Fréttir

Körfuboltinn fer aftur af stað eftir jólafrí í kvöld, en þá mæta Breiðhyltingarnir í ÍR í Síkið og etja kappi við heimamenn í liði Tindastóls. Leikurinn hefst kl. 19:15 og vonandi verða Stólarnir straumlínulagaðir eftir fríið því nú er ekkert annað í spilunum en að hífa sig upp stigatöflu Dominos-deildarinnar.

Baráttan fyrir lægri húshitunarkostnaði hefur staðið lengi. Núna getum við fagnað því að mikilvægum áfanga er náð. Með lögum sem tóku gildi nú um áramótin og lögum sem lúta að jöfnuði í orkukostnaði dreifbýlis og þéttbýlis, eru stigin stærri og varanlegri skref í þessum efnum en við höfum lengi séð.

Í tilkynningu frá Fjölbrautaskóla Norðurlands vestra segir að skráningu í fjarnám á vorönn 2016 ljúki á morgun, föstudaginn 8. janúar. Fjölmargir áfangar eru í boði í fjarnámi.

Í upphafi árs lítum við yfir farinn veg og stígum á stokk og heitum á okkur sjálf að ná árangri í þeim verkefnum sem við erum að kljást við hverju sinni. Á Alþingi eru það fjárlögin sem endurspegla stefnu hverrar ríkisstjórnar og stjórnarandstaðan glímir við að ná fram breytingum á í takt við stefnu sinna flokka.

Eins og Feykir hefur fjallað um var nefnd um sameiningu hestamannafélaganna í Skagafirði að störfum stóran hluta síðasta árs. Ákveðið var að stofna nýtt hestamannafélag í Skagafirði við sameiningu félaganna þriggja sem fyrir voru, Svaða, Léttfeta og Stíganda. Þá hefur verið ákveðið að nýtt félag beri nafnið Skagfirðingur.

Karlakór Bólstaðarhlíðarhrepps og Rökkurkórinn, halda sína árlegu nýársgleði í Húnaveri nk. laugardag kl. 20:30. Samkvæmt Facebook-síðu viðburðarins er dagskráin hefðbundin, „eðal lambakjöt af húnvetnskum heiðum a l a mamma, söngur, grín og glens og svo dansleikur með Geirmundi Valtýssyni til kl. 2:00.“

Frjálsíþróttadeild UMFT hefur nú dregið í jólahappdrættinu. Frjálsíþróttahópurinn þakkar fyrirtækjum og einstaklingum í Skagafirði fyrir góðar viðtökur og stuðninginn.

Smávægilegar tímabreytingar verða gerðar á strætóleiðum 52, 55, 57, 75 og 88 á landsbyggðinni og taka þær gildi sunnudaginn 3. janúar 2016. Það er leið 57 sem ekur um Norðurland vestra.

Rétt fyrir jólafrí barst Varmahlíðarskóla vegleg gjöf frá versluninni Vélaval í Varmahlíð. Það var verslunarstjóri Vélavals, Sigrún Guðlaugsdóttir, sem færði nemendum skólans 30 útivesti merkt Varmahlíðarskóla, en þau eru í nokkrum stærðum og passa því nemendum á öllum aldri.

Rétt fyrir áramót var stofnað Menningarfélag Húnaþings vestra. Vilhelm Vilhelmsson og Sigurvaldi Ívar Helgason stóðu fyrir stofnun félagsins og boðuðu til stofnfundar þriðjudaginn 29. desember síðastliðinn. Tilgangur félagsins er að hlúa að og styðja við hvers kyns menningarstarfsemi í Húnaþingi vestra og þá einkum með rekstri húsnæðis undir slíka starfsemi.