Siggi Kúskur - Búið að vera rosalega þurrt vor

Siggi Kúskur. Mynd: Úr einkasafni

Nú þegar sólin hækkar og barómetið stígur upp fer jarðvinnsla í sveitum að líða undir lok. Blaðamaður Feykis forvitnaðist um það hvernig jarðvinnslan í vor hefur gengið hingað til og hafði samband við Sigurð Inga Einarsson, eða Sigga Kúsk eins og hann er jafnan kallaður. Þegar blaðamaður náði tali af Sigga hafði hann nýlokið sáningu í Sólheimagerði í Blönduhlíð hjá þeim Eyþóri og Dísu og var á leiðinni með sáðvélina í slipp á Kúskerpi eins og hann orðaði það.
Siggi Kúskur býr á Kúskerpi og starfar hjá Kúskerpi Ehf. við hin ýmsu störf sem falla til í landbúnaði, en í vor hefur hann aðallega séð um sáningu og mun síðan koma til með að sjá um rúllubindingu í sumar.

Sigurður er spurður út þau verk sem hann og Kúskerpi Ehf. hafa verið að taka að sér í vor, en þau hafa verið að margvíslegum toga.

„Sko, það er náttúrulega svo svakalega mikið, það er í rauninni bara allt sem kemur að jarðrækt skiluru; það er þá plæging, tæting, sáning, völtun, áburðardreifing og kalkdreifing. Þetta er svona aðaldæmið sem við höfum verið í en margir er náttúrulega með þetta, ég er bara að sá, Helgi Fannar er að plægja, Dóri bróðir (Halldór Einarsson) er í áburðinum og Einar Örn í kalkinu, þetta svona dreifist svona á okkur, en þetta eru verkin sem við höfum verið að taka að okkur í vor.“

„26. apríl byrjuðum við að plægja eyrina á Kúskerpi. Ég sáði síðan í hana tveimur dögum síðar, 28. apríl. Aðstæðurnar, þær voru... þetta bara slapp. Þær voru ekkert mikið betri en það því það var svo kalt í vetur og lítill snjór að frostið náði svo mikið ofan í jörðina og var svo lengi í henni, en eyrin er svona malarmelur þannig að það var ekkert mál. Við rusluðum henni bara á þremur dögum eða eitthvað, plægðum hana, sáðum og völtuðum. Þannig eyrin byrjaði þetta og síðan bara koll af kolli sko.“

„Við erum búin að plægja 200 hektara, 85 af þeim eru fyrir okkur, Kúskerpi Ehf., hitt er fyrir aðra. Ég er búinn að sá í 300 hektara og 85 hektarar af þeim eru líka fyrir okkur.

Sigurður segir að þetta vor sé búið að vera frábrugðið öðrum vorum, en það hefur verið óvenjulega þurrt og kalt í vor.

„Þetta er búið að vera rosalega þurrt vor náttúrulega, bara svona óvenju þurrt, ekki búið að rigna neitt eiginlega og klakinn var svo mikill og lengi að fara úr jörðinni, þannig við þurftum aðeins að velja stykkin til að fara í útaf klaka. En þetta er samt ekkert sem hefur stoppað okkur skiluru. Helgi Fannar var nú að plægja áðan fyrir Gísla Björn á Vöglum og það kom meira að segja aðeins klaki þar, ekkert sem að tefur verkið en það kom samt klaki upp úr jörðinni, 2. júní taktu eftir. Þetta var ekkert svona í fyrra.

„Og svo annað, hvað það var lengi að spíra fræið, ég sáði i eyrina í lok apríl og venjulega tekur þetta svona sjö, átta daga að spíra og koma upp, en núna? Ég veit ekki hvort þetta var hálfur mánuður eða hvað. Næturfrostið var svo mikið, alltaf, í byrjun maí, og náttúrulega engin bleyta, þannig þetta var svo lengi að spíra og koma upp miðað við í venjulegi árferði. Hvað sem við svosem köllum venjulegt.

Sigurður er spurður að því hvenær hann haldi að heyskapur fari af stað, eitthvað sem margir hafa velt fyrir sér.

„Heyrðu, þetta er mjög erfið spurning. En ég ætla að skjóta á að ef við fáum bleytu og það hlýna dálítið hjá okkur, þá er ég að skjóta á 20. júní, eða eitthvað svoleiðis. Að heyskapur fari af stað þá, kannski ekkert á fullt, en fari af stað,“ segir Sigurður kátur að lokum.

 
/SMH