið glæsilegasta og sé algjörlega komið til þess að vera um ókomna tíð,“ segir á heimasíðu Hestamannafélagsins Þyts.

Vegagerðin stefnir að úrbótum á Blöndubrú í sumar þar sem tekin verður steypt stétt sunnan megin af brúnni og brúargólfið verður malbikað. Þá þarf að breikka veginn sitt hvoru megin við brúnna. Frá þessu er sagt á vefsíðu Blönduósbæjar.

Farskólinn hyggst bjóða upp á Matarsmiðju, námskeið í meðhöndlun matvæla með áherslu á kjötafurðir og vinnslu beint frá býli. Nemandi sem lýkur matarsmiðju hefur öðlast grunnfærni, leikni og öryggi í vinnubrögðum til að hann geti unnið að vöruþróun úr eigin afurðum í samræmi við lög og reglur.

Hand / work, eða Handa vinna, er sýning listamanna sem dvelja í Kvennaskólanum á Blönduósi sem haldin verður í Bílskúrs Gallerí að Árbraut 31 Blönduósi á morgun, 26. apríl, frá kl. 17 - 19. Allir eru boðnir velkomnir.

Það var margt um manninn í Hátæknimenntasetri Fjölbrautaskóla Norðurlands vestra síðastliðinn miðvikudag til að fylgjast með vígslu nýrrar Eldsmiðju í skólanum. Enda hefur hennar verið beðið með mikilli eftirvæntingu í 16 ár, að sögn Björns Sighvatz, kennari í málmiðngreinum við skólann. Þá hafa jafnvel nokkrir beðið þess að komast á námskeið í eldsmíði í tíu ár.

Fulltrúar fjarskiptasjóðs, nokkurra sveitarfélaga og innanríkisráðherra skrifuðu á miðvikudaginn undir samninga um styrki fjarskiptasjóðs fyrir uppbyggingu ljósleiðara í sveitarfélögunum til að efla fjarskiptasamband í dreifðum byggðum sem markaðurinn sinnir ekki.