Rabb-a-babb 197: Lilja Hauks

Lilja Hauks. AÐSEND MYND

Nafn: Hugrún Lilja Hauksdóttir.
Árgangur: 1990.
Fjölskylduhagir: Sjálfstæð kona.
Búseta: Vesturbær Reykjavíkur.
Hverra manna ertu og hvar upp alin: Ég er yngsta dóttir Hauks og Línu á Deplum. Ég ólst upp í fallegri Stíflunni og mun ávallt búa að því.
Starf / nám: Margmiðlunarhönnuður & ljósmyndari í markaðsgeiranum.
Hvað er í deiglunni: Eldgos, vor og betra veður.

Rabbið:

Hvernig nemandi varstu? Skellihlægjandi fiðrildi sem krotaði í allar stílabækur.

Hvað er eftirminnilegast frá fermingardeginum? Ég fermdist 1. maí í Knappstaðakirkju og var eina fermingarbarnið í dalnum. Þann fallega vormorgun vöknuðu Fljótamenn við nýfallin snjó og var frekar napurt í óupphitraði kirkjunni svo spóaleggirnir í skrjáfþunnum fermingarkjólnum skulfu alla athöfnina.

Hvað ætlaðir þú að verða þegar þú yrðir stór? Mér datt í hug að verða Arkitekt einusinni.

Hvert var uppáhalds leikfangið þitt þegar þú varst krakki? Kristrún systir saumaði handa mér dúkku sem var jafn stór og ég á þeim tíma, hún hét Heiða og var mér einstaklega kær alla æskuna.

Besti ilmurinn? Lyktin af rúmfötunum þegar þau eru nýkomin af snúrunni.

Hvað varstu að hlusta á þegar þú fékkst bílprófið? Geggjuð spurning! Ég eignaðist hljómplötuna Tímarnir okkarmeð Sprengjuhöllinni á CD á þessum tíma, sá geisladiskur var spilaður hring eftir hring og er ennþá í miklu uppáhaldi.

Hvernig slakarðu á? Ég næ hvað mestri sálarró þegar ég týni tímanum við að skapa eitthvað nýtt.

Hverju missirðu helst ekki af í sjónvarpinu? Ég missi aldrei af skaupinu!

Besta bíómyndin? Forrest Gump, lífið er eitt stór súkkulaðibox.

Hvaða íþróttamanni hefurðu mestar mætur á? Aron Bjarki Jósepsson meistari, samstarfsfélagi og knattspyrnumaður í KR fær þennan titil.

Hvað gerir þú betur en allir aðrir á þínu heimili? Þar sem ég bý með sjálfri mér á ég í engum vandræðum með að vera besti fagurkerinn í kotinu.

Hvert er snilldarverkið þitt í eldhúsinu? Ég bý til alveg hreint framúrskarandi Lasagne.

Hættulegasta helgarnammið? Fjólublátt pottagull, þeir tengja sem tengja.

Hvernig er eggið best? Hleypt á toppnum á súrdeigsbrauði eins og Benedikt er þekktur fyrir.

Hvað fer mest í taugarnar á þér í fari þínu? Ég á það til að ofhugsa hluti.

Hvað fer mest í taugarnar á þér í fari annarra? Alls konar snobb, alltaf stemnings-morð.

Uppáhalds málsháttur eða tilvitnun? Þú ert vitund þín. Dýpsta vitund þín er vilji þinn. Vilji þinn skapar verk þín og verk þín skapa örlög þín. - Brihadaranyaka Upanishad IV.4.5

Hver er elsta minningin sem þú átt? Stofan á Syðri-Á, ég sat við hliðina á Nonna að spila á píanóið á meðan Abba frænka og mamma sötruðu kaffi inn í eldhúsi.

Þú vaknar einn morgun í líkama frægrar manneskju og þarft að dúsa þar einn dag. Hver værirðu til í að vera og hvað myndirðu gera? Ég væri til í vera Milly Bobby Brown í einn dag, leika í einni senu og fá mér svo tattoo.

Hver er uppáhalds bókin þín og/eða rithöfundur? Ljósmyndabækur eru mínir uppáhalds doðrantar og allt sem Ragnar Axelsson gerir er augnakonfekt.

Orð eða frasi sem þú notar of mikið? „Hvað eigum við að borða á eftir?“

Ef þú gætir farið til baka í tímann, hvert færirðu? Ég myndi endurupplifa fallegt sumarkvöld í sveitinni í heyskap með pabba, setjast við eldhúsborðið á Deplum eftir langan dag með bóndabrúnku og sólbrunnið nef og fá heimatilbúinn mjólkurhristing að launum.

Hver væri titillinn á ævisögu þinni? Tár, bros og hamingjan í öðru veldi.

Framlenging:

Ef þú gætir hoppað upp í flugvél og réðir hvert hún færi, þá færirðu... rakleiðis til Danmerkur og heilsa upp á fólkið mitt þar.

Nefndu eitthvað þrennt sem þér finnst þú mega til að gera áður en þú gefur upp öndina: Heimsækja Indónesíu,gefa út bók og halda listasýningu.