Tindastóll spilar úrslitaleikinn í Lengjubikarnum gegn Snæfelli í dag
Tindastólsmenn gerðu sér lítið fyrir í gærkvöldi og lögðu Þór Þorlákshöfn, 82-81, í undanúrslitum Lengjubikarsins en leikurinn fór fram í Stykkishólmi. Fyrir vikið mæta Stólarnir öflugu liði Snæfells í úrslitaleik sem fram fer á sama stað kl. 16 í dag. Þetta er þá annar úrslitaleikurinn sem Tindastóll spilar á árinu og verður að teljast athyglisverður árangur.
Þórsarar voru öflugri framan af leik í gær, voru sex stigum yfir eftir fyrsta leikhluta, 16-22, og náðu síðan 12 stiga forystu snemma í öðrum leikhluta, 18-30. Þá snérist leikurinn á hvolf og Stólarnir gerðu á 5 mínútna kafla 17 stig en Þór ekkert og staðan 35-30. Í hálfleik leiddu Stólarnir með einu stigi, 39-38.
Síðari hálfleikur var æsispennandi en lið Tindastóls þó yfirleitt skrefinu á undan Þórsurum. Mestur varð munurinn níu stig eftir að Ingvi Rafn lagði boltann í körfuna, 52-43, en 90 sekúndum síðar var munurinn orðinn 1 stig, 52-51. Svabbi gerði síðustu stigin í þriðja leikhluta og Tindastóll hafði 3ja stiga forystu, 66-63, fyrir lokafjórðunginn.
Það var allt í járnum framan af fjórða en um miðjan leikhlutann settu Helgi Margeirs og Þröstur Leó niður tvo þrista á skömmum tíma og Stólarnir náðu 5 stiga forystu og síðan bætti Helgi Rafn við forskotið. Staðan 80-73 þegar fjórar mínútur voru eftir. Eftir þetta gekk hvorki né rak í sóknarleik liðanna. Þórsurum gekk þó betur og þeir söxuðu á forskotið. George Valentine skoraði síðustu stig Stólanna í leiknum þegar tvær og hálf mínúta voru eftir, staðan 82-78. Guðmundur Jónsson setti niður þrist fyrir Þór í næstu sókn og það er skemmst frá því að segja að ekkert var skorað síðust tvær mínútur leiksins þrátt fyrir margar ágætar tilraunir beggja liða. Lokatölur 82-81.
Frábær sigur Stólanna og sæti í úrslitaleiknum staðreynd. Þar mæta okkar menn heimamönnum í Snæfelli og toppliði Dominos-deildarinnar. Það verður því við ramman reip að draga en það er allt hægt í þessum bolta og engin ástæða til að mæta með hangandi haus. Stólarnir hafa ekki lyft bikar síðan Lárus Dagur þeytti Eggjabikarnum í loft upp um árið og alveg kominn tími til að endurtaka leikinn. Þeir sem ekki fara rúntinn í Stykkishólm er bent á að leikurinn verður sýndur á Sport TV.
Áfram Tindastóll!
Stig Tindastóls: George Valentine 24 / 12 fráköst, Drew Gibson 17 / 13 stoðs, Helgi Margeirs 11, Helgi Rafn 9, Ingvi 8, Þröstur Leó 5, Pétur 3, Sigtryggur Arnar 3 og Svabbi 2.
Fleiri fréttir
-
Öll verkefni lögreglunnar voru af jákvæðari gerðinni á Hofsósi
feykir.is Skagafjörður, Mannlíf, Lokað efni 24.06.2025 kl. 15.40Þrjár lögregluáhafnir voru viðstaddar á bæjarhátíðinni Hofsós heim um síðustu helgi. Á Facebook-síðu Lögreglunnar á Norðurlandi vestra segir að það sé gleðilegt að öll verkefni lögreglunnar á svæðinu hafi verið af jákvæðari gerðinni, engir árekstrar á milli manna eða vandamál sem kröfðust úrlausnar lögreglu.Meira -
Karlakórinn Heimir brattur í Brighton
feykir.is Skagafjörður, Listir og menning, Mannlíf 24.06.2025 kl. 14.10Í 98 ára sögu Karlakórsins Heimis hafa kórferðir verið æði stór hluti af starfinu. Auðvitað hafa ferðir innan land verið langflestar en utanlandsferðir hafa líka verið stór hluti af starfinu og kannski það sem hefur verið mönnum eftirminnilegast. Það hefur verið stefnan að fara á fjögurra til fimm ára fresti í utanlandsreisu. Vorið 2017 fór kórinn í stóra og mikla ferð til vesturstrandar Canada, nánar tiltekið til Vancouver og Victoria. Var sú ferð stórvel heppnuð og verður lengi í minnum höfð.Meira -
„Hún leggur mikið á sig innan og utan vallar og er með frábært hugarfar“
feykir.is Skagafjörður, Austur-Húnavatnssýsla, Íþróttir, Vestur-Húnavatnssýsla, Lokað efni 24.06.2025 kl. 13.54Morgunblaðið valdi Tindastólsstúlkuna Birgittu Rún Finnbogadóttur, sem er alin upp hjá Umf. Fram á Skagaströnd, sem leikmann 10. umferðar Bestu deildar kvenna sem var leikin nú um helgina. Stólastúlkur léku fyrir austan í þeirri umferð og Birgitta var stanslaust ógn frá fyrstu til síðustu mínútu, skoraði tvö mörk og átti drjúgan þátt í hinum tveimur mörkum Tindastóls.Meira -
Hestamannafélagið Neisti hélt félagsmót og úrtöku
feykir.is Austur-Húnavatnssýsla, Íþróttir, Hestar 24.06.2025 kl. 12.30Vel heppnað félagsmót og úrtaka Hestamannafélagsins Neista 2025. Mótið fór fram við frábærar aðstæður í blíðskaparveðri sunnudaginn 22. júní .Meira -
Héraðsvötn í bið eða vernd, jafnvel nýtingu?
feykir.is Skagafjörður, Fréttir, Lokað efni 24.06.2025 kl. 11.35Nú berast þær fréttir að stjórnarmeirihlutinn á Alþingi vill að Héraðsvötn í Skagafirði verði friðuð gagnvart virkjunum og fari í verndarflokk rammaáætlunar. Þá vill meirihlutinn halda þeim möguleika opnum að Kjalölduveita neðan Þjórsárvera verði leyfð.Meira
