Nýr stígur upp á Nafir

Unnið við stígagerð. MYNDIR: Þ.HANSEN ehf.
Unnið við stígagerð. MYNDIR: Þ.HANSEN ehf.

Árvökulir Króksarar hafa efalaust tekið eftir að talsvert hefur verið framkvæmt til að fegra ásýnd bæjarins í sumar; blómaskrúð víða og aðgengi fyrir göngufólk bætt á Nöfum svo eitthvað sé nefnt og nú í síðustu viku var gerður stígur í Nafirnar frá neðra tjaldsvæði og upp á það efra – eða öfugt.

Það voru vaskir starfsmenn Þ. Hansen ehf. sem höfðu veg og vanda að stígagerðinni sem nánar tiltekið liggur frá Flæðunum og upp á nýjan göngustíg á Nöfunum sem er lagður í gamla kindagötu.

Það styttist í Króksmót og þá hefur jafnan verið mikið rölt á fólki upp og niður Nafirnar og kannski ekki allir jafn liprir í brekkunni og stígagerð því í raun öryggisatriði.

Það má sjá á samfélagsmiðlum að ekki eru allir á eitt sáttir við framkvæmdina. Sumum finnst stígurinn eyðileggja ásýnd Nafanna, aðrir hafa áhyggjur af vatnsrennsli og því hvernig gengið verður frá stígnum og hvort hlaðið verður meðfram sárinu líkt í Kirkjustígnum góða. Svo finnst öðrum stígurinn hið besta mál.

Myndirnar sem hér fylgja eru af FB-síðu Þ.Hansen ehf.

Fleiri fréttir