„Í raun eins og menn séu bara að bíða eftir því að tímabilið klárist“
Tindastólsmenn spiluðu í Grindavík í kvöld og töpuðu tólfta leiknum sínum í Dominos-deildinni en nú er aðeins ein umferð eftir í Dominos-deildinni. Grindvíkingarnir voru sterkara liðið í leiknum og leiddu nánast allan tímann. „Þetta var áframhald frá síðasta leik gegn Keflavík þar sem við erum bara flatir og í raun eins og menn séu bara að bíða eftir því að tímabilið klárist,“ sagði Baldur Þór, þjálfari Tindastóls, í samtali við Vísi að leik loknum. Lokatölur voru 93-83 fyrir heimaliðið.
Tomsick kom liði Tindastóls yfir, 5-7, eftir tæpar tvær mínútur en Kristinn Pálsson henti í þrist fyrir Grindvíkinga í kjölfarið og eftir það komst lið Tindastóls aldrei yfir í leiknum. Staðan var 27-22 að loknum fyrsta leikhluta og heimamenn voru öflugir í öðrum leikhluta, náðu mest 15 stiga forystu en staðan í hálfleik var 53-39. Tindastólsmenn gerðu atlögu að forystu Grindavíkur undir lok þriðja leikhluta og Tomsick minnkaði muninn í sex stig, 66-60, af vítalínunni og þannig var staðan þegar lokaleikhlutinn hófst. Stólarnir náðu ekki að fylgja þessum ágæta kafla eftir og munurinn á liðunum yfirleitt þetta 8-10 stig allt til leiksloka.
Tomsick var að vanda stigahæstur, gerði 23 stig, en nú gerðust þau undur og stórmerki að kappinn hitti engu 3ja stiga skoti þrátt fyrir sjö tilraunir. Nýting hans var stórfín innan teigs og þa var hann 7/7 af vítalínunni. Brodnik var með 17 stig og 7 fráköst, Whitfield 14 stig og tíu fráköst, Axel sett níu stig á töfluna og Pétur átta. Udras var enn og aftur slakur, tók að vísu fimm sóknarfráköst en aðeins tvö í vörn. Kazembe, Kristinn Páls, Óli Óla og Björgvin Hafþór áttu fínan leik í liði Grindavíkur.
Baldur Þór var ósáttur við sína menn í viðtali við Vísi að leik loknum eins og vitnað var til hér að framan. Þar sagði hann jafnframt: „Ég er mjög ósáttur með frammistöðuna í leiknum. Heilt yfir vorum við flatir varnarlega og það vantar allan takt í þetta. Ég efast um að nokkur maður geti litið í eigin barm og sagt að þetta hafi verið hans leikur. Það þarf að finna lausnir á þessu. Við höfum verið að gera ákveðna hluti vel, höfum verið í vandræðum sóknarlega tvo leiki í röð. Við þurfum að fara aftur í það sem við vorum að gera vel í þessum leikjum gegn Hetti, Þór Akureyri og Þór frá Þorlákshöfn þar sem við vorum að skora stig. Að sama skapi þurfum við að gera betur varnarlega í að átta okkur á aðstæðum og sjá þeirra hreyfingar fyrr í stað þess að bregðst við einni sekúndu of seint. Þá eru þeir að komast djúpt og við í vandræðum. Við þurfum klárlega að vera betri en þetta."
Hljómar eins og það sé bara eitt hjól undir bílnum og menn séu búnir að stökkva út löngu áður en sæluhúsið dúkkar upp.
Fleiri fréttir
-
Alvarleg vanræksla á nautgripum kærð til lögreglu
feykir.is Skagafjörður, Austur-Húnavatnssýsla, Vestur-Húnavatnssýsla 19.04.2024 kl. 10.05Í tilkynningu á vef Matvælastofnunar er greint frá því að MAST hafi kært til lögreglu alvarlega vanrækslu eftir að 29 nautgripir fundust dauðir í gripahúsi við eftirlit á lögbýli á Norðurlandi vestra. Í kjölfarið aflífuðu starfsmenn stofnunarinnar 21 grip til viðbótar á staðnum sökum slæms ástands, allt gripi sem voru hýstir í húsinu.Meira -
Nærandi ferðaþjónusta | Freyja Rut Emilsdóttir skrifar
feykir.is Skagafjörður, Aðsendar greinar 19.04.2024 kl. 09.03Nærandi ferðaþjónusta er hugtak sem fær sífellt meiri athygli í umræðunni bæði hér á Íslandi sem og um heim allan. Hugtakið felur í sér markvissar aðgerðir sem fólk og fyrirtæki geta gripið til með það að markmiði að hafa jákvæð áhrif á nærumhverfi og náttúru og skilja þannig við áfangastaðinn, samfélagið og náttúruna í betra ástandi en áður. Þannig er farið skrefi lengra en sjálfbærni þar sem markmiðið er að skilja ekki við umhverfið í verra ástandi en áður og ganga ekki á auðlindir framtíðar.Meira -
Liðsheildin skilaði þessum sigri - segir Helgi þjálfari
feykir.is Skagafjörður, Íþróttir 19.04.2024 kl. 03.09„Þessi leikur var mjög jafn og spennandi allan tímann, algjör naglbítur tveggja góðra liða sem bæði lögðu allt i að vinna,“ sagði Helgi þjálfari Margeirs þegar Feykir bað hann að lýsa leik Tindastóls og Snæfells í gærkvöldi. „Frábær stemning í húsinu en Snæfell var með flotta stuðningsmannasveit og Síkið vel mannað og stuðningsmannasveitin í essinu sínu,“ en samkvæmt leikskýrslu voru um 300 áhorfendur í húsinu sem gerist ekki á hverjum degi í kvennaboltanum.Meira -
Lið Tindastóls sló út Subway-deildar lið Snæfells
feykir.is Skagafjörður, Íþróttir 18.04.2024 kl. 22.53Það var gleði og gaman í Síkinu í kvöld en sennilega þó ekki síður stress og naglanögun fram á síðustu sekúndu framlengingar þegar Tindastóll og Snæfell mættust í fjórða leik einvígis síns um réttinn til að spila um sæti í efstu deild. Leikurinn var jafn og spennandi allan tímann en gestirnir náðu góðum kafla snemma í fjórða leikhluta, náðu 13 stiga forystu og virtust ætla að tryggja sér oddaleik í Stykkishólmi. Lið Tindastóls gafst ekki upp og náði að jafna í blálokin og tryggja sér framlengingu þar sem heimaliðið reyndist sterkara. Lokatölur 82-78 og rjúkandi stemning hjá Stólastúlkum.Meira -
Jordyn Rhodes komin með leikheimild
feykir.is Skagafjörður, Íþróttir 18.04.2024 kl. 18.42Tindastóll teflir fram liði í þriðja skipti í efstu deild kvennafótboltans eftir ansi gott tímabil síðastliðið sumar. Besta deildin hefst nú á sunnudag og þá kemur FH í heimsókn á Krókinn. Það vita allir að það er bara ein Murr en hún hefur nú skipt um heimavöll og spilar með Fram í sumar í Lengjudeildinni. Jordyn Rhodes tekur hennar stöðu í fremstu víglínu og eru miklar vonir bundnar við hana.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.