Rúnar Már kominn til CFR Cluj í Rúmeníu
Íslenski landsliðsmaðurinn og Skagfirðingurinn Rúnar Már Sigurjónsson hefur komist að samkomulagi við Astana um að rfita samningi sínum við félagið og hefur nú fært sig um set því í framhaldinu skrifaði hann undir tveggja ára samning við rúmenska stórliðið CFR Cluj sem hefur af og til leitt gæðinga sína fram á sparkvelli Meistaradeildarinnar í knattspyrnu.
Rúnar Már er þrítugur miðjumaður sem hefur leikið með liði Astana frá Kasakstan síðustu tvö árin og með þeim rættist gamall draumur Rúnars um að spila á Old Trafford . Rúnar skoraði 13 mörk fyrir Astana og lagði upp önnur átta í 40 leikjum fyrir félagið en hann var einn besti maður liðsins og tókst að vinna deildina í Kasakstan árið 2019 og Ofurbikarinn ári síðar.
CFR Cluj hefur sex sinnum orðið meistari í Rúmeníu frá 2008 en liðið situr nú í 2. sæti rúmensku deildarinnar með 47 stig og á leik til góða á topplið Steaua Bucharest. Cluj gat komist á toppinn í gærkvöldi en tapaði 2-1 gegn FC Botosani.
Rúnar á 30 leiki að baki fyrir íslenska A-landliðið en hann er uppalinn á Króknum og hóf meistaraflokksferillinn með liði Tindastóls – sennilega aðeins 14 ára gamall. Frá Stólunum lá leiðin í HK og síðan Val þar sem hann sannaði sig rækilega og þaðan lá leiðin í atvinnumennskuna þar sem hann hefur spilað með liðum í Svíþjóð, Sviss, Kasakstan og nú Rúmeníu.
Feykir óskar Rúnari Má góðu gengi innan sem utan vallar.
- - - - -
Heimild: Fótbolti.net og Mbl.is
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.