Elín R. Líndal lést þann 9. maí
Elín Rannveig Líndal frá Lækjamóti í Húnaþingi vestra, fv. sveitarstjórnarfulltrúi og varaþingmaður, lést á Heilbrigðisstofnun Vesturlands á Hvammstanga 9. maí síðastliðinn, tæplega sjötug að aldri.
Elín fæddist á Hvammstanga 24. maí árið 1956. Foreldrar hennar voru Sigurður J. Líndal, bóndi, hreppstjóri og varaþingmaður, og Elín H. Líndal húsmóðir.
Elín tók gagnfræðapróf frá Héraðsskólanum á Reykjum í Hrútafirði og lauk diplómanámi í opinberri stjórnsýslu og stjórnun frá Endurmenntunarstofnun Háskóla Íslands og einnig í rekstrar- og viðskiptafræðum frá Háskólanum á Akureyri.
Elín starfaði lengi á vettvangi stjórnmála, bæði í heimahéraði og á landsvísu. Hún sat í sveitarstjórn Húnaþings vestra í fimm kjörtímabil, fyrstu 20 ár sameinaðs sveitarfélags og var þar áður hreppstjóri Þorkelshólshrepps. Með störfum sínum vann Elín ötullega að uppbyggingu mikilvægra grunnstoða samfélagsins. Hún sat einnig í stjórn Sambands íslenskra sveitarfélaga um árabil.
Elín gegndi ýmsum trúnaðarstörfum fyrir Framsóknarflokkinn, var í landsstjórn, miðstjórn og sveitarstjórnarráði flokksins. Hún tók nokkrum sinnum sæti á þingi sem varamaður á árunum 1988-1999 fyrir Framsókn í þáverandi kjördæmi, Norðurlandi vestra.
Elín sat í ýmsum stjórnum og ráðum, m.a. í stjórn Íbúðalánasjóðs, var formaður Jafnréttisráðs, var í verkefnisstjórn rammaáætlunar um nýtingu vatnsafls og jarðvarma og formaður Tryggingasjóðs sjálfstætt starfandi einstaklinga. Þá var hún í nokkur ár stjórnarformaður Heilbrigðisstofnunarinnar á Hvammstanga.
Auk þess að vera bóndi á Lækjamóti ásamt manni sínum kom Elín að rekstri nokkurra atvinnufyrirtækja og var framkvæmdastjóri Forsvars á Hvammstanga.
Eftirlifandi eiginmaður Elínar er Þórir Ísólfsson, f. 1954. Börn þeirra eru Sigurður, f. 1973, Ísólfur, f. 1978, og Sonja, f. 1986. Barnabörnin eru sjö og barnabarnabörnin tvö talsins.
Útför Elínar fer fram frá Hvammstangakirkju mánudaginn 25. maí kl. 13.
Texti: Morgunblaðið
Fleiri fréttir
-
Sæmilegu veðri spáð um helgina en ekkert til að hrópa húrra yfir
feykir.is Skagafjörður, Austur-Húnavatnssýsla, Vestur-Húnavatnssýsla 22.05.2026 kl. 09.55Oft er talað um hvítasunnuhelgina sem fyrstu alvöru ferðahelgi ársins og kannski fyrstu sumarhelgina. Eitthvað var minnst á það í leiðara vikunnar að spáð væri um 15 stiga hita og björtu um hvítasunnuhelgina. Sú spá virðist nú ekki ætla að halda og hitastigin verða heldur færri og vætan eitthvað meiri en Veðurstofan gerði ráð fyrir í byrjun vikunnar.Meira -
Lokahóf Körfuknattleiksdeildar Tindastóls
feykir.is Skagafjörður, Íþróttir, Lokað efni 22.05.2026 kl. 09.29Lokahóf Körfuknattleiksdeildar Tindastóls verður haldið í Ljósheimum í kvöld. Þar munu leikmenn, þjálfarar, stjórn, sjálfboðaliðar og aðrir gestir fagna góðu og árangursríku tímabili.Meira -
Skipulagsvinna hafin á Hólastað
feykir.is Skagafjörður, Lokað efni 21.05.2026 kl. 16.05Starfsmenn veitu- og framkvæmdasviðs Skagafjarðar hafa nú hafið vinnu við að skipuleggja viðhald og umhirðu á Hólastað en frá þessu segir á heimasíðu Skagafjarðar. Á næstu vikum verður ráðist í lagfæringar á klæðningu gatna og samhliða því er unnið að skipulagningu sláttar og almennrar umhirðu svæða.Meira -
Lestrarferðalag Gúnda geithafs í fullum gangi
feykir.is Skagafjörður, Austur-Húnavatnssýsla, Listir og menning, Lokað efni 21.05.2026 kl. 15.26Bókasöfn landsins standa fyrir lestrarátaki í sumar þar sem markmiðið er að hvetja börn á aldrinum 6-12 ára til að njóta yndislestrar í skólafríi. Lestrarleiðangurinn með Gúnda geithaf hvetur alla til þess að skrá sig með í ferðalagið.Meira
