Seltirningar skelltu Stólunum á Króknum
Gróttumenn komu í heimsókn á Krókinn í dag og öttu kappi við lið Tindastóls í 12. umferð 2. deildar karla í knattspyrnu. Heimamenn höfðu gert sér væntingar um að byrja síðari umferðina í deildina á jákvæðan hátt eftir ágæta leiki upp á síðkastið. Gestirnir voru hinsvegar sterkari aðilinn frá fyrstu mínútu til þeirrar síðustu og fjögur mörk þeirra í síðari hálfleik var kannski einum of mikið af því vonda en lokatölurnar engu að síður 0-4.
Leikmannaglugginn er nú opinn og Stólarnir höfðu krækt í einn erlendan leikmann, Nile Alexander Walwyn, sem kom frá ÍR. Hann fór meiddur af velli eftir hálftíma leik í dag. Í raun vantar liðið fyrst og fremst sterkan framherja til að geta barið betur frá sér út tímabilið. Það vantaði Jóhann Ólafs í liðið í dag en í hans stað var Konni fyrirliði færður af miðjunni og í fremstu víglínu, væntanlega með það að markmiði að hann næði að halda boltanum uppi á toppi og ná að dreifa spilinu. Sú tilraun gaf ekki góða raun og nokkuð ljóst að kraftar hans nýtast best í hjarta liðsins.
Sem fyrr segir tók Grótta strax völdin í leiknum og þeir Seltirningar náðu að spila boltanum ágætlega og leysa þær stöður sem upp komu í leiknum mun betur en Stólarnir sem náðu litlum takti í leik sinn. Santiago hafði nóg að gera í marki Stólanna og varði oft með miklum ágætum. Engu að síður voru það Stólarnir sem fengu besta færi fyrri hálfleiks þegar Arnar Ólafs fékk fína stungu inn fyrir vörn Gróttu, hann brunaði aleinn inn á teig og setti boltann framhjá Jóni Rivine í marki gestanna en því miður í utanvert hliðarnetið. Staðan var 0-0 í hálfleik.
Björn Axel Guðjónsson gerði fyrsta mark leiksins á 54. mínútu þegar hann slapp inn fyrir vörn Stólanna eftir ágætt spil og hann kláraði þröngt færi laglega. Á 67. mínútu unnu gestirnir síðan tvö návígi á vallarhelmingi Stólanna, sem vildu reyndar fá dæmda aukaspyrnu, og í kjölfarið skoraði Ásgrímur Gunnarsson með góðu skoti. Eftir þetta var því miður mesti vindurinn úr liði Tindastóls og lið Gróttu opnaði vörn heimamanna hvað eftir annað of auðveldlega. Þeir bættu við tveimur ódýrum mörkum á 87. og 89. mínútu en þar voru á ferðinni Pétur Árnason og Ásgrímur með sitt annað mark. Úrslitin 0-4.
Það var eitthvað ójafnvægi í leik Stólanna í dag. Konni fann sig engan veginn í framlínunni og Benni komst aldrei í takt við leikinn. Helsta ógn Stólanna upp á síðkastið hefur verið hraði og áræðni Stefans Lamanna og hann átti nokkra ágæta spretti en Gróttumenn tóku hann engum vettlingatökum, brutu ítrekað á honum þannig að hann fór heldur hægar yfir þegar á leikinn leið. Varnarleikur Tindastóls var áhyggjuefni í síðari hálfleik en lið Gróttu er skipað góðum leikmönnum sem kunnu að komast framhjá andstæðingum sínum og spila boltanum vel.
Að viku liðinni spila Stólarnir aftur hér heima en þá kemur topplið Aftureldingar úr Mosfellsbæ í heimsókn. Miðvikudaginn 1. ágúst mæta síðan Þróttarar úr Vogum á Krókinn þannig að það er nóg af fótbolta á næstunni. Áfram Tindastóll!
Fleiri fréttir
-
Umhverfisdagur FISK Seafood 2024
feykir.is Skagafjörður, Austur-Húnavatnssýsla, Vestur-Húnavatnssýsla, Fréttir 20.04.2024 kl. 00.12Umhverfisdagur FISK Seafood verður haldinn 4. maí nk. frá klukkan 10-12. Áætlað er að tína rusl á strandlengjunni á Sauðárkróki (sem verður skipt upp í svæði), Nöfunum, í Varmahlíð, á Hólum og á Hofsósi. Frá 12:15 mun FISK Seafood bjóða öllum þátttakendum að þiggja veitingar að Sandeyri 2.Meira -
Ævintýrið úti hjá liði Tindastóls
feykir.is Skagafjörður, Íþróttir 19.04.2024 kl. 23.34Strax í haust voru bara þrjú hjól undir bíl meistara Tindastóls og eftir það var nánast sama hvaða hindrun varð á vegi hans, það varð allt til að hægja ferðina. Hann hökti reyndar inn í bikarúrslit og í úrslitakeppnina þó með naumindum væri. Stólakagginn sem allir biðu eftir að hrykki í gírinn, kæmi sterkur inn á endasprettinum, var eiginlega hálf vélarvana allt tímabilið. Leikurinn í Smáranum í kvöld var reyndar góður en enn og aftur voru Stólarnir sjálfum sér verstir. Lokakarfan var Grindvíkinga og hún skipti sköpum – lokastölur 91-89. Stólarnir því snemma í sumarfrí þennan veturinn og kannski allir fegnir – þessi bíll þarf í allsherjar yfirhalningu.Meira -
Gul viðvörun á Norðurlandi vestra
feykir.is Skagafjörður, Austur-Húnavatnssýsla, Vestur-Húnavatnssýsla 19.04.2024 kl. 22.24Veðurstofan hefur smellt á okkur gulri veðurviðvörun mest allan laugardaginn og fram á aðfaranótt sunnudags. Gert er ráð fyrir ört hækkandi hita og því má búast má við miklum leysingum, auknu afrennsli og vatnavöxtum í ám og lækjum. Mikilvægt er að hreinsa frá niðurföllum til að forðast vatnstjón vegna rigningar og leysingavatns. Gula viðvörunin gildir fyrir Vestfirði og allt Norðurland.Meira -
Venju samkvæmt er Stólastúlkum spáð falli
feykir.is Skagafjörður, Íþróttir 19.04.2024 kl. 15.44Það eru nokkrir fjölmiðlar sem spá fyrir tímabilið í Bestu deild kvenna í knattspyrnu og jafnan er liði Tindastóls spáð falli, ýmist 9. eða 10. sæti. Í árlegri spá fyrirliða, þjálfara og forráðamanna er liðinu spáð níunda sæti en liði Keflavíkur því neðsta. Íslandsmeisturum Vals er aftur á móti spáð titlinum og Blikum öðru sæti. Grönnum okkar í Þór/KA er síðan spáð þriðja sætinu.Meira -
Við erum ótrúlega rík af fólki | LS Lulla í spjalli
feykir.is Skagafjörður, Listir og menning, Mannlíf 19.04.2024 kl. 14.40„Litla hryllingsbúðin er skemmtilega fjölbreytt verk með miklum söng og er skemmtileg dramatísk hrollvekja,“ segir Sigurlaug Dóra Ingimundardóttir (Lulla), formaður Leikfélags Sauðárkróks, þegar Feykir spyr hana hvað hún geti sagt um Sæluvikustykki LS þetta árið. Æfingar standa nú yfir en frumsýnt verður í Bifröst á Sauðárkróki sunnudaginn í Sæluviku en samkvæmt áreiðanlegum heimildum Feykis er hér um að ræða 146. sýningu Leikfélags Sauðárkróks frá því það var endurvakið árið 1941.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.