Startup Landið – tækifæri fyrir frumkvöðla á Norðurlandi vestra
feykir.is
Skagafjörður, Austur-Húnavatnssýsla, Vestur-Húnavatnssýsla
25.08.2025
kl. 15.24
Guðlaugur Skúlason. Mynd aðsend.
Það þarf ekki stórt skrifborð eða flókið umhverfi til að hugmynd fæðist – stundum dugar eldhúsborðið. En hvernig breytir maður hugmynd í raunverulegan rekstur? Í haust fá frumkvöðlar á Norðurlandi vestra og víðar tækifæri til að taka fyrsta skrefið í nýju verkefni sem nefnist Startup Landið – viðskiptahraðall landshlutasamtakanna. Umsóknarfrestur stendur til 31. ágúst. Nánar á www.startuplandid.is
Stuðningur frá SSNV
Samtök sveitarfélaga á Norðurlandi vestra (SSNV) styðja frumkvöðla úr landshlutanum sem taka þátt í hraðlinum. Tvær hugmyndir verða valdar áfram fyrir hönd Norðurlands vestra og fá þátttakendur stuðning SSNV á meðan á verkefninu stendur.
Hvað er viðskiptahraðall?Viðskiptahraðall er tímabundið verkefni þar sem einstaklingar með frumlegar hugmyndir fá leiðsögn og stuðning til að þróa þær áfram – allt frá hugmynd á blaði til raunverulegs fyrirtækis. Markmiðið er að kanna hvort hugmyndin standist, geti skapað tekjur, sparnað eða jafnvel ný störf.
Nám, handleiðsla og tengslanet
Startup Landið hefst 18. september með rafrænum vinnustofum sem fara fram tvisvar í viku í sex vikur. Þátttakendur fá handleiðslu frá reyndum frumkvöðlum, fræðslu um hugmyndavinnu og tækifæri til að byggja upp tengslanet.
Staðlota verður haldin í Hveragerði 25.–26. september, þar sem öll teymi víðsvegar af landinu hittast í eigin persónu. Lokahátíðin fer svo fram í Hofi á Akureyri í fimmtudaginn 30. október. Þar fá teymin að kynna hugmyndir sínar fyrir fjárfestum og hlýtur ein hugmynd sérstakan stuðning frá landshlutasamtökunum.
Þátttaka án endurgjalds
Öll þátttaka í hraðlinum er án endurgjalds. Ferðakostnaður er niðurgreiddur og gisting, matur og fræðsla er innifalið. „Á Norðurlandi vestra er fjöldi hugmyndaríkra einstaklinga og við hjá SSNV viljum sjá þær hugmyndir vaxa og dafna. Með þátttöku í Startup Landinu fá einstaklingar verkfæri og stuðning til að þróa hugmyndina sína áfram. Ég hvet því alla sem hafa hug á að prófa sig áfram að sækja um – því það kostar ekkert að taka þátt, en getur skilað miklu,“ segir Guðlaugur Skúlason, verkefnastjóri nýsköpunar hjá SSNV.
Fleiri fréttir
-
Sinfó í sundi
feykir.is Skagafjörður, Austur-Húnavatnssýsla, Vestur-Húnavatnssýsla, Listir og menning 25.08.2025 kl. 14.55Sinfóníuhljómsveit Íslands á 75 ára afmæli í ár og hefur í tilefni af afmælinu boðið upp á fjölmarga viðburði það sem af er ári. Næst á dagskrá hjá sveitinni eru tónleikarnir Klassíkin okkar. Tónleikunum verður ekki aðeins sjónvarpað í beinni útsendingu heldur verða þeir einnig í boði í fjölmörgum sundlaugum landsins undir heitinu Sinfó í sundi.Meira -
Skagfirðingasveit gerir sér glaðan dag
feykir.is Skagafjörður, Mannlíf, Lokað efni 25.08.2025 kl. 13.45Sagt var frá því fyrr í sumar að björgunarsveitin Skagfirðingasveit komst að því að hún var bara alls ekki að verða 60 ára á árinu heldur nálgast hún hundrað árin - já þið lásuð rétt, hundrað ár. Sveitarfólk kíkti nefnilega í Héraðsskjalasafn Skagfirðinga og komust þau að því að sveitin var stofnuð árið 1932,en lagðist í dvala um 1953 en var síðar endurreist árið 1965, fyrir 60 árum.Meira -
Eyjólfur á Krúttinu í Kvöld
feykir.is Austur-Húnavatnssýsla, Lokað efni 25.08.2025 kl. 09.15Eyjólfur Ármannsson innviðaráðherra boðar til opinna íbúafunda í ágúst í öllum landshlutum til að eiga samráð um málaflokka ráðuneytisins undir yfirskriftinni Fjárfest í innviðum til framtíðar.Meira -
Formaðurinn með sigurmark í uppbótartíma
feykir.is Skagafjörður, Íþróttir, Lokað efni 24.08.2025 kl. 20.05Tindastólsmenn gerðu góða ferð í Árbæinn í dag þar sem þeir mættu liði Árbæjar í 3. deildinni á Domusnovavellinum. Heimaliðið var sæti ofar en Stólarnir fyrir leikinn en 1-2 sigur, þar sem formaður knattspyrnudeildar Tindastóls gerði sigurmarkið í uppbótartíma, skaut Skagfirðingum upp fyrir Árbæinga og í fimmta sæti deildarinnar.Meira
