Fréttir

Á dögunum auglýsti SSNV eftir atvinnuráðgjafa með áherslu á nýsköpun og bárust alls 20 umsóknir um starfið. Á heimasíðu samtakanna kemur fram að úrvinnslu umsókna sé lokið og var Skagfirðingurinn Ólöf Lovísa Jóhannsdóttir ráðin í starfið.

Unnið hefur verið að áætlunum um virkjanir í Jökulsánum í Skagafirði í hartnær hálfa öld. Krafa um virkjun verður sífellt háværari, umræðan um orkuskort vex og virkjanaglöðum sveitarstjónarmönnum verður tíðrætt um glötuð tækifæri í héraði vegna orkuskorts. En þó eru ekki allir sveitarstjórnarmenn á þeim buxunum...

Sveitarstjórn Sveitarfélagsins Skagafjarðar ítrekar fordæmingu á innrás Rússa í Úkraínu og brot þeirra á sjálfstæði og sjálfræði úkraínsku þjóðarinnar en byggðarráð hafði áður fordæmt innrásina harðlega. Sveitarfélagið Skagafjörður lýsti á fundi sínum í gær yfir vilja sínum til að taka á móti flóttafólki frá Úkraínu og fól sveitarstjóra að vera í sambandi við flóttamannanefnd til að koma þeim vilja á framfæri, afla frekari upplýsinga um samninga um móttöku flóttamanna og stilla saman strengi með stjórnvöldum.

Allt frá árinu 2018 hefur verið lögbundin skylda á sveitarfélögum að starfrækja notendaráð til að tryggja samráð notenda félagsþjónustu við stefnumörkun og áætlanagerð. Árið 2019 sendi Öryrkjabandalag Íslands erindi á alla sveitarstjóra landsins þar sem brýnd var fyrir þeim skyldan til þess að koma notendaráðum á laggirnar og tryggja þannig samráð fatlaðra íbúa sveitarfélagsins og hagsmunasamtaka fatlaðs fólks.

Goðamót 5. flokks kvenna fór fram í Boganum um nýliðna helgi og var þar mikið um dýrðir eins og alltaf á hinum sívinsælu Goðamótum en þetta var 68. mótið í Goðamótaröðinni sem hóf göngu sína árið 2003. Þar tefldu hressar stelpur úr Tindastól, Fram, Hvöt/Kormák, Smára og Neista í fjórum liðum en alls tóku 40 lið frá tíu félögum þátt í mótinu að þessu sinni. Mótið gekk vel fyrir sig og var spilað stanslaust í Boganum frá klukkan 15-20 á föstudegi, 9-17 á laugardegi og 9-14 á sunnudegi. Goðamótsskjöldurinn er veittur fyrir fyrirmyndar framkomu innan vallar sem utan og voru það stelpurnar í Tindastóli sem hlutu skjöldinn að þessu sinni.

Enn er barist í Úkraínu hvar Pútín þenur vítisvélar sínar sem aldrei fyrr. Fyrir eru hugdjarfir heimamenn sem staðráðnir eru í að verjast fram í rauðan dauðann og vonast eftir aðstoð annarra Evrópuríkja og jafnvel Bandaríkjanna. Af fréttum að dæma er lítil von um hernaðarlega íhlutun annarra ríkja í öðru formi en útvegun vopna eða hernaðartækja til varnar. Spurning hvað það dugar lengi gegn öflugum rússneskum her sem staðráðinn er í að ná yfirráðum í landinu hvað sem það kostar.

Neyðarlínan og nýsköpunarfyrirtækið Alor ehf. hafa gert með sér samning um þátttöku Neyðarlínunnar í þróun sjálfbærrar álrafhlöðu sem Alor vinnur að auk forpöntunar á vörunum. Neyðarlínan stefnir að því að skipta út eldri blýsýru rafgeymum fyrir umhverfisvæna álrafgeyma sem munu geyma meiri raforku og eru meðfærilegri auk þess að auka öryggi í fjarskiptum, ekki síst í Tetra fjarskiptakerfinu.

Tindastóll tók á móti erkifjendunum í KR í Síkinu er liðin áttust við í tvífrestuðum leik í Subway deildinni í gær. Leikurinn var sveiflukenndur og spennandi og skiptust liðin á forystu lungann úr leiknum en í lokin náðu Stólar að skora sautján stig í röð og lögðu þar með grunninn að sætum sigri.

Lögreglustarfið hefur lengi heillað mig. Starfið getur bæði verið krefjandi og gefandi og þú veist aldrei hvað bíður þín þegar þú mætir á vaktina. Verkefnin sem upp koma eru fjölbreytt. Þú getur enn fremur þurft að hafa afskipti af fólki á þeirra verstu stundum en einnig aðstoðað á góðum stundum.

Skákfélag Sauðárkróks var meðal þátttakenda í Íslandsmóti Skákfélaga sem lauk um helgina, en þá var síðari hlutinn tefldur. Eftir fyrra hlutann, sem fram fór í október, endaði Skákfélag í efsta sæti í 4. deild eftir að hafa unnið allar sínar viðureignir og segir á heimasíðu félagsins að það hafi haldið uppteknum hætti í móti helgarinnar og fengið fullt hús stiga eða 14 með 30,5 vinninga af 42 mögulegum.