Fréttir

Íbúðalánasjóður hefur ákveðið að setja um 500 íbúðir úr eigna­safni sjóðsins í opið sölu­ferli. Um er að ræða þriðjung þeirra íbúða sem nú eru í eigu sjóðsins eða 504 íbúðir alls. Íbúðirnar eru um land allt og verða boðnar til sölu í 15 eigna­söfnum. Veru­legur hluti íbúðanna er í útleigu en hluti eign­anna þarfnast lagfær­ingar.

Hópur Vestur-Húnvetninga sem staðið hafa að tónleikahaldi fyrir jólin undanfarin ár hélt jólatónleika í Ásbyrgi síðastliðinn fimmtudag. Hrafnhildur Ýr Víglundsdóttir, keppandi í Voice Ísland og ein af söngkonunum á tónleikunum segir að vel hafi tekist til og mæting verið góð að venju.

María Ósk Steingrímsdóttir er 22 ára stúlka frá Sauðárkróki. Hún er búsett í Reykjavík þar sem hún stundar nám í rekstrarverkfræði við Háskólann í Reykjavík. Þegar blaðamaður Feykis hitti hana á kaffihúsi í borginni á dögunum bar hún það ekki með sér að hafa lifað við viðstöðulausa verki meira og minna allt sitt líf, sársauka sem hún hefur lært að lifa með. Undanfarin tvö ár hafa þó verið henni þungbær með stigvaxandi verkjum og langri bið eftir að komast í aðgerð. María segir óvissuna um hvað framtíðin beri með sér einna erfiðust.

Lúsíuhátíð 6. bekkjar Árskóla er í dag fimmtudaginn 10. desember. Lúsíurnar eru á ferðinni um Krókinn og syngja á ýmsum stöðum, m.a. Leikskólanum Ársölum, Dvalarheimilinu kl. 14 og Skagfirðingabúð kl. 15:30. Hátíðin endar í matsal Árskóla kl. 17 í dag með sannkölluðum Lúsíusöng og eru allir velkomnir í skólann.

Í lok nóvember komu bændur og hestamenn í Austur-Húnavatnssýslu saman og gerðu sér glaðan dag á Blönduósi. Verðlaunaafhendingar voru fyrir góðan árangur í hverri búgrein fyrir sig.

Sauðárkróksbakarí vill koma þeim skilaboðum á framfæri að vegna óviðráðanlegra orsaka þarf að fresta KERTAogKÓSÝ kvöldi sem til stóð að halda í kvöld. Þannig að ekki verður opið í bakaríinu í kvöld, miðvikudagskvöldið 9. desemer 2015.

Þann 23. desember n.k. eru liðin 60 frá stofnun Fiskiðju Sauðárkróks, sem nú heitir FISK Seafood. Af því tilefni hefur fyrirtækið ákveðið að bjóða til glæsilegra afmælis- og jólatónleika í Miðgarði í Skagafirði. Á tónleikunum koma m.a. fram Þór Breiðfjörð og Valgerður Guðnadóttir, Karlakórinn Heimir og fleira söngfólk úr Skagafirði. Tónlistarstjórar verða þeir Stefán Gíslason og Einar Þorvaldsson og umsjón með tónleikunum hefur Áskell Heiðar Ásgeirsson.

Jólakvöldi sem vera átti í Kvosinni í Hofsósi í kvöld hefur verið frestað um óákveðinn tíma, vegna veðurs. Átti það upphaflega að vera á þriðjudaginn í síðustu viku en var einnig frestað þá vegna veðurútlits.

„Þetta gekk allt vel hér í Húnaþingi vestra. Sveitin var í viðbragðsstöðu, en við þurftum ekki að sinna neinum útköllum. Ég hef ekki heldur frétt af neinu tjóni,“ sagði Gunnar Örn, formaður Björgunarsveitarinnar Húna, í samtali við Feyki nú rétt fyrir hádegi.

Margvíslegt eignartjón hefur orðið í Skagafirði í storminum sem gekk yfir landið í gær og í nótt og þar er víða bálhvasst enn. Eins og fram kom á feykir.is í morgun liggur rafmagnslína yfir veginn á milli bæjanna Miðsitju og Sólheima í Blönduhlíð og eru því hátt í tíu bæir rafmagnslausir þar.