Fréttir

Á föstudagskvöld fór fram úrtaka fyrir KS-Deildina 2016. Fjögur lið voru skráð til leiks og keppt var í fjórgangi og fimmgangi og tóku tveir knapar úr hverju liði þátt í hvorri grein. Búið var að auglýsa eitt laust sæti í deildinni en ákvað stjórn KS-Deildarinnar að bjóða tveimur stigahæstu liðunum þátttöku eftir kvöldið.

Starfs- og heimilisfólki dvalarheimilisins á Sauðárkróki hrintu af stað söfnun fyrir nýju hjóli. Ekki er um hefðbundið reiðhjól að ræða heldur rafknúið hjól sem tekur farþega. Flytja þarf hjólið inn frá Danmörku og er það væntanlegt til Íslands í mars- eða aprílmánuði en því fylgir mikill kostnaður.

Stjarnan og Tindastóll mættust í spennandi körfuboltaleik í Garðabænum síðastliðið föstudagskvöld. Sóknarleikur Stólanna var varla til staðar í fyrri hálfleik en í þeim síðari létu þeir sverfa til stáls en boltinn fell betur fyrir Garðbæinga á lokamínútunum og þurftu Tindastólsmenn því að hverfa stigalausir úr svefnbænum. Lokatölur 81-76.

Einstaklega fallegt og dulmagnað veður var í Skagafirði sl. fimmtudag. Fjörðurinn var sveipaður frostþoku mestallan daginn en inn á milli létti til og þá skein vetursólin yfir fagurt landslagið sem var hulið nýföllnum snjó.

Ný samþykkt um búfjárhald í þéttbýli í Sveitarfélaginu Skagafirði sem samþykkt var samhljóða á sveitarstjórnarfundi þann 14. október 2015 hefur tekið gildi. Á vef Svf. Skagafjarðar segir að þeir sem eiga, eða hafa í umsjón sinni búfé, skulu hafa sótt um búfjárleyfi fyrir 1. apríl 2016. Umsóknum skal skila í móttöku Ráðhússins.

Uppbyggingarsjóður Norðurlands vestra auglýsir eftir umsóknum um styrki til menningarstarfs og atvinnuþróunar og nýsköpunar. Á árinu 2016 verður ein aðalúthlutun með umsóknarfresti til og með 15.febrúar nk.

Í tilkynningu frá Hitaveitu Húnaþings vestra segir að við reglulegan álestur á hitaveitumælum hafi komið í ljós mikil almenn heitavatnsnotkun á árinu 2015.

Rætt var við Stefán Vagn Stefánsson, formann byggðaráðs Sveitarfélagsins Skagafjarðar, í hádegisfréttum Ríkisútvarpsins í dag. Þar sagði hann sveitarfélagið ætla að leita skýringa hjá Íslandspósti á þeirri skertu póstþjónustu sem fyrirsjáanleg er í sveitarfélaginu með fækkun á dreifidögum í dreifbýli. Stefán segir fækkun daga við póstdreifingu ganga þvert á það sem Íslandspóstur boðaði þegar pósthúsum í firðinum var fækkað.

Byggðarráð Sveitarfélagsins Skagafjarðar hefur samþykkt að setja á fót sérstaka byggingarnefnd fyrir Sundlaug Sauðárkróks. Nefndin skal hafa yfirumsjón með fyrirhuguðum viðhalds- og nýframkvæmdum á Sundlaug Sauðárkróks ásamt hönnun.

Mannamót eru handan við hornið og fresturinn rennur út í dag. „Sýningin Mannamót sem haldin er fimmtudaginn 21. janúar í flugskýli Ernis er kjörinn vettvangur fyrir fyrirtæki á landsbyggðinni til þess að koma vöru sinni á framfæri,“ segir í fréttatilkynningu frá Markaðsstofu Norðurlands.