Kirkjukambur úr bronsi finnst í rústum Þingeyraklausturs
Nú stendur yfir uppgröftur í rústum Þingeyraklausturs en þar hafa fræðilegar rannsóknir staðið yfir frá árinu 2016 og ganga undir heitinu Þingeyraverkefnið. Uppgröfturinn í rústum klaustursins hófst í byrjun júní og mun standa út mánuðinn. Þar hefur tíu manna hópur verið að störfum undanfarið og unnið að því að grafa sig í gegnum jarðlög frá 17. og 18. öld.
Ríkisútvarpið greindi frá því í fréttum sínum í gær að á dögunum hafi fundist þar bronskambur sem notaður var til að krúnuraka munka og presta á miðöldum og segir Steinunn Kristjánsdóttir, fornleifafræðingur sem stýrir verkefninu, að þessi fundur bendi til þess að þau séu komin niður á sjálfar klausturrústirnar. Vonast hún eftir að í framhaldinu finnist jarðneskar leifar ábótans eða munka klaustursins sem flestallir dóu úr svartadauða í byrjun fimmtándu aldar.
Að sögn Steinunnar er gripurinn, sem fannst á föstudag, kirkjukambur, kaþólskur gripur frá miðöldum og hafa aðeins þrír aðrir kirkjukambar fundist hér á landi. „Þetta er kambur steypur í brons,“ segir Steinunn í samtali við Ríkisútvarpið. „Og hann er skreyttur með dýrahöfðum, mjög þungur gripur og fallegur og merkilegur líka. Þetta er fjórði kirkjukamburinn sem er varðveittur á Íslandi, semsagt úr bronsi, og aðeins einn annar sem hefur fundist í fornleifarannsóknum. Samkvæmt tilskipun frá páfa þá áttu allir prestar og munkar að krúnuraka sig með þessum hætti. Þetta var mikil athöfn og þessir kambar voru semsagt notaðir við þannig rakstur.“
Á Þingeyrum var rekið klaustur í meira en fjórar aldir. Einn helsti tilgangur rannsóknanna er að varpa ljósi á upptök og afleiðingar svartadauða hér á landi en munkar og ábóti klaustursins dóu úr svartadauða og er markmiðið að grafa upp bein þeirra og rannsaka með DNA tækni. Að sögn Steinunnar gengur uppgröfturinn vel og vonast hún til að finna mannabein sem hægt verði að rannsaka. „Ég held að við náum því já. Okkur miðar mjög vel og hefur tekist að grafa mjög mikið í hverri viku. Og ég reikna nú með því að við getum opnað einhverjar grafir. Ef að okkur tekst að finna beinagrindur frá klausturtíma, tökum við sýni úr beinunum í Reykjavík. Það þarf að gera það í einangrun og við vinnum úr þessu þar. Við erum meira að safna gögnunum hér,“ segir Steinunn Kristjánsdóttir, fornleifafræðingur í samtali við Ríkisútvarpið í gær.
Fleiri fréttir
-
Setning Sæluviku Skagfirðinga 2025 og endurgerð Faxa | Einar E. Einarsson skrifar
feykir.is Skagafjörður, Aðsendar greinar 28.04.2025 kl. 10.25Ég vil byrja á að óska ykkur öllum gleðilegs sumars á þessum fallega degi sem jafnframt er síðasti sunnudagur aprílmánaðar, en hann hefur verið upphafsdagur Sæluviku Skagfirðinga í um 30 ár. Sæluvika Skagfirðinga á sér hins vegar mun lengri sögu, en heimildir herma að Sæluvikan hafi orðið til í framhaldi af svokölluðum sýslunefndarfundum sem haldnir voru einu sinni á ári með Sýslumanni og helstu forsvarsmönnum allra hreppa í Skagafirði.Meira -
Forsætisráðherra heimsækir Skagafjörð
feykir.is Skagafjörður, Mannlíf 28.04.2025 kl. 02.41Kristrún Frostadóttir forsætisráðherra býður til opins fundar í Skagafirði mánudaginn 28. apríl. Ráðherra verður einnig með erindi á kirkjukvöldi á Sauðárkróki sama dag í tilefni Sæluviku. „Það hefur gefið mér mikið síðustu misseri að halda opna fundi með fólki um allt land og ég vil halda því áfram eins og ég get í nýju embætti. Ég hlakka til að koma í Skagafjörðinn og eiga opið og milliliðalaust samtal um það sem brennur helst á heimamönnum,“ segir Kristrún.Meira -
Þungur hnífur á Sauðárkróksvelli
feykir.is Skagafjörður, Austur-Húnavatnssýsla, Íþróttir, Vestur-Húnavatnssýsla, Lokað efni 27.04.2025 kl. 23.12Það er oft stutt á milli hláturs og gráturs og það á ekki síst við í sportinu. Lið Tindastóls og Stjörnunnar mættust í Bestu deild kvenna á Sauðárkróksvelli í dag og allt stefndi í stórgóðan sigur Stóalstúlkna þegar allt fór í skrúfuna. Það þýðir oft lítið að nöldra undan óheppni í íþróttum en lið Tindastóls var annan leikinn í röð aðeins mínútum frá góðum úrslitum. Garðbæingar rændu stigunum í blálokin með tveimur mörkum, unnu heimastúlkur 1-2.Meira -
Sæluvikan sett og Faxi afhjúpaður á ný
feykir.is Skagafjörður, Listir og menning, Mannlíf, Lokað efni 27.04.2025 kl. 20.20Sæluvika Skagfirðinga var sett við hátíðlega athöfn á Sauðárkróki í dag. Gestir voru flestir mættir tímanlega fyrir kl. 13 eins auglýst hafði verið og voru umsvifalsust sjanghæjaðir út á Faxatorg í ískalt þokuloftið þar sem draugalegur Faxi beið þess að verða afhjúpaðir enn og aftur. Einar E. Einarsson, forseti sveitarstjórnar Skagafjarðar, flutti þar ágæta setningarræðu Sæluviku, sagði síðan nýjustu fréttir af Faxa og sýndi loks lipra takta við að færa listaverkið okkar góða úr plastklæðunum. Eftir stóð Faxi bronshjúpaður á nýjum stalli og hefur sennilega aldrei verið ferskari.Meira -
María og Sigurður hlutu Samfélagsverðlaun Skagafjarðar
feykir.is Skagafjörður, Listir og menning, Mannlíf, Lokað efni 27.04.2025 kl. 19.16Við setningu Sæluviku Skagfirðinga í dag kynnti Hrefna Jóhannesdóttir frá Silfrastöðum og varaformaður atvinnu-, menningar- og kynningarnefndar Skagafjarðar val á þeim sem hlutu Samfélagsverðlaun Skagafjarðar 2025 en þetta var í tíunda sinn sem verðlaunin eru afhent. Þau komu nú í hlut heiðurshjónanna Maríu Guðmundsdóttur og Sigurðar Hansen frá Kringlumýri í Blönduhlíð og eru þau sannarlega vel að heiðrinum komin.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.