Fréttir

Það er hátíðardagur á Króknum í dag, laugardag í páskahelginni, og ástæðan er að sjálfsögðu körfubolti. Fyrsti heimaleikur Tindastóls í úrslitakeppninni fer fram í kvöld og mótherjarnir eru Keflvíkingar. Tindastóll vann fyrsta leik liðanna sl. miðvikudagskvöld eftir framlengingu og því mikið undir hjá báðum liðum í kvöld. Í gær var Síkið og næsta nágrenni gert klárt fyrir veisluna.

Lagafrumvarp um flutning verkefna Innheimtustofnunar sveitarfélaga, m.a. tengt innheimtu meðlaga, til sýslumannsins á Norðurlandi vestra, vegna samlegðar við verkefni innheimtumiðstöðvarinnar á Blönduósi sem er á ábyrgð embættisins, hefur verið lagt fyrir Alþingi. Þar er miðað við að verkefni Innheimtustofnunar færist yfir til sýslumanns 1. janúar 2024.

Keppni í slaktaumatölti T2 í Meistaradeild KS í hestaíþróttum fór fram á Sauðárkróki sl. miðvikudagskvöld, 5. apríl. Á Facebooksíðu keppninnar segir að A-úrslitin hafi verið gríðarlega skemmtileg og fór svo að Védís Huld Sigurðardóttir, þjálfari á Sunnuhvoli í Ölfusi, og Hrafnfaxi frá Skeggsstöðum sigruðu örugglega með 8.04 og er það annað árið í röð sem þau sigra þessa grein. Með Védísi á palli voru þeir feðgar, Bjarni Jónasson og Finnbogi Bjarnason.

Í þingsályktunartillögu sem Svandís Svavarsdóttir matvælaráðherra hefur lagt fram um matvælastefnu fyrir Ísland er mörkuð stefnan til ársins 2040 og er ætlað að vera leiðarstef í ákvarðanatöku til að auka megi verðmætasköpun í innlendri matvælaframleiðslu, tryggja fæðu- og matvælaöryggi og auka velferð fólks í sátt við umhverfi og náttúru.

Eftir að hafa boðið lesendum Feykis í menningarreisu til Hugrúnar Önnu í Verónu á Ítalíu í febrúar þá tekur Feykir undir sig stökk til norðausturs og snögghemlar í Austur-Evrópu. Nánar tiltekið í austurhluta gömlu Tékkóslóvakíu, sem flestir lesendur Feykis ættu að kannast við, en í kjölfar þess að halla fór undan fótum Sóvétríkjanna þá sluppu ríki Austur-Evrópu undan járnhælnum. Flauelsbyltingin var gerð friðsamlega í Tékkóslóvakíu 1989 og til urðu Tékkland (ekki skoðunarstöðin) og Slóvakía og það er einmitt í síðarnefnda landinu sem parið Kolbrún Sonja Rúnarsdóttir og Ófeigur Númi Halldórsson stundar nú nám í borginni Košice.

Veðurklúbbur Dalbæjar fundaði þann 5. apríl 2023 en þar voru mætt þau Haukur Haraldsson, Bergur Þór Jónsson, Hörður Kristgeirsson, Magnús Gunnlaugsson, Ragnhildur Von Weisshappel, Kristján Loftur Jónsson og Þóra Jóna Finnsdóttir. Spámenn telja að apríl komi með meira vor norður í land.

Föstudagurinn langi er síðasti föstudagur fyrir Páska. Þá minnast kristnir menn píslargöngu Jesú krossfestingar hans og dauða á krossi en samkvæmt guðspjöllunum gerðust þessir atburðir á síðasta föstudag fyrir Páska. Þá var Jesú krossfestur ásamt tveimur ræningjum sem höfðu einnig verið dæmdir til krossfestingar.

Það hefur lengi verið í bígerð að koma á fót hótelstarfsemi á Skagaströnd og fyrir tæpu ári síðan var sagt frá því að stefnt væri að því að breyta gömlu húsnæði Síldarverksmiðju ríkisins á Skagaströnd í hótel. Nú í gær, réttu ári síðar, var samþykkt samstarfsyfirlýsing á fundi sveitarstjórnar Skagastrandar, milli sveitarfélagsins og Fasteignafélagsins Þingeyrar, um undirbúning að uppbyggingu á glæsilegu hóteli á Skagaströnd. Hótelið hefur hlotið vinnuheitið Herring Hotel.

„Þetta voru bestu tímar, þetta voru verstu tímar ...“ segir í frægri bók. Sennilega var nú Kalli Dickens ekki með þandar taugar körfuboltaáhugafólks í huga þegar hann reit þennan texta á blað en það er pínu svona sem ástandið á okkur stuðningsmönnum Stólanna er þegar úrslitakeppnin hefst í körfunni og leikurinn í Keflavík í gærkvöldi var ágætt dæmi um. Eina mínútuna voru Stólarnir bestir og þá næstu verstir – með tilheyrandi tilfinningarússíbana þeirra sem á horfðu. Strákarnir okkar náðu hins vegar í sigurinn eftir framlengdan leik og hafa því náð í mikilvægan útivallarsigur og undirtökin í einvígi liðanna í átta liða úrslitum Subway-deildarinnar. Lokatölur 107-114 og liðin mætast öðru sinni í Síkinu nú á laugardagskvöld.

Það þekkja flestir hana Sigríði Elfu sem býr á Króknum og vinnur á leikskólanum Ársölum. Sigríður Elfa er dóttir Eyjólfs Sveinssonar vinnuvélastjóra og Ingibjargar Axelsdóttur og er elst af fjórum systkinum. Sigríður Elfa sést oft hjóla um bæinn með hund sér við hlið sem virðist hlýða henni í einu og öllu eins og góður hundur á að gera með eiganda sínum. Hann lætur það sem á vegi þeirra verður ekki laða sig út í einhverja vitleysu heldur fylgir henni hvert sem Sigríður Elfa fer. Þessi litla snót heitir Loppadís og er í daglegu tali kölluð Loppa. Loppa er íslenskur fjárhundur með dass af Border Collie og kannski einhverju smá fleiru.