Hugleiðingar í upphafi árs - Áskorandi Elísabet Kjartansdóttir, brottfluttur Króksari
Ég tek glöð við áskorendapennanum frá Bríet frænku og velti fyrir mér einu og öðru í upphafi árs eins og við gjarnan gerum á slíkum tímamótum. „Nú árið er liðið í aldanna skaut og aldrei það kemur til baka…“ segir í ljóðinu góða sem við flest öll þekkjum. Nú höfum við kvatt 2018 og bjóðum nýtt ár hjartanlega velkomið með allar þær vonir og væntingar sem áramótunum fylgja.
Við lok hvers árs er gott að líta yfir farin veg og staldra aðeins við. Ég er þó ekki vön að setja mér áramótaheit…fyrir utan það að halda áfram að „lifa og njóta“ með öllu mínu góða fólki sem ég hef í mínum ranni. Þrátt fyrir að setja mér ekki eiginlegt áramótaheiti þá hugsa ég engu að síður um eitt og annað sem betur mætti fara, hvað mig langar að gera á nýju ári o.s.frv. Þar sem ég er mikil fjölskyldumanneskja og margra barna móðir þá snúast þessir hluti oftar en ekki um fjölskylduna mína, ferðalög sem gaman væri að fara í, söfn sem ég vil heimsækja með börnunum, bækur sem ég ætla að lesa, uppskriftir sem gaman væri að prufa að elda, náttúruperlur hérlendis sem við verðum að sjá, að ógleymdum prjónaskapnum og annarri handavinnu sem er mitt aðal áhugamál.
Um áramót finnst mér mikilvægt að staldra aðeins við og íhuga árið sem var að líða, að minnast bæði sigra og sorga, markmiðana sem ekki voru efnd, velta feilsporunum fyrir sér og fagna öllu því sem vel var gert. Velta fyrir sér ástæðum þess að við opnuðum okkur fyrir miklum ævintýrum eða lokuðum dyrunum á önnur vegna hræðslu og ótta af einhverju tagi. Allra mikilvægast finnst mér þó að horfa fram á veginn, klisjan „lífið er núna“ er nefnilega enginn klisja heldur heilagur sannleikur. Það sem gerðist í gær er liðið og morgundagurinn ókominn, dagurinn í dag er í raun það eina sem skiptir máli og við vitum ekkert hversu mörg ævispor okkar verða.
Áramótin eru tími tækifæra, við fáum annað tækifæri. Tækifæri til þess að gera betur, gera meira, elska heitar, fyrirgefa, vera vinsamlegri, horfa fram á við, leggja að baki, sýna gæsku og hætta að velta fyrir sér þessu blessaða „hvað ef“ sem okkur er svo tamt að gera. Reynum frekar að taka því sem að höndum ber með æðruleysi, fögnum því sem verða vill með bros á vör. Í lífinu er svo margt sem við höfum enga stjórn á og þess vegna mikilvægt að muna eftir því sem við þó getum ráðið og stýrt, t.d. framkomu okkar við aðra, fyrirgefningunni, sýna kærleika, nýta tækifærin, vera jákvæð og gera ætíð sitt besta alveg sama hvað.
Á nýju ári ætla ég því að hafa eina aflið sem einhverju skiptir í lífinu að leiðarljósi, þ.e. ástina og kærleikann en eins og Steinunn Ólína sagði svo réttilega í upphafi árs þá lifum við til þess að elska og vera elskuð, allt annað er bara drasl. Ég mun því halda áfram að „lifa og njóta“. .…já og vera sjúklega mjó og eiga ógeðslega mikið af peningum…enn ekki hvað!!
Ég ætla að skora á gamla vinkonu mína, Ragnheiði Hlín Símonardóttur frá Ketu í Hegranesi að taka við pennanum af mér.
Áður birst í 2. tbl. Feykis 2019
Fleiri fréttir
-
Liðsheildin skilaði þessum sigri - segir Helgi þjálfari
feykir.is Skagafjörður, Íþróttir 19.04.2024 kl. 03.09„Þessi leikur var mjög jafn og spennandi allan tímann, algjör naglbítur tveggja góðra liða sem bæði lögðu allt i að vinna,“ sagði Helgi þjálfari Margeirs þegar Feykir bað hann að lýsa leik Tindastóls og Snæfells í gærkvöldi. „Frábær stemning í húsinu en Snæfell var með flotta stuðningsmannasveit og Síkið vel mannað og stuðningsmannasveitin í essinu sínu,“ en samkvæmt leikskýrslu voru um 300 áhorfendur í húsinu sem gerist ekki á hverjum degi í kvennaboltanum.Meira -
Lið Tindastóls sló út Subway-deildar lið Snæfells
feykir.is Skagafjörður, Íþróttir 18.04.2024 kl. 22.53Það var gleði og gaman í Síkinu í kvöld en sennilega þó ekki síður stress og naglanögun fram á síðustu sekúndu framlengingar þegar Tindastóll og Snæfell mættust í fjórða leik einvígis síns um réttinn til að spila um sæti í efstu deild. Leikurinn var jafn og spennandi allan tímann en gestirnir náðu góðum kafla snemma í fjórða leikhluta, náðu 13 stiga forystu og virtust ætla að tryggja sér oddaleik í Stykkishólmi. Lið Tindastóls gafst ekki upp og náði að jafna í blálokin og tryggja sér framlengingu þar sem heimaliðið reyndist sterkara. Lokatölur 82-78 og rjúkandi stemning hjá Stólastúlkum.Meira -
Jordyn Rhodes komin með leikheimild
feykir.is Skagafjörður, Íþróttir 18.04.2024 kl. 18.42Tindastóll teflir fram liði í þriðja skipti í efstu deild kvennafótboltans eftir ansi gott tímabil síðastliðið sumar. Besta deildin hefst nú á sunnudag og þá kemur FH í heimsókn á Krókinn. Það vita allir að það er bara ein Murr en hún hefur nú skipt um heimavöll og spilar með Fram í sumar í Lengjudeildinni. Jordyn Rhodes tekur hennar stöðu í fremstu víglínu og eru miklar vonir bundnar við hana.Meira -
Snjódýpt í Fljótum yfir meter að jafnaði
feykir.is Skagafjörður, Ljósmyndavefur 18.04.2024 kl. 14.31„Tíðarfarið hefur verið nokkuð óvenjulegt frá 21. mars en allar helgar síðan þá hafa skollið á norðan stórhríðir en lítill snjór var annars þennan vetur,“ segir Halldór Gunnar Hálfdansson, bóndi á Molastöðum í Fljótum en hann sér einnig um skólaakstur í sveitinni. Halldór bætir við að það sé nokkuð óvenjulegt að fá svona mikinn snjó seint og segir að yfirleitt þegar snjóþungt sé í Fljótum hafi sá snjór verið að safnast allan veturinn, oft frá því í október.Meira -
Máttur menntunar | Álfhildur Leifsdóttir skrifar
feykir.is Skagafjörður, Aðsendar greinar 18.04.2024 kl. 13.45Það hefur lengi verið sagt að menntun sé máttarstólpi samfélagsins. Fjöreggið. Skólakerfið okkar á að vera öflugasta jöfnunartækið, þar eiga allir að hafa sömu tækifærin. En er það svo? Við getum vissulega fagnað þeim breytingum að fríar skólamáltíðir verða að veruleika, aðgerð sem jafnar leikinn að einhverju leyti og er breyting til batnaðar fyrir öll.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.