Stjörnumenn náðu í stigin í baráttuleik
Ekki tókst Tindastólsmönnum að ljúka fyrri umferðinni í Dominos-deildinni með því að stela tveimur stigum af Stjörnunni en liðin mættust í Mathús Garðabæjar-höllinni í kvöld. Leikurinn var raunar hin besta skemmtun, jafn og spennandi allt til loka en heimamenn höfðu betur, 98-93, og Stólarnir sitja því í áttunda sæti deildarinnar þegar seinni umferðin hefst í vikunni. Ekki alveg staðurinn sem Stólarnir stefndu á en svona er Ísland í dag – endalausir skjálftar.
Stjarnan náði fljúgandi starti og virtust ætla að moka yfir lið Tindastóls. Staðan var 14-2 eftir fjórar og hálfa mínútu en þá kom þristur frá Tomsick og smám saman réttu Stólar úr kútnum. Udras og Glover voru iðnir við kolann og þegar tæp mínúta var eftir jafnaði Brodnik af vítalínunni. Heimamenn voru þó yfir 25-22, þegar annar leikhluti hófst og þar var allt í járnum framan af. Stólarnir náðu góðum kafla um miðjan leikhlutann og komust fimm stigum yfir, 36-41, en pössuðu illa upp á boltann í næstu sóknum og heimamenn gerðu 12 stig í röð. Axel Kára kom með mikið hjarta til leiks og hann henti sér á alla bolta eins og hann ætti þá aleinn og barátta hans náði að smita samherjana sem fundu taktinn á ný. Staðan í hálfleik 50-47.
Tomsick kom Stólunum yfir á ný þegar tvær mínútur voru liðnar af seinni hálfleik en það eru ansi mörg vopn í búri heimamanna í Mathúshöllinni og þeir voru snöggir að kvitta fyrir sig og náðu yfirhöndinni í leiknum. Tómas Þórður smellti í þrist þegar tvær mínútur voru eftir af þriðja leikhluta og kom Stjörnunni tíu stigum yfir. Glover svaraði að bragði og hann setti sjö stig á töfluna áður en þriðji leikhluti var úti. Staðan 79-74. Tomsick hóf fjórða leikhlutann með þristi og ekki leið á löngu þar til Glover kom Stólunum stigi yfir, 81-82. Addú svaraði með þristi og enn og aftur náðu heimamenn að svara sterkt góðum kafla Stólanna. Þeir voru yfirleitt þetta fjórum til sjö stigum yfir á lokakaflanum en Glover hleypti spennu í leikinn með þristi þegar um 20 sekúndur voru eftir. Minnkaði muninn í þrjú stig, 96-93, en Mirza fór á vítalínuna þegar fimm sekúndur voru til leiksloka og þar var hann öryggið uppmálað og gulltryggði sigur Garðbæinga.
Sigurinn gat fallið hvorum megin sem var í kvöld en heimamenn reyndust sterkari. Tvo leikhluta vann Stjarnan með þriggja og tveggja stiga mun og tveir leikhlutar enduðu jafnir. Þannig að leikurinn vannst á smáatriðum. Í liði Tindastóls var Shawn Glover stigahæstur með 29 stig og hann tók átta fráköst. Þá var Brodnik öflugur með 25 stig, þar af 12 af vítalínunni, og hann tók sjö fráköst. Tomsick tók bara 18 skot í kvöld og skilaði 18 stigum, Udras byrjaði á bekknum og gerði 11 stig. Heimastrákarnir skutu lítið í leiknum og skiluðu samanlagt aðeins tíu stigum en betur má ef duga skal. Austin Brodeur var stigahæstur í liði Stjörnunnar með 19 stig en fimm leikmenn í liði Garðbæinga gerðu tíu stig eða meira. Þeir tóku 49 fráköst á móti 41 frákasti Stólanna og þar á meðal voru 16 sóknarfráköst sem var blóðugt.
Næsti leikur Tindastóls er á fimmtudag en þá heimsækja strákarnir ÍR-inga í Breiðholtið og hefst leikurinn kl. 18:15. Nú er komin pínu pressa á okkar menn að fara að krækja í sigra. Deildin er skuggalega jöfn og hreint ekki ólíklegt að innbyrðis viðureignir komi til með að skipta miklu þegar talið verður upp úr kössunum. Áfram Tindastóll!
Fleiri fréttir
-
Umhverfisdagur FISK Seafood 2024
feykir.is Skagafjörður, Austur-Húnavatnssýsla, Vestur-Húnavatnssýsla, Fréttir 20.04.2024 kl. 00.12Umhverfisdagur FISK Seafood verður haldinn 4. maí nk. frá klukkan 10-12. Áætlað er að tína rusl á strandlengjunni á Sauðárkróki (sem verður skipt upp í svæði), Nöfunum, í Varmahlíð, á Hólum og á Hofsósi. Frá 12:15 mun FISK Seafood bjóða öllum þátttakendum að þiggja veitingar að Sandeyri 2.Meira -
Ævintýrið úti hjá liði Tindastóls
feykir.is Skagafjörður, Íþróttir 19.04.2024 kl. 23.34Strax í haust voru bara þrjú hjól undir bíl meistara Tindastóls og eftir það var nánast sama hvaða hindrun varð á vegi hans, það varð allt til að hægja ferðina. Hann hökti reyndar inn í bikarúrslit og í úrslitakeppnina þó með naumindum væri. Stólakagginn sem allir biðu eftir að hrykki í gírinn, kæmi sterkur inn á endasprettinum, var eiginlega hálf vélarvana allt tímabilið. Leikurinn í Smáranum í kvöld var reyndar góður en enn og aftur voru Stólarnir sjálfum sér verstir. Lokakarfan var Grindvíkinga og hún skipti sköpum – lokastölur 91-89. Stólarnir því snemma í sumarfrí þennan veturinn og kannski allir fegnir – þessi bíll þarf í allsherjar yfirhalningu.Meira -
Gul viðvörun á Norðurlandi vestra
feykir.is Skagafjörður, Austur-Húnavatnssýsla, Vestur-Húnavatnssýsla 19.04.2024 kl. 22.24Veðurstofan hefur smellt á okkur gulri veðurviðvörun mest allan laugardaginn og fram á aðfaranótt sunnudags. Gert er ráð fyrir ört hækkandi hita og því má búast má við miklum leysingum, auknu afrennsli og vatnavöxtum í ám og lækjum. Mikilvægt er að hreinsa frá niðurföllum til að forðast vatnstjón vegna rigningar og leysingavatns. Gula viðvörunin gildir fyrir Vestfirði og allt Norðurland.Meira -
Venju samkvæmt er Stólastúlkum spáð falli
feykir.is Skagafjörður, Íþróttir 19.04.2024 kl. 15.44Það eru nokkrir fjölmiðlar sem spá fyrir tímabilið í Bestu deild kvenna í knattspyrnu og jafnan er liði Tindastóls spáð falli, ýmist 9. eða 10. sæti. Í árlegri spá fyrirliða, þjálfara og forráðamanna er liðinu spáð níunda sæti en liði Keflavíkur því neðsta. Íslandsmeisturum Vals er aftur á móti spáð titlinum og Blikum öðru sæti. Grönnum okkar í Þór/KA er síðan spáð þriðja sætinu.Meira -
Við erum ótrúlega rík af fólki | LS Lulla í spjalli
feykir.is Skagafjörður, Listir og menning, Mannlíf 19.04.2024 kl. 14.40„Litla hryllingsbúðin er skemmtilega fjölbreytt verk með miklum söng og er skemmtileg dramatísk hrollvekja,“ segir Sigurlaug Dóra Ingimundardóttir (Lulla), formaður Leikfélags Sauðárkróks, þegar Feykir spyr hana hvað hún geti sagt um Sæluvikustykki LS þetta árið. Æfingar standa nú yfir en frumsýnt verður í Bifröst á Sauðárkróki sunnudaginn í Sæluviku en samkvæmt áreiðanlegum heimildum Feykis er hér um að ræða 146. sýningu Leikfélags Sauðárkróks frá því það var endurvakið árið 1941.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.