Fréttir

Það hefur mikið gengið á á Reykjanesinu eins og öllum ætti að vera kunnugt. Órói, gosórói og óróapúlsar mælast á tækjum Veðurstofunnar og almenningur fylgist spenntur með framvindu mála. Þá má nú ekki gleyma öllum sviðsmyndunum sem dregnar hafa verið upp um yfirvofandi atburðarrás. Hvort gos sé í vændum eða ekki er erfitt að segja og alveg sérstaklega svona fyrirfram. Það eina sem vitað er með vissu er að það mun gjósa, kannski á morgun eða eftir viku, mánuð, ár eða öld, enginn veit. Vissulega mun gjósa.

AFLATÖLUR | Dagana 28. febrúar til 6. mars 2021 á Norðurlandi vestra Á Króknum var aðeins landað þrisvar sinnum í síðustu viku og voru það allt togarar, Arnar HU 1, Dragney SK 2 og Málmey SK 1. Heildaraflinn var 761.339 kg en það var Arnar sem landaði mest eða rúmum 528 tonnum. Á Skagaströnd voru aftur á móti þrettán landanir og var það Ólafur Magnússon HU 54 sem landaði oftast eða þrisvar sinnum. Heildaraflinn á Skagaströnd var 25.908 kg og það var Alda HU 112 sem landaði mest eða tæpum 8 tonnum. Heildaraflinn á Norðurlandi vestra var 787.247 kg.

Þegar kólnar svona í veðri þá langar mig helst til að skríða undir teppi upp í sófa og horfa á Netflix, þegar ég kem heim úr vinnunni á virkum dögum. Þá endar kvöldmaturinn yfirleitt með því að það er eitthvert snarl í matinn, krökkunum til mikillar gleði. En um helgar er annað upp á teningnum en þá nenni ég að brasa aðeins í eldhúsinu og þá er gott að eiga nokkrar góðar uppskriftir til að matreiða.

Góð þátttaka var á íbúafundum um mögulega sameiningu Blönduósbæjar, Húnavatnshrepps, Skagabyggðar og Skagastrandar þann 3. og 6. mars sl. en þeir voru haldnir í gegn um fjarfundakerfi. Á fyrri fundinn skráðu sig um 100 þátttakendur, en á heimasíðu verkefnisins segir ljóst að við nokkrar tölvur hafi fleiri en einn tekið þátt. Auk þeirra fylgdust svo rúmlega hundrað manns með útsendingu á Facebooksíðunni „Húnvetningur“.

Nú er í gildi gul viðvörun vegna veðurs fyrir Faxaflóa, Breiðafjörð, Vestfirði og Strandir og Norðurland vestra, þar sem íbúar svæðisins mega búast við hvassviðri, stormi, snjókomu og skafrenningi. Þá er varað við versnandi akstursskilyrði en blint getur orðið einkum á fjallvegum. Á heimasíðu Vegagerðarinnar kemur fram að á Holtavörðuheiði sé hálka og hvassviðri og vegna vinnu við Heiðarsporð er umferðarhraði lækkaður niður í 50 km/klst. og gæti komið til stuttra lokana næstu vikur.

Á fundi byggðarráðs Húnaþings vestra þann 11. janúar sl. var samþykkt að skipa starfshóp um framtíðarsýn íþrótta- og útivistarsvæðisins í Kirkjuhvammi ofan Hvammstanga sem hefði það hlutverk að koma með tillögur að framtíðarnýtingu svæðisins sem rúmast skuli innan gildandi deiliskipulags.

Stólastúlkur léku við sameinað lið Hamars/Þórs í Icelandic Glacial höllinni í Þorlákshöfn í gærkvöldi og þurftu sigur til að auka möguleika sína á sæti í úrslitakeppni 1. deildar kvenna. Heimastúlkur þurftu sömuleiðis sigur og því útlit fyrir hörkuleik. Sú varð raunin og sérstaklega var síðari hálfleikurinn jafn og spennandi. Síðustu fjórar mínútur leiksins urðu hins vegar Stólastúlkum að falli því þá skoruðu þær ekki eitt einasta stig og lið H/Þ vann leikinn 71-60.

Í úthlutun Framkvæmdasjóðs ferðamannastaða fyrir árið 2021 fékk Húnavatnshreppur 51.500.000.- krónur til uppbyggingar á Þrístöpum, aðkomusvæði, bílastæði, stígagerð og fræðsluskilti.

Mánudaginn 1. mars síðastliðinn skrifaði Verkís verkfræðistofa undir leigusamning við Ámundakinn ehf vegna skrifstofuhúsnæðis að Húnabraut 13 á Blönduósi. Þar hefur Verkís nú þegar opnað skrifstofu og er stefnt að því að hún verði opin einu sinni í viku að jafnaði og jafnvel oftar ef þörf þykir.

Sveitarstjórn Sveitarfélagsins Skagafjarðar samþykkti á fundi 24. febrúar sl. tillögu að deiliskipulagi fyrir nýja götu, Nestún, í Túnahverfinu svokallaða á Sauðárkróki. Á sama fundi var einnig samþykkt tillaga að deiluskipulagi fyrir Depla í Fljótum.