Skáli frá Víkingaöld
Undangengnar tvær vikur hefur staðið yfir fornleifauppgröftur á vegum Fornleifadeildar Byggðasafns Skagfirðinga á bænum Hamri í Hegranesi. Ástæða þess að ráðist var í rannsóknirnar eru þær að ábúendur hyggjast byggja við íbúðarhúsið sem stendur á gamla bæjarstæðinu. Það var því strax ljóst kanna þyrfti fornleifar á svæðinu áður en grunnur yrði tekinn.
Á svæðinu norðan við íbúðarhúsið þar sem viðbyggingin á að rísa stóð fjós og hlaða fram á 20. öld, en þar áður eldri torfbær, gangabær sem rifinn var um 1930. Uppdráttur er til af þeim bæ gerður af Hróbjarti Jónassyni og taldi hann bæinn að grunni til frá því um aldamótin 1800.
Við upphaf rannsókna í vor var hreinsað uppúr skurði sem lá þvert yfir svæðið og tengdist áðurnefndri fjósbyggingu. Í skurðinum mátti sjá umtalsverðar byggingaleifar sem virtust flestar tilheyra gamla gangabænum, en auk þeirra sáust undir auðþekktu hvítu gjóskulagi frá Heklu sem féll árið 1104, bæði torf- og kolaleifar sem vitnuðu forna byggð. Þessar eldri mannvistarleifar voru hins vegar sundurgrafnar af yngri byggingum, frárennslis- og lagnaskurðum og því var talið ólíklegt að heilleg mynd fengist af þeim.
Það kom rannsakendum því verulega á óvart á síðustu dögum rannsóknarinnar, þegar búið var að skrá og mæla inn a.m.k. tvær kynslóðir gangabæja á blettinum, að í ljós komu lítið röskuð gólflög og fornt eldstæði. Þegar grafið var útfrá gólflögunum sáust rótuð torflög sitt hvoru megin og örlitlar leifar af undirstöðum veggja –og smátt og smátt fór skáli að taka á sig mynd.
Skálinn hefur verið 4m breiður um miðbikið og a.m.k. 9m langur, en vegna rasks er það ekki að fullu ljóst. Í miðju gólfi var um 1m langt eldstæði eða langeldur og ummerki um bekki eða set með langhliðum. Í torfi skálans mátti greina gjósku sem talið er að sé úr gosi frá Vatnajökli frá því um 1000. Eftir er að senda sýni úr gjóskunni til frekari greiningar, en flest bendir til að skálinn sé frá 11. öld.
Ummerki um eldsmíði voru í öðrum enda skálans, gjall og sindur í gólflögum, en gólfin að öðru leyti lík því sem við er að búast í mannabústað frá þessum tíma. Nánari úrvinnsla og greining sýna á vafalaust eftir að varpa betra ljósi á hvað þar fór fram og hvað íbúar skálans aðhöfðust.
/Fréttatilkynning
Fleiri fréttir
-
Varmahlíðarskóli endaði í 3ja sæti í Skólahreysti
feykir.is Skagafjörður, Austur-Húnavatnssýsla, Íþróttir, Vestur-Húnavatnssýsla, Lokað efni 25.05.2025 kl. 22.55Í gærkvöldi fór fram æsispennandi úrslitakeppni í Skólahreysti og í tólf skóla úrslitum áttu tveir skólar á Norðurlandi vestra sína fulltrúa; Grunnskóli Húnaþings vestra og Varmahlíðarskóli. Bæði lið stóðu sig frábærlega og Varmhlíðingar gerðu sér lítið fyrir og náðu besta árangri sínum í Skólahreysti frá upphafi, lentu í þriðja sæti og Húnvetningar voru sæti neðar en með jafn mörg stig.Meira -
Ekki vika sem haldið verður upp á hjá UMFT
feykir.is Skagafjörður, Íþróttir, Lokað efni 25.05.2025 kl. 18.58Sandgerðingar komu í heimsókn á Krókinn í gær og öttu kappi við lið Tindastóls í 3. deild karla í knattspyrnu. Því miður urðu heimamenn að sætta sig við 0-1 tap og eru nú ásamt gestunum um miðja deild eftir tvö svekkjandi töp.Meira -
Axel Íslandsmeistari í pílu í U18 flokki stráka
feykir.is Skagafjörður, Íþróttir, Lokað efni 24.05.2025 kl. 18.08Það fór þó aldrei svo að Axel Arnarsson yrði ekki Íslandsmeistari í vikunni. Í dag varð hann fyrsti Íslandsmeistari Pílukastfélags Skagafjarðar þegar hann sigraði í U18 flokki stráka en fyrr í vikunni munaði mjóu að hann yrði Íslandsmeistari í körfuknattleik með meistaraflokki Tindastóls.Um var að ræða Íslandsmót ungmenna í pílu sem fram fór á Bullseye í Reykjavík.Meira -
Fann þegar hún var skiptinemi á Ítalíu hvað tónlist getur verið mikll félagi / VIGDÍS HAFLIÐA
feykir.is Vestur-Húnavatnssýsla, Tón-Lystin, Lokað efni 24.05.2025 kl. 17.27Það fer ekkert alltaf allt eins og planað er þrátt fyrir góðan vilja. Þannig til dæmis ætlaði snillingurinn sem hún Vigdís Hafliðadóttir er að svara Tón-lystinni og nokkrum spurningum um ferminguna í tíma fyrir útgáfu Fermingar-Feykis. En svo togar lífið í nokkra spotta og tíminn flýgur út i tómið. Vigdís var engu að síður harðákveðin í því að bregðast Feyki ekki og eftir þétta vinnutörn stökk hún í að klára að svara.Meira -
Heimavöllur Húnvetninga heldur áfram að gefa
feykir.is Austur-Húnavatnssýsla, Íþróttir, Vestur-Húnavatnssýsla, Lokað efni 24.05.2025 kl. 17.15Lið Kormáks/Hvatar og Kára frá Akranesi mættust í fjórðu umferð 2. deildar karla í knattspyrnu á Blönduósi í dag. Liðin höfðu mæst fjórum sinnum áður og jafnan verið hart barist og alls kyns óvænt atvik litað leiki liðanna. Eitt mark dugði þó til að fá fram hagstæð úrslit fyrir Húnvetninga og 1-0 sigur staðreynd.Meira
