Tún víða skemmd á Norðurlandi vestra

Verið var að vinna í nýrækt í Útvík í fyrrum Staðarhreppi í Skagafirði í vikunni er blaðamaður átti þar leið hjá sl. mánudag. Mynd: PF.
Verið var að vinna í nýrækt í Útvík í fyrrum Staðarhreppi í Skagafirði í vikunni er blaðamaður átti þar leið hjá sl. mánudag. Mynd: PF.

Ljóst er að víða koma tún illa undan snjóþungum vetri á Norðurlandi vestra samkvæmt heimildum Feykis og þá helst nýræktir og yngri tún. Á mörgum bæjum er verulegt kal og sum staðar taka tún hægt við sér þar sem enn er mikill klaki í jörðu og eiga því eftir að þorna.

„Þetta var óvenju erfiður vetur og eðlilegt að gróður sé eftir sig og túnin lengi að taka við sér. Svo hefur víða verið mikill fugl í túnum og tekið það sem var komið og þannig að þau eru snoðin líka,“ segir Eiríkur Loftsson, ráðunautur Ráðgjafamiðstöðvar landbúnaðarins. „Ég er ekki með neina heildarmynd af ástandinu en ég held að kalið sé víða og það getur verið mikið á einhverjum stöðum. Það finnst öllum að kalið sé mikið hjá sér, og það er óvenju mikið, en það er kannski ekki hamfarakal á mörgum bæjum,“ segir Eiríkur segist. Hann segist ekki hafa farið mikið um til að átta sig á umfanginu en segir Hjaltdælinga láta vel af sér en þeir hafa oft lent í slæmu kali í erfiðum vetrum.

„Þetta er víða um fjörðinn. Mikill snjór var á flötum túnum sem endar í svellum og kal myndast jafnvel á bæjum sem ekki hefur kalið lengi. Hægt að finna þvílíkt þar sem sjaldgæft er að kali.“ Að sögn Eiríks eru þeir Fljótamenn sem hann hefur heyrt í ekki svartsýnir þrátt fyrir mikinn snjó.

Aðspurður hvort um mjög slæmt árferði sé að ræða segir Eiríkur ekki þora að segja neitt um það enn þá. „Ég held að stefni ekki í það en auðvitað verður víða minni uppskera út af kali og grisjun í túnum og einhverjir bollar sem kala og grasafjöldinn því minni. Þá ræðst það af sumrinu. Ef það kemur gott sumar þá munu menn ekkert finna fyrir þessu en ef það kemur kalt sumar þá getur það haft áhrif. Ef þetta verður sæmilega gott sprettusumar þá verða líklega engin vandræði, nema kannski á stöku bæjum. Afleiðingarnar fara eftir tíðarfari en það er mjög víða að menn þurfa að laga eitthvað, það er alveg ljóst.“

Ekki verra í mörg ár
Anna Margrét Jónsdóttir, framkvæmdastjóri Búnaðarsambands Húnaþings og Stranda, segir ástandið svipað í Húnaþingi. „Það virðist vera þó nokkuð í Húnavatnssýslum en hef ekkert frétt af Ströndum. Ég veit ekki hvað það þýðir, hvort það sé minna þar en það kom minni snjór þar í desemberveðrinu. Snjóinn tók aldrei almennilega upp og svo voru einhverjir umhleypingar og úr varð ansi mikill klaki á túnum. Í Langadalnum er þetta þó nokkuð mikið, í Svínadal og Blöndudal líka og úr Vestursýslunni þó ég hafi heyrt minna í bændum þar. Þetta er mest á nýræktum eða nýlegum túnum og á sumum bæjum er þetta þó nokkuð mikið.“

Anna Margrét segir ástandið ekki hafa verið svona slæmt í mörg ár og jafnvel ekki síðan hún hóf störf hjá BHS árið 2001. Hún segir bændur hafa verið duglega að rækta tún sín og vallafoxgrasið vera svolítið viðkvæmt fyrir slíkum aðstæðum sem urðu í vetur. „Einhverjir þurfa að rífa upp túnin en þar sem eru bara skellur þá bera menn bara á og það kemur eitthvað upp úr þessu,“ segir hún.

Athugasemdir eru á ábyrgð þeirra sem þær skrá.

Feykir áskilur sér þó rétt til að eyða ummælum sem metin verða sem ærumeiðandi eða ósæmileg.

Smelltu hér til að tilkynna óviðeigandi athugasemdir.

Fleiri fréttir