Haldið upp á sjómannadaginn í 85. sinn á Skagaströnd
Sjómannadagurinn er um helgina og það er haldið upp á hann alls konar. Það verður hátíðardagskrá á Hvammstanga sunnudaginn 2. júní og þá munu Hofsósingar sömuleiðis fagna deginum á hefðbundinn hátt. Á Króknum verður SjávarSæla laugardaginn 1. júní en mesta hátíðin verður venju samkvæmt á Skagaströnd en það má segja að Skagstrendingar búi til bæjarhátíð úr sjómannadeginum.
Sú hátíð kallast Hetjur hafsins og stendur yfir í heila fjóra daga og hefst nú seinni part fimmtudags en þá eru íbúar hvattir til að skreyta húsin sín og fuglaskoðunarhúsið á Spákonufellshöfða verður formlega opnað kl. 17.
Flestir þessara viðburða eru auglýstir í Sjónhorninu en einnig má forvitnast um þá á netsíðum sveitarfélaganna. Það er Helena Mara Velemir sem er verkefnastjóri Hetja hafsins og hún segir dagskrána hefjast hægt og rólega á fimmtudagskvöldi sem lýkur seinni partinn á sunnudag. „Dagskráin er fjölbreytt og ætti að ná til fólks á öllum aldri. Við erum að tala um tónleika, litahlaup, pub quiz, tónlistarbingó, dansleik, hoppland, loftbolta, perlað af krafti, flugdrekasmiðju, töfrasýningu, messu, kaffihlaðborð, kayaka, skemmtisiglingu, kappróður, sjóleiki, port party og margt fleira,“ segir Helena.
Eru Skagstrendingar duglegir að taka þátt í dagskránni? „Já, sjómannadagurinn hefur verið ómissandi hefð á Skagaströnd í langan tíma og í ár erum við að halda upp á hann í 85. skipti.“
Er nágrönnum velkomið að kíkja í heimsókn á Skagaströnd og njóta dagskrárinnar með heimamönnum? „Við bjóðum alla nágranna okkar hjartanlega velkomna til að njóta hátíðarinnar með okkur, það væri gaman sjá sem flesta. Ég mæli með að fólk komi og verði hjá okkur yfir helgina hér er frábært tjaldsvæði og fullt af afþreyingu í boði. Það er frisbígolfvöllur á tjaldsvæðinu og flott leiktæki fyrir börnin. Við erum með eina krúttlegustu sundlaug landsins og frábæran veitingastað á höfninni. Síðan má skella sér í golf eða kíkja í nýja fuglaskoðunarhúsið okkar sem verður formlega opnað þessa helgi. Fyrir þá allra hugrökkustu sem vilja skyggnast inn í framtíðina eða vita meira um fortíðina þá geta þeir heimsótt Spákonuhof.
Er Skagaströnd sjóarabær? „Já, það er óhætt að segja það!“ segir Helena Mara að lokum.
Það er óhætt að hvetja íbúa Norðurlands vestra til að taka þátt í sjómannadeginum og gera sér glaðan dag – eða öllu heldur daga – í sumarbyrjun.
Fleiri fréttir
-
Valdís Ósk Óladóttir ráðin í starf ráðgjafa í barnavernd hjá Skagafirði
feykir.is Skagafjörður, Austur-Húnavatnssýsla, Vestur-Húnavatnssýsla 26.07.2024 kl. 13.07Á vef Skagafjarðar segir að Valdís Ósk Óladóttir hefur verið ráðin í starf ráðgjafa í barnavernd á fjölskyldusviði hjá sveitarfélaginu Skagafirði. Valdís er með BSc. gráðu í viðskiptalögfræði frá Háskólanum á Bifröst og ML gráðu í lögfræði frá Háskólanum í Reykjavík. Valdís Ósk hefur góða þekkingu á barnaverndarlögunum og skrifaði meistaraprófsritgerð sína um réttindi barna og þvingunarúrræði skv. barnaverndarlögum. Samhliða námi sínu hefur Valdís Ósk starfað hjá Barna- og fjölskyldustofu og á meðferðarheimilinu Krýsuvík og öðlast þar reynslu í ráðgjöf og vinnslu barnaverndarmála.Meira -
Forvarnaráætlun fyrir leik/grunn og framhaldsskóla á Norðurlandi vestra
feykir.is Skagafjörður, Austur-Húnavatnssýsla, Vestur-Húnavatnssýsla 26.07.2024 kl. 11.44Félags- og skólaþjónusta Austur-Húnvetninga fékk styrk upp á fjórar milljónir frá Sprotasjóði Rannís í maí 2023 til að vinna að forvarnaráætlun fyrir börn á leik/grunn og framhaldsskólaaldri. Markmið verkefnisins var að búa til sameiginlega forvarnaáætlun fyrir Norðurland vestra til fjögurra ára sem stuðla myndi að farsæld og forvörnum allra barna á svæðinu. Forvarnir eru til alls fyrst og er áætlunin öllum aðgengileg á heimasíðum sveitarfélaganna á Norðurlandi vestra.Meira -
Frítt inn á Byggðasafn Húnvetninga og Strandamanna sunnudaginn 28. júlí
feykir.is Skagafjörður, Austur-Húnavatnssýsla, Vestur-Húnavatnssýsla 26.07.2024 kl. 11.11Í tilefni af hátíðinni Eldur í Húnaþingi sem haldin er þessa dagana verður frítt inn á Byggðasafn Húnvetninga og Strandamanna sunnudaginn 28. júlí. Safnið er opið milli kl. 9-17 og er staðsett á Reykjum í Hrútafirði í Húnaþingi vestra, tæpum kílómeter frá þjóðvegi eitt og leggur safnið áherslu á líf og störf fólks og síðari hluta 19. aldar og byrjun þeirrar 20.Meira -
Andri Már stígur á stokk í Mexíkó
feykir.is Skagafjörður, Listir og menning, Mannlíf 26.07.2024 kl. 10.32Feykir hefur aðeins fylgst með ævintýrum Andra Más Sigurðssonar / Joe Dubious á mexíkanskri grundu. Andra kannast margir við sem tónlistarmann og hann var eftirminnilega í framlínu hljómsveitarinnar dáðu, Contalgen Funeral, sem margir sakna. Andri flutti til Mexíkó árið 2019 og bjó í þorpinu La Erre í Guajajuato-fylki síðast þegar Feykir tók á honum púlsinn. Í fyrra sögðum við frá því að Andri væri farinn að láta á sér kræla í tónlistinni í Mexíkó og nú spilaði hann á virtri menningarstofnun, El Museo de la Independencia en Dolores Hidalgo – hvorki meira né minna!Meira -
Sigtryggur og Þórir boðaðir til æfinga fyrir undankeppni Eurobasket 2025
feykir.is Skagafjörður, Austur-Húnavatnssýsla, Íþróttir, Vestur-Húnavatnssýsla 26.07.2024 kl. 10.29Karlalandsliðið Íslands í körfuknattleik verður við æfingar núna síðustu daga júlí mánaðar. Æfingarnar er liður í undirbúningi fyrir síðustu leikina í undankeppni EuroBasket 2025 sem verða spilaðir í nóvember og febrúar. Tveir leikmenn Tindastóls voru boðaðir til æfinga, þeir Sigtryggur Arnar Björnsson og Þórir Þorbjarnarson.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.