Fjórtán einbýlishúsalóðir við Nestún á Sauðárkróki lausar til umsóknar
Sveitarfélagið Skagafjörður auglýsti nú í vikunni lausar til umsóknar 14 einbýlishúsalóðir við götuna Nestún á Sauðárkróki, sem er ný gata efst í Túnahverfi. Fram kemur í frétt á Skagafjörður.is að umsóknarfrestur um lóðirnar er frá 16. september til og með 30. september 2021.
Lóðum verður úthlutað í samræmi við úthlutunarreglur sveitarfélagsins. Dregið verður úr umsóknum verði fleiri en einn umsækjandi um lóð. Lóðirnar verða tilbúnar til afhendingar 15. október 2021 en gatan verður malbikuð sumarið 2022.
Í frétt á mbl.is í gær er haft eftir Sigfúsi Inga Sigfússyni sveitarstjóra að eftirspurn eftir lóðum sé umfram væntingar. „Þetta er síðasta gatan í Túnahverfinu hjá okkur. Við erum að úthluta lóðum í fyrrihluta hennar núna og erum með framlengingu af henni í deiluskipulagsvinnu núna þar sem gert er ráð fyrir parhúsum,“ segir Sigfús Ingi en lóðirnar voru auglýstar í fyrradag og var þegar kominn töluverður fjöldi af umsóknum í gær.
Þeir sem áhuga hafa á framangreindum lóðum geta sótt um rafrænt á heimasíðu sveitarfélagsins eða sent inn skriflega umsókn á Skagfirðingabraut 21 á Sauðárkróki. Einnig er hægt að senda umsókn ánetfangið skagafjordur@skagafjordur.is. Deiliskipulag liggur frammi á skrifstofu skipulagsfulltrúa, Skagfirðingabraut 21, Sauðárkróki, á skrifstofutíma frá 10-12 og 12:30-15. Einnig hægt að nálgast gögnin með því að smella hér.
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.