Fréttir

Hola, sem grafin var við göngustíg við Geitagerði á Hólum í Hjaltadal, hefur staðið opin frá því í fyrrahaust, íbúum og öðrum vegfarendum um svæðið til ama og torveldar gönguleiðina. Að sögn eins vegfaranda, sem hafði samband við Feyki, er slysahætta af holunni sem ómögulegt er að sjá hvaða hlutverki gegnir þarna.

Ný stjórn var kosin á aðalfundi körfuknattleiksdeildar Tindastóls sem fram fór sl. miðvikudagskvöld og segir í færslu deildarinnar á Facebook-síðu hennar að ljóst var fyrir fundinn að mikil endurnýjun yrði í stjórn að þessu sinni þar sem einungis þrír aðilar úr fyrri stjórn gáfu kost á sér til áframhaldandi setu.

Búist er við vaxandi hvassviðri á Norðurlandi og Vestfjörðum í kvöld og nótt og hefur Veðurstofan gefið út appelsínugula viðvörun vegna þess fyrir morgundaginn og fram á laugardagsmorgun. Í athugasemd veðurfræðings segir að ekkert ferðaveður verði fyrir ferðahýsi eða húsbíla og einnig geti verið mjög erfitt að vera í tjaldi í slíkum vindi.

Kvennaliði Tindastóls gæti bæst liðsauki í baráttunni í Pepsí Max deildinni í sumar en von er á 25 ára gamalli slóvenskri landsliðskonu, Tina Marolt, næsta mánudag. Að sögn Óskars Smára mun hún æfa með liðinu mánudag og þriðjudag.

Síðastliðinn mánudag héldu Hollvinasamtök HSB á Blönduósi síðbúinn afmælisfagnað í tilefni 15 ára afmælis samtakanna, en afmælið var þann 19. apríl í fyrra. Í því tilefni var efnt til söfnunar til kaupa á rafknúnum sturtustól á sjúkradeild A og 75“ snjall-sjónvarpstæki á 4. hæð. Ákveðið var að bjóða þeim sem styrktu söfnunina í afmæliskaffi.

Alþingi samþykkti á dögunum breytingar á lögum til að færa eftirlit með póstþjónustu til Byggðastofnunar með það að markmiði að tryggja skilvirka þjónustu um allt land. Byggðastofnun tekur formlega við málaflokknum 1. nóvember nk.

Sveitarfélagið Skagafjörður og Ræktunarsamband Flóa og Skeiða ehf undirrituðu nú nýverið undir samning um borun eftir heitu vatni í Varmahlíð. Fyrirhugað er að bora nýja vinnsluholu við Reykjahól fyrir heitu vatni á allt að 700 metra dýpi. Jarðborinn Trölli hefur nú þegar hafið borun og gengur verkið samkvæmt áætlun. Áætlaður kostnaður hljóðar upp á 50 milljónir króna og er gert ráð fyrir verklokum í lok ágúst samkvæmt samningi.

Á fundi sveitastjórnar Húnavatnshrepps sem fram fór í gær, þann 22. júní, ályktaði meirihluti sveitastjórnar að ekki skuli vera gengið til annars konar sameiningarviðræðna að svo stöddu. Það hefur verið í umræðunni að Húnavatnshreppur og Blönduósbær sameinist vegna þess að íbúar sveitarfélagana beggja kusu með upphaflegu sameiningartillögunni.

Á heimasíðu Húnaþings vestra er auglýst eftir umsóknum um úthlutun styrkja úr Atvinnu- og nýsköpunarsjóði Húnaþings vestra. Markmið sjóðsins er að hvetja til jákvæðrar umræðu og verkefna á sviði atvinnuþróunar í sveitarfélaginu og er ætlað að styðja við frumkvæði íbúa og hvetja til samstarfs og nýsköpunar.

Ferðafélag Skagfirðinga verður með fyrstu göngu sumarsins á morgun, fimmtudaginn 24. júní. Mæting er við Arion banka kl. 17:00, þar sem sameinast verður í bíla. Gengið verður í Trölla og þar mun ferðafélagið bjóða upp á grillaðar pylsur. Gestir koma með sinn eigin drykk.