Arinbjörn Jóhannsson á Brekkulæk látinn
Arinbjörn Jóhannsson, ferðabóndi á Brekkulæk í Miðfirði, lést á Heilbrigðisstofnun Vesturlands á Hvammstanga 29. október síðastliðinn, 76 ára að aldri. Arinbjörn fæddist 5. mars árið 1950 og ólst upp á Brekkulæk. Foreldrar hans voru Jóhann Frímann Sigvaldason, kennari og bóndi á Brekkulæk, og Sigurlaug Friðriksdóttir húsfreyja.
Eftir stúdentspróf frá Menntaskólanum á Akureyri hélt Arinbjörn til Þýskalands og stundaði nám fyrst í Freiburg en síðan í Köln. Þar lagði hann stund á mannfélagsfræði, auk leikhús-, sjónvarps- og kvikmyndafræði.
Heim kominn 1978 tók hann að bjóða þýskumælandi ferðamönnum upp á hestaferðir á Arnarvatnsheiði þar sem gist var í gangnamannaskálum og silungur veiddur til matar. Fyrstu árin hafði þessi útgerð aðsetur á eyðibýlinu Aðalbóli í Miðfirði. Stofnaði hann ferðaskrifstofuna Ferðir/Erlebnistouren árið 1979 og ásamt fyrri sambýliskonu sinni, Gudrun M.H. Kloes, byggði hann upp fæðingarbæ sinn á Brekkulæk og breytti honum í notalegt gistihús.
Þaðan rak hann í nær hálfa öld öfluga ferðaþjónustu með hestaferðum vítt og breitt um Norður- og Vesturland, með gönguferðum yfir Arnarvatnsheiði, hjólreiðaferðum og náttúruskoðunarferðum um Vesturland og miðhálendið auk hringferða um Ísland. Í samstarfi við Ferðafélag Íslands skipulagði hann söguferðir um héraðið.
Arinbjörn lagði ríka áherslu á að nýta nærumhverfið í Húnaþingi vestra og var frumkvöðull í sinni heimabyggð á sviði ferðaþjónustu. Hann var einn af stofnendum Ferðaþjónustu bænda.
Undanfarin 25 ár var eftirlifandi eiginkona hans, Claudia Hofmann, hans nánasti samstarfsmaður og stýrði gistihúsinu á Brekkulæk. Arinbjörn lætur eftir sig þrjú börn og þrjú barnabörn.
/Texti úr Morgunblaðinu
Fleiri fréttir
-
Hátíðarhöld á Blönduósi laugardaginn 7. Nóvember
feykir.is Austur-Húnavatnssýsla, Mannlíf 06.11.2026 kl. 09.30Um þessar mundir er þess minnst að 150 ár eru síðan verslun hófst á Blönduósi og í kjölfarið fór að myndast þéttbýliskjarninn sem við þekkjum í dag. Af þessu tilefni verður blásið til veislu á Blönduósi í félagsheimilinu þar sem afmælisins verður minnst með ræðum og söng. Forseti Íslands, frú Halla Tómasdóttir mun heiðra samkomunna og einnig mun hún formlega afhjúpa minnisvarða um Bríeti Bjarnhéðinsdóttur en Kvennréttindafélag Íslands gefur minnisvarðann.Meira -
Stólarnir sóttu góðan sigur austur á Hérað
feykir.is Skagafjörður, Íþróttir, Lokað efni 06.11.2026 kl. 09.07Héraðsbúar þyrptust í Varðarhöllina á Egilsstöðum í gærkvöldi til að berja augum sína menn í Hetti takast á við lið Tindastóls í fimmtu umferð Bónus deildar karla í körfubolta. Vel á sjötta hundruð áhorfendur hvöttu Hattarmenn til dáða en þegar upp var staðið unnu gestirnir úr Skagafirði nokkuð öruggan sigur þó heimamenn hafi náð að hleypa smá spennu í leikinn á lokakaflanum. Lokatölur 73-80.Meira -
Húnavallaleið ekki á aðalskipulagi Húnabyggðar
feykir.is Skagafjörður, Austur-Húnavatnssýsla, Vestur-Húnavatnssýsla, Lokað efni 05.11.2026 kl. 15.53Húnavallaleið, sem myndi stytta hringveginn um 14 kílómetra, er ekki í nýju aðalskipulagi Húnabyggðar. RÚV.is segir í frétt að Svavar Pálsson sveitarstjóri viðurkenni að það geti torveldað framkvæmdir við veginn í framtíðinni. Margoft hefur komið fram að Húnvetningar eru ekki spenntir fyrir þessari styttiingu sem þýddi að þjóðvegur 1 færi ekki um Blönduós.Meira -
Vinnustaðaklasinn í frystihúsinu á Hofsósi hlaut styrk
feykir.is Skagafjörður 05.11.2026 kl. 13.57Eyjólfur Ármannsson innviðaráðherra hefur úthlutað rúmum 27 milljónum kr. í styrki til 14 verkefna til að styðja við uppbyggingu vinnustaðaklasa á landsbyggðinni. Styrkirnir eru veittir á grundvelli byggðaáætlunar. Markmiðið er að fjölga atvinnutækifærum og auka fjölbreytileika starfa á landsbyggðinni. Eitt verkefni á Norðurlandi vestra hlaut styrk en vinnustaðaklasinn í gamla frystihúsinu á Hofsósi fékk úthlutað fjórum milljónum í flokknum Ný uppbygging á miðlungssvæði.Meira
