Hvað er Húnavaka? Ragnar Z svarar
Í tilefni Húnavöku lagði Feykir nokkrar krefjandi spurningar fyrir nokkra vel valda Húnvetninga. Fyrstur er Ragnar Z Guðjónsson, sem meðal annars stendur fyrir vefmiðlinum góða: Huni.is.
Ef Húnavaka væri hamborgari hvernig væri hann samsettur? „Brioche-brauð úr sveitinni, nautakjöt frá næsta bæ, vel af heimagerðri sósu, rauðlaukur með karakter og extra stór skammtur af gleði á milli. Borið fram með húnvetnskum kartöflum og léttum break-dansi til hliðar”.
Hvernig skemmtir dæmigerður Húnvetningur sér á Húnavöku? „Hann byrjar á því að klæða sig upp í sitt fínasta púss, greiðir sér og snyrtir. Þá er hann fær í flestan sjó og tilbúinn til þess að hitta ættingja, vini, kunningja og aðra hátíðargesti. Hann röltir um hátíðarsvæðið og spjallar við fólk, fær sér pylsu við þjóðveginn, hlær mikið og endar kvöldið á tónleikum eða dansleik með fólki sem hann hefur þekkt síðan í leikskóla. Hinn týpíski Húnvetningur er ávallt jarðbundinn, vinnusamur, hlýr, vel lesinn, náttúrutengdur og stoltur af rótum sínum, og er með sterka samfélagstengingu og rólega og trausta nærveru. Það er alltaf gott að hafa Húnvetning með sér í liði.”
Hvað er ómissandi á Húnavöku? „Fólkið, samfélagið. Sama hversu flott dagskráin er þá er það samveran, stemningin og endurfundirnir sem gera Húnavöku að Húnavöku."
Minnistæð atvik á fyrri Húnavökum? „Húnvetningar hafa áratugum saman haldið Húnavöku og það mætti æra óstöðugan að segja frá því öllu. Það sem stendur upp úr eftir hverja Húnavöku er tilfinning um samveru, samheldni og ánægjuleg mannamót. Fólk man stemninguna á svæðinu, hláturinn, gleðina og samverustundirnar. Dagskráin skapar ramma, en það eru augnablikin á milli atriða, samtölin og andrúmsloftið sem festist í minni.”
Hver er fyndnasti Húnvetningurinn? „Það er erfitt að velja einn og nefna einhver nöfn. Húnvetningar hafa þessa sérstöku blöndu af svörtum og þurrum húmor, tala oft í hálfkveðnum vísum með yfirvegaðri og rólegri framsetningu, sem gerir jafnvel einföldustu athugasemdir fyndnar. Oft er það sá sem segir minnst, brosir lítið en hendir svo einni línu fram sem fær alla til að hlæja.”
Feykir þakkar Ragnari Z kærlega fyrir svörin og óskar honum góðrar skemmtunar á Húnavöku. /hmj
Fleiri fréttir
-
Landsvirkjun hélt upp á 35 ára afmæli Blöndustöðvar
feykir.is Skagafjörður, Austur-Húnavatnssýsla, Vestur-Húnavatnssýsla, Mannlíf, Lokað efni 15.07.2026 kl. 10.46Landsvirkjun hélt upp á 35 ára afmæli Blöndustöðvar á laugardaginn og þótti hátíðin heppnast vel. Vígsla Blöndustöðvar árið 1991 markaði mikil tímamót í íslenskri raforkusögu. Blöndustöð er aflstöð Blönduvirkjunar, ein stærsta vatnsaflsvirkjun landsins, og var hún tekin í notkun eftir umfangsmiklar framkvæmdir sem hófust árið 1984.Meira -
40 vaskir kvenkylfingar tóku þátt í Minningarmóti Evu Hrundar
feykir.is Austur-Húnavatnssýsla, Íþróttir 15.07.2026 kl. 08.44Fjórða Minningarmót Evu Hrundar var haldið á Vatnahverfisvelli við Blönduós sunnudaginn 12. júlí. Á mótið mættu 40 vaskar konur víðs vegar af landinu og áttu 14 golfklúbbar fulltrúa á mótinu að þessu sinni. Færri komust að en vildu og það hefur verið gaman að fylgjast með mótinu vaxa og dafna og festa sig í sessi meðal keppenda. Sumar hafa komið öll fjögur skiptin.Meira -
Hvatning frá formanni UMFT vegna Unglingalandsmóts
feykir.is Skagafjörður, Íþróttir, Aðsendar greinar 15.07.2026 kl. 08.10Framundan er Unglingalandsmót á Sauðárkróki um verslunarmannahelgina. Landsmótið er frábært tækifæri til að hittast og styðja við íþróttastarf Tindastóls. Ég hvet félagsmenn, foreldra, stuðningsmenn og velunnara til að skrá sig í sjálfboðaliðastarf fyrir sína deild. Hvert framlag skiptir máli og hjálpar okkur að skapa góða upplifun fyrir gesti og þátttakendur.Meira -
Námskeið í eldsmíði fór fram í FNV í seinustu viku
feykir.is Skagafjörður, Mannlíf, Lokað efni 14.07.2026 kl. 15.07Dagana 6. til 10. júlí fór fram námskeið í Verknámshúsi FNV sem sneri að eldsmíði og íslenskri menningu. Námskeiðið var auglýst á vegum UNESCO og tvær konur sóttu það, þær komu frá Bandaríkjunum og Finnlandi. Þetta er í fyrsta skipti sem slíkt eldsmíðanámskeið fyrir konur er haldið hjá FNV. Björn Sighvatz, kennari námskeiðsins, sagði í samtali við Feyki að ferlið hafi gengið einstaklega vel og hann vonist til þess að halda slík námskeið aftur.Meira
