Unglingadeildin Trölli :: Hafdís Einarsdóttir skrifar
Unglingadeildin okkar, Trölli, var stofnuð árið 1992 og hefur því verið starfrækt í þrjátíu ár. Í upphafi starfsins var unglingadeildin Trölli sér eining innan SVFÍ (Slysavarnarfélags Íslands). Undanfarin ár hefur hún hins vegar verið rekin sem hluti af björgunarsveitinni Skagfirðingasveit.
Á þeim þrjátíu árum sem Trölli hefur verið starfrækt hafa hundruð unglinga tekið þátt í starfi deildarinnar; fengið þjálfun í ýmsum þáttum sem tengjast björgunarsveitarstarfi, eflst í félagslegum þroska, öðlast þekkingu á ábyrgari ferða- og útivistarhegðun og svo mætti áfram telja. Unglingarnir öðlast þekkingu sem skilar sér út í samfélagið okkar. Þekkingu sem aldrei verður tekin af þeim og mun ávallt nýtast þeim á einhvern hátt í lífinu.
Að hafa rúllað hundruðum unglinga í gegnum unglingastarfið þýðir líka að tugir félaga okkar hafa gefið af sínum tíma til þess að efla björgunarsveitarstarfið til framtíðar og leggja til samfélagsins. Sá tími er ómetanlegur og sér í lagi vegna þess að allir stunda þeir einnig æfingar, fjáraflanir og útköll með sveitinni.
Þegar sá hópur sem er á útkallslista í dag er skoðaður kemur í ljós að stærstur hluti þeirra sem þar er hóf björgunarsveitarferilinn sinn í Trölla. Mikilvægi deildarinnar er því mikið og eru félagar okkar fullkomlega meðvitaðir um það. Í dag eru á bilinu 25 til 30 unglingar starfandi með unglingadeildinni auk þess sem fimm félagar Skagfirðingasveitar halda utan um starfið. Þar að auki koma aðrir félagar inn og aðstoða þegar á þarf að halda.
Unglingadeildin æfir einu sinni í viku, mætir á tvo stærri viðburði á vegum félagsins ár hvert; auk annarra smærri viðburða. Starfið telur fleiri hundruð klukkustunda á ári hverju. Þar að auki fá þeir félagar unglingadeildarinnar sem eru komnir á framhaldsskólaaldur að mæta á æfingar hjá eldri deildinni. Þar tengjast ungir og aldnir; þeir ungu fá aukna ábyrgðartilfinningu og erfiðari æfingar og þeir eldri fá tækifæri til að miðla sinni þekkingu, allir eflast.
Að mínu mati er mikilvægasti þáttur unglingastarfsins sú þekking sem við skilum til samfélagsins og tilfinning unglingsins varðandi það að tilheyra einhverjum hópi (e. belonging). Það er þekkt að sú tilfinning skili einstaklingum innihaldsríkara lífi, meira sjálfstrausti og betri líðan. Öll viljum við jú að unglingunum okkar líði vel.
Allir eru velkomnir til starfa hjá okkur í unglingadeildinni (9. bekkur og eldri) og björgunarsveitinni, þar sem styrkleikar hvers og eins fá að njóta sín í mismunandi verkefnum. Það geta allir lagt lið á einhvern hátt og fundið sér hlutverk, svo fremi sem einstaklingurinn hafi félagslegan þroska til að tilheyra hópi, virða aðra og vinna með þeim. Það er gott skref að byrja að æfa þessa þætti í unglingadeildinni.
Ég vil þakka öllum þeim sem hafa lagt unglingadeildinni Trölla lið undanfarin þrjátíu ár og sendi til þeirra stórt hrós fyrir vel unnin störf.
Hafdís Einarsdóttir, formaður björgunarsveitarinnar Skagfirðingasveitar
Fleiri fréttir
-
Erum allar ready í alvöru seríu - segir Brynja Líf
feykir.is Skagafjörður, Íþróttir, Ljósmyndavefur 25.04.2024 kl. 14.22Það hefur verið gaman að fylgjast með liði Stólastúlkna í körfunni í vetur og nú spilar liðið til úrslita um sæti í Subway-deildinni að ári. Það er mikil breyting á liðinu frá því árið áður, mörg púsl bættust í hópinn síðasta haust sem Helgi þjálfari hefur náð að sameina í heilsteypta mynd. Eitt lykilpúslið er Brynja Líf Júlíusdóttir, 16 ára stúlka frá Egilsstöðum, sem kom á Krókinn til að spila með liði Tindastóls og stunda nám á náttúruvísindabraut og í körfuboltaakademíu FNV. Hún er ein efnilegasta körfuboltastúlka landsins í sínum árgangi og í síðasta leiknum gegn Snæfelli á dögunum þá gerði hún átta af tíu stigum Tindastóls í framlengingu.Meira -
Kvenfélag Svínavatnshrepps hélt upp á 150 ára afmælið með kökuveislu af gamla skólanum
feykir.is Austur-Húnavatnssýsla, Mannlíf 25.04.2024 kl. 13.43Kvenfélag Svínavatnshrepps hélt upp á 150 ára afmæli sitt 20. apríl sl. Var öllum kvenfélagskonum í Austur-Húnavatnssýslu boðið í kaffi í Dalsmynni. Þar var mikil kökuveisla sem einkenndist af því að hafa kaffibrauð sem hugsanlega hefði getað verið á borðum er kvenfélagið var stofnað.Meira -
Gleðilegt sumar
feykir.is Skagafjörður, Austur-Húnavatnssýsla, Vestur-Húnavatnssýsla 25.04.2024 kl. 11.55„Það er komið sumar...“ sungu Mannakorn um árið og það á við í dag. Í það minnsta er sumardagurinn fyrsti í dag og þó það sé kannski ekki sami stemmari fyrir þessum degi á þessari öld og var á þeirri síðustu þá fylgir deginum oftar en ekki bjartsýni og ylur í hjarta – já, eiginlega sama hvernig viðrar.Meira -
Giggó-appið snýst um að bjarga sér | Spjallað við Kjartan Hall
feykir.is Skagafjörður, Mannlíf, Lokað efni 25.04.2024 kl. 10.38Í janúar rak blaðamaður augun í nýtt app sem kallast Giggó sem er sett fram af Alfreð. Þar sem það var gamalkunnur Skagfirðingur út að austan, lista- og íslenskumaðurinn Kjartan Hallur frá Melstað í Óslandshlíðinni, sem kynnti þetta á Facebook, var að sjálfsögðu tilvalið að senda á hann nokkrar spurningar. Kjartan Hallur er í Alfreðs teyminu og segir starf sitt hjá Alfreð fyrst og fremst vera að ritstýra, semja texta og samræma skilaboð fyrir appið, heimasíðu og þjónustuvefi Alfreðs. „Og núna hefur Giggó-appið bæst við á verkefnalistann. Þar undir er heimasíða, bloggskrif og vinna í markaðssetningu á þessu nýja verkfæri fyrir íslenska gigg-hagkerfið,“ segir hann.Meira -
Rabb-a-babb 225: Atli Freyr
feykir.is Skagafjörður, Rabb-a-babb 25.04.2024 kl. 09.11Atli Freyr Rafnsson frá Króknum fékk það verðuga verkefni að svara Rabb-a-babbi í Feyki og var það frekar strembin fæðing en útkoman svona ljómandi góð. Atli Freyr er fæddur árið 1997 eða um það leyti sem Tiger Woods vann sitt fyrsta Master mót og fyrsti þáttur af South Park fór í loftið.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.