Dagur atvinnulífsins á NV í dag

Dagur atvinnulífsins á Norðurlandi vestra verður haldinn í dag, miðvikudaginn 5. desember, í Kántrýbæ á Skagaströnd, kl. 14:00-17:00. Þetta er í fjórða sinn sem Samtök sveitarfélaga á Norðurlandi vestra standa fyrir Degi atvinnulífsins á starfssvæði sínu. Viðburðinum er ætlað að skapa vettvang til kynningar á starfsemi sem fram fer á svæðinu og umræðu um atvinnumál.

Dagskrá:

Kl.  14:00       Setning: Bjarni Jónsson, formaður SSNV

Kl.  14:10       Sveiflur í starfsmannaþörf. Árstíðabundin eftirspurn og aðlögun starfsemi og þjónustu.

Framsögu flytja: Ágúst Andrésson forstöðumaður Kjötafurðastöðvar KS, Jóhann Albertsson gestgjafi á Sveitasetrinu Gauksmýri og Friðrik Pálsson framkvæmdastjóri.

Kl. 15:30        Kynning á fyrirtækjum sem tilnefnd hafa verið til Hvatningarverðlauna SSNV atvinnuþróunar 2012.

Kl. 16:45        Vaxtarsamningur Norðurlands vestra 2011-1013. Katrín María Andrésdóttir, SSNV atvinnuþróun.

Kl. 16:55        Hvatningarverðlaun SSNV afhent.

Svo sem sjá má lýkur dagskránni með afhendingu Hvatningarverðlauna SSNV atvinnuþróunar. Verðlaunin eru í senn viðurkenning fyrir góðan árangur og  hvatning til áframhaldandi starfsemi viðkomandi fyrirtækis / félags / einstaklings.

Markmið verðlaunanna er að hvetja til nýsköpunar og vekja athygli á því sem vel er gert á Norðurlandi vestra.  Að þessu sinni er sjónum beint að fyrirtækjum og starfsemi í Austur-Húnavatnssýslu.

Úr hópi margra verðugra hafa eftirtaldir aðilar verið tilnefndir til verðlaunanna árið 2012.

• SAH Afurðir ehf var stofnað 1. janúar 2006. Fyrirtækið byggir á grunni Sölufélags Austur-Húnvetninga en fyrsta sláturhús þess félags var byggt á Blönduósi 1908. Helstu hluthafar eru Sölufélag Austur-Húnvetninga og Kjarnafæði. Markmið SAH Afurða er að veita bændum úrvalsþjónustu á samkeppnishæfu verði hvað varðar slátrun og sölu kjötafurða. Starfsmenn eru um 40 en fjölgar í um 130 manns í sláturtíð á haustin. Gert er ráð fyrir að haustið 2012 verði slátrað rúmlega 100 þúsund fjár.
• Ullarþvottastöð Ístex á Blönduósi tók til starfa árið 2004 en stöðin var flutt þangað frá Hveragerði. Ístex kaupir ullina beint frá bændum, hún er þvegin í þvottastöð Ístex á Blönduósi og er spunnin í band í spunaverksmiðjunni í Mosfellsbæ. Ullarþvottastöðin þvær alla þá ull sem til fellur á landinu eða um 1.000 tonn á ári. Að meðaltali starfa um 6-7 manns hjá stöðinni á ársgrundvelli.
• Sjávarlíftæknisetrið BioPol ehf var stofnað árið 2007 af Sveitarfélaginu Skagaströnd. Markmiðið með stofnun fyrirtækisins var að koma á fót þekkingarsetri þar sem rannsóknir á lífríki Húnaflóa væru í forgrunni. Árið 2010 tók fyrirtækið í notkun nýja og vel útbúna rannsóknastofu þar sem hægt er að vinna flestar þær rannsóknir sem í gangi eru. Hjá fyrirtækinu starfa nú níu manns í margvíslegum sjávarrannsóknum.
• Blöndubyggð ehf var stofnað árið 2007. Sama ár opnaði fyrirtækið veitingahús að Norðurlandsvegi 4 Blönduósi sem nú ber nafnið Potturinn Restaurant. Fyrirtækið rekur einnig Félagsheimili Blönduóss og kaffihúsið Við Árbakkann en þar er skólamötuneyti fyrir grunnskólanemendur. Í júní 2011 tók fyrirtækið í notkun Eyvindarstofu sem er til húsa á efri hæð veitingahússins Pottsins Restaurants. Starfsmenn eru 15-18 yfir sumarmánuðina en 7-8 að vetri til.
• Menningarfélagið Spákonuarfur var stofnað árið 2007. Markmið félagsins er  styrkja stöðu svæðisins á sviði menningar og ferðaþjónustu. Félagið hefur staðið fyrir og komið að ýmsum uppákomum á sviði menningar og sögu síðan það var stofnað. Félagið opnaði Spákonuhof þann 30. júní 2011 og er þar unnið með Þórdísi spákonu, sem uppi var á seinni hluta 10. aldar. Sama ár kom út bók um sögu Þórdísar spákonu. Einnig geta gestir látið spá fyrir sér í Spákonuhofinu.

Hefð er fyrir því að verðlaunagripurinn fyrir hvatningaverðlaunin sé unninn af listamanni á svæðinu. Að þessu sinni er það Erlendur F. Magnússon, listamaður á Blönduósi, sem hannar og smíðar gripinn. Erlendur er lærður húsasmiður en var einnig við nám í Handíða- og myndlistaskóla Íslands og hefur tekið þátt í nokkrum sýningum. Hann sinnti kennslu um árabil og var frumkvöðull að skákkennslu í grunnskólum.

Frá árinu 1984 hefur Erlendur unnið við fjölbreytt hönnunar-, útskurðar- og sérsmíðaverkefni á eigin verkstæði og við hönnun og byggingu húsa víða um land. Helstu verkefni hans eru: Safnahús, hótel og fl. við Geysi í Haukadal, Fjörukráin í Hafnarfirði, Eden í Hveragerði, Ásgarður við Hvolsvöll og Ingólfsskáli í Ölfusi. Þá hefur hann unnið við endurbætur gamalla húsa og fundið þeim nýtt hlutverk til framtíðar.