A-Húnavatnssýsla

Í dag er síðasta tækifæri að skrá sig á Samgönguþing MN sem haldið verður í Hofi á morgun. „Við hvetjum alla til að nota tækifærið, hlusta á fróðleg erindi og taka þátt í umræðum,“ segir í fréttatilkynningu. Fundarstjóri er Arnheiður Jóhannsdóttir, framkvæmdastjóri Markaðsstofu Norðurlands.

Fyrsta mót KS-Deildarinnar verður haldið næstkomandi miðvikudagskvöld í Svaðastaðahöllinni á Sauðárkróki og hefst kl 19:00. Keppt verður í fjórgangi. „Mikil eftirvænting er fyrir þessu fyrsta keppniskvöldi KS-Deildarinnar. Mikið hefur verið um æfingar í Svaðastaðahöllinni að undanförnu og ljóst að liðin leggja mikið undir,“ segir í fréttatilkynningu frá Meistaradeild Norðurlands.

Suðvestan ofsaveður er fram undir kl. 09 til 10 á Vestfjörðum og vestantil á Norðurlandi, en dregur smám saman úr vindi með morgninum, sunnan 8-15 annað kvöld. Frost 1 til 6 stig. Á Norðurlandi er hálka á flestum vegum og víðast hvar mjög hvasst. Ófært er á Öxnadalsheiði.

Nokkrar tillögur Norðvesturnefndarinnar svokölluðu voru samþykktar af Ríkisstjórn í desember sl. Að sögn Arnars Þórs Sævarssonar bæjarstjóra á Blönduósi var mikil samstaða á svæðinu um að koma þessum tillögum til leiðar og að þakka beri Norðvesturnefndinni, með Stefáni Vagni Stefánssyni í broddi fylkingar, fyrir þá vinnu. „Varðandi Blönduósbæ þá tókum við afstöðu til þess að miða í rauninni við að styrkja það sem fyrir er, við töldum það vænlegt til árangurs,“ sagði Arnar í viðtali við Feyki sem kom út sl. fimmtudag.

Unglingadeildin í Höfðaskóla er óðum að spjaldvæðast og samkvæmt vef Svf. Skagastrandar nú er svo komið að flestir unglinganna koma í skólann með sínar eigin spjaldtölvur. Foreldrafélag skólans ásamt sveitarstjórn Skagastrandar tóku þá ákvörðun að styrkja nemendur um 50% af kaupvirði spjaldtölvu (að hámarki 50.000) og varð sú ákvörðun til þess að flestir nemendur hafa nú eignast tæki.

Opnað hefur verið fyrir umsóknir þátttakenda á Handverkshátíð við Hrafnagil sem haldin verður dagana 4. – 7. ágúst næstkomandi. Líkt og undangengni ár geta þátttakendur sótt um sölubás á innisvæði, útisvæði eða í matvælatjaldi. Með umsókn skuldbindur sýnandi sig til að taka þátt í sýningunni alla 4 sýningardagana.

Sjötta og næst síðasta liðið sem kynnt er til leiks fyrir KS-Deildina 2016 er lið Mountain Horse. Liðstjóri er Fanney Dögg Indriðadóttir og með henni eru Elvar Logi Friðriksson, Hallfríður S. Óladóttir og Hans Þór Hilmarsson. „Þarna er athyglisvert lið á ferðinni,“ segir í fréttatilkynningu frá Meistaradeild Norðurlands.

Kvennakórinn Sóldís heldur árlega konudagstónleika næstkomandi sunnudag, 21. febrúar, kl. 15:00 í Menningarhúsinu Miðgarði. Söngstjóri er Helga Rós Indriðadóttir og leikur undir Rögnvaldur Valbergsson. Einsöngvarar eru Ólöf Ólafsdóttir og Íris Olga Lúðvíksdóttir.

Spáð er suðaustan 18-23 og slyddu með morgninum á Ströndum og Norðurlandi vestra, en mun hægari og snjókomu síðdegis. Frost 1 til 6 stig, en frostlaust um tíma á morgun. Í ábendingu frá veðurfræðingi Vegagerðarinnar kemur fram að skil með úrkomu og hlýnandi veðri fari norður yfir landið í dag.

Feyki hafa borist tilkomumiklar ljósmyndir og myndskeið frá brunanum á Blönduósi í gær. Róbert Daníel Jónsson, áhugaljósmyndari þar, sendi Feyki meðfylgjandi myndir og myndskeið. Fleiri myndir af atburðinum er að finna á fésbókarsíðu Róberts Daníels.