Stólarnir tryggðu sér sæti í úrslitum VÍS bikarsins með góðum leik
Það hefur verið talsvert mótlæti sem Íslandsmeistarar Tindastóls hafa mátt stríða við á þessu tímabili. Hver brekkan hefur tekið við af annarri og flestar hafa þær verið upp í móti. Eftir dapran leik gegn Þórsurum fyrir viku beið Stólanna erfitt verkefni í undanúrslitum VÍS bikarsins þegar liðið mætti Álftanesi í Laugardalshöllinni. Strákarnir sýndu þó að það er enn neisti í liðinu og endurkoma Arnars eftir meiðsli blés heldur betur lífi í glæðurnar. Niðurstaðan varð bísna öruggur sigur Tindastóls eftir skemmtilegan leik þar sem liðið sýndi gamla meistaratakta og tryggði sér úrslitaleik gegn Keflvíkingum á laugardag.
Jafnræði var með liðunum framan af leik en Arnar og Tóti, sem byrjuðu á bekknum, hleyptu upp orkustigi Stólanna sem náðu sex stiga forskoti fyrir lok fyrsta leikhluta, staðan 17-23. Okkar menn gerðu síðan átta fyrstu stig annars leikhluta og náðu undirtökunum í leiknum. Fáir virtust klárir í slaginn í sóknarleik Álftnesinga og það var helst fyrir tilstilli Dúa og Giga að Stólarnir stungu ekki af en þeir náðu mest 15 stiga forystu upp úr miðjum leikhlutanum, 27-42. Staðan í hálfleik var 39-51.
Álftnesingur náðu að stilla saman strengi sína yfir te og rist og komu að meiri krafti til leiks í þriðja leikhluta. Þeir náðu að gera Stólunum erfiðara fyrir og smám saman dró saman með liðunum. Þegar rúm mínúta var eftir af leikhlutanum var munurinn kominn í tvö stig og einhverjir stuðningsmenn hafa sjálfsagt verið farnir að óttast hið versta. Það reyndist óþarfi því Tindastólsmenn mættu tvíefldir til leiks í lokafjórðunginn, gerðu 14 fyrstu stigin og Álftnesingar komust ekki á blað fyrr en leikhlutinn var hálfnaður og þá voru þeir þegar komnir í örvæntingarfasann sem sjaldnast gefur. Þeir náðu mest að minnka muninn í ellefu stig, 72-83, þegar tvær og hálf mínúta var til leiksloka en fleiri stig settu þeir ekki á töfluna.
Arnar var í gleðigírnum í gær og ekki laust við að það hafi smitað út frá sér. Hann var stigahæstur Stólanna með 22 stig en næstur honum kom Tóti, sem sömuleiðis átti toppeik, með 18 stig og hirti að auki tólf fráköst. Lawson gerði 13 stig, Woods 11 og Drungilas 10. Í liði Álftaness var Giga stigahæstur með 24 stig en hann gerði fimm 3ja stiga körfur í fimm skotum. Tölfræði Stóanna hvað varðar skotnýtingu og fráköst var töluvert betri en hjá andstæðingunum og nánast furða að sigurinn hafi ekki orðið stærri.
Í hinum undanúrslitaleiknum unnu Keflvíkingar öruggan sigur á Stjörnunni og mæta því liði Tindastóls í úrslitaleik í Laugardalshöllinni kl. 16 á laugardaginn. Stemningin Stólamegin í stúkunni var frábær í gær og verður örugglega ekki síðri í úrslitaleiknum. Áfram Tindastóll!
Fleiri fréttir
-
Grunnskólinn austan Vatna komst bara víst í úrslit í Skólahreysti
feykir.is Skagafjörður, Íþróttir 01.05.2024 kl. 18.05Eitthvað klikkuðu reikningskúnstir Feykis í nótt þegar birtar voru niðurstöður í Skólahreysti. Þá var nánast fullyrt að Grunnskólinn austan Vatna í Skagafirði hefði naumlega orðið af sæti í úrslitum keppninnar skemmtilegu – en viti menn; í hádeginu í dag var tilkynnt á Facebook-síðu Skólahreysti að Grunnskólinn austan Vatna hefði sannarlega tryggt sér sæti í úrslitunum. Norðurland vestra er því með þrjá skóla af tólf í úrslitum Skólahreysti og ef það var snilld að eiga tvo skóla af tólf miðað við höfðatölu í nótt hversu geggjað er þá að eiga þrjá skóla í úrslitunum!?Meira -
Hermann Sæmundsson ráðuneytisstjóri fylgir Sigurði Inga sem skugginn
feykir.is Skagafjörður, Mannlíf 01.05.2024 kl. 14.00Fjármála- og efnahagsráðherra, innviðaráðherra og Skagfirðingurinn Hermann Sæmundsson hafa gert með sér samkomulag um flutning Hermanns í embætti ráðuneytisstjóra fjármála- og efnahagsráðuneytisins og mun hann taka við frá og með 1. maí 2024. Hemmi Sæm, sem er sonur heiðurshjónanna Sæmundar Hermannssonar frá Ysta-Mói í Fljótum og Ásu Helgadóttur, sem bæði eru látin, er alinn upp á Skagfirðingabrautinni á Króknum.Meira -
Grillaður fiskur og tiramisu
feykir.is Skagafjörður, Austur-Húnavatnssýsla, Vestur-Húnavatnssýsla, Í matinn er þetta helst, Lokað efni 01.05.2024 kl. 12.40Matgæðingar vikunnar í tbl 24 í fyrra voru Ágúst Andrésson, þá forstöðumaður Kjötafurðastöðvar KS, og Guðlaug Kristín Pálsdóttir, sérfræðingur á Brunavarnasviði HMS. Ágúst og Guðlaug búa saman á Sauðárkróki og er Gústi borinn og barnfæddur í Skagafirði, nánar tiltekið á Bergstöðum, en Gulla ólst upp í Reykjavík og fluttist á Sauðárkrók í miðju Covid árið 2020. Þau erum eigendur að Norðar ehf. sem m.a. flytur inn vín frá Moldóvu og Ítalíu og hafa einnig staðið í eigin veitingarekstri og hafa mjög gaman af því að ferðast og borða góðan mat.Meira -
Litla hryllingsbúðin enn lokuð vegna veikinda!
feykir.is Skagafjörður, Listir og menning 01.05.2024 kl. 10.29Í gær tók Leikfélag Sauðárkróks stöðuna varðandi sýningarhald á Litlu hryllingsbúðinni en eins og áður var greint frá í Feyki varð að fresta frumsýningu sl. sunnudag vegna veikinda í leikhópnum. Því miður reyndist staðan þannig að fyrirhugðum sýningum á miðvikudag og föstudag hefur nú verið frestað um óákveðin tíma.Meira -
Úrslit í Vísnakeppni Safnahúss Skagfirðinga
feykir.is Skagafjörður, Aðsendar greinar, Listir og menning 01.05.2024 kl. 09.22Við setningu Sæluviku Skagfirðinga þann 28. apríl sl. voru að venju birt úrslit í vísnasamkeppninni, okkar árlega viðburði, vonandi verður keppnin haldin um ókomin ár. Markmiðið er að fá fólk til að botna fyrirfram gefna fyrriparta og einnig að yrkja vísu eða vísur um líflegt og litríkt forsetaframboð, hafa aldrei fyrr verið jafn margir til kallaðir á þeim vettvangi mun það verðugt rannsóknarefni. Þátttaka í keppninni var nokkuð góð, alls bárust okkur svör frá tíu hagyrðingum.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.