Sigur Stólastúlkna eftir sveiflu í Síkinu
Enn flæktist þriðji leikhlutinn fyrir Stólastúlkum þegar þær tóku á móti liði Snæfells í 1. deild kvenna nú á laugardaginn. Sem betur fer spilaði liðið nógu vel í hinum þremur leikhlutunum og náðu að stöðva Sianni Amari Martin á síðustu mínútum leiksins en hún gerði aðeins 51 stig í leiknum fyrir gestina og virtist ætla að stela stigunum fyrir Stykiishólmsliðið. Síðustu mínútur leiksins náðu heimastúlkur að snúa leiknum sér í hag og sigruðu 87-77 og það ekki síst fyrir geggjaðan leik hjá Maddie okkar Sutton sem gerði 33 stig og tók 32 fráköst! Hvaða rugl er það?
Lið Tindastóls náði yfirhöndinni strax í byrjun og komst í 8-0 forystu og voru yfir 16-2 eftir sjö mínútna leik. Þá fór Martin að vakna til lífsins en sem betur fer fór hún illa með skotin utan 3ja stiga línunnar í leiknum, hitti einu af níu þaðan en innan teigs fór nánast allt niður hjá henni á laugardaginn. Staðan að loknum fyrsta leikhluta var 23-15 og lið Tindastóls spilaði vel í öðrum leikhluta. Maddie gerði tvær körfur í röð og kom sínum stúlkum í 31-17 og í kjölfarið fylgdu tveir þristar frá hinni 16 ára gömlu Rebekku Hólm Halldórsdóttur sem var komin í byrjunarlið Tindastóls og sannarlega efnileg. Ksenja átti síðustu körfu fyrri hálfleiks og staðan 51-31 í hálfleik.
Fyrstu fimm mínútur þriðja leikhluta gekk lítið hjá gestunum að saxa á forskot Stólastúlkna og staðan 62-44. En síðari fimm mínúturnar fór allt í baklás hjá liði Tindastóls og Sianni Martin gerði 13 stig á þeim kafla og minnkaði muninn í 66-63 með vítaskotum rétt áður en leikhlutanum lauk. Maddie gerði fyrstu tvær körfur fjórða leikhluta en gestirnir komu til baka og Rebekka Kalla Jóns jafnaði leikinn 70-70. Sianni Martin gerði síðan næstu tvær körfurnar fyrir Snæfell og kom gestunum yfir 70-74. Þá tók Jan Bezica leikhlé og tókst að setja fyrir lekann og Maddie og Eva Rún gerðu næstu ellefu stig leiksins á þriggja mínútna kafla og breyttu stöðunni í 81-74. Inga Sólveig bætti við fjórum stigum og Ksanja tveimur á meðan Sianni klóraði í bakkann með þremur stigum fyrir Snæfell. Það dugði skammt og sætur sigur Stólastúlkna staðreynd gegn þessu fyrrum úrvalsdeildarstórveldi þeirra í Stykkishólmi.
Maddie átti enn einn stórleikinn fyrir lið Tindastóls og var eins og fyrr segir með 33 stig, 32 fráköst og sex stoðsendingar en eini ljóðurinn á leik hennar var að hún tapaði tíu boltum. En hver kvartar yfir 51 framlagspunkti? Eva Rún gerði 20 stig, tók fjögur fráköst og stal fimm boltum, Ksenja var með tólf stig og átti sex stoðsendingar, Rebekka gerði níu stig og Inga Sólveig var með átta stig og ellefu fráköst. Í liði Snæfells var Sianni Martin með 51 stig, fimm fráköst, þrjá stolna bolta en enga stoðsendingu. Rebekka Karlsdóttir var með tíu stig og Preslava Koleva níu stig og átta fráköst.
Smá hlé verður nú á keppni í 1. deild kvenna en lið Tindastóls spilar næsta leik sinn í Garðabæ gegn Stjörnunni 6. nóvember. Lið Tindastóls er í fimmta sæti með fjögur stig að loknum fjórum umferðum en fimm lið eru með fjögur stig. Ellefu lið taka þátt í 1. deild kvenna í vetur.
Fleiri fréttir
-
Valið vekur furðu vestan Þverárfjalls
feykir.is Skagafjörður, Austur-Húnavatnssýsla, Vestur-Húnavatnssýsla 26.04.2024 kl. 11.20Heimasíða RÚV flytur fréttir en þar mátti í morgun sjá athyglisverða og skemmtilega úttekt á fótboltavöllum landsins. Þar eru nefndir til sögunnar fótboltavellirnir á Sauðárkróki og á Hofsósi þó svo að þeir ágætu vellir hafi ekki komist í hóp tíu flottustu valla landsins. Blönduósvöllur og Sjávarborgarvöllur á Hvammstanga voru ekki nefndir á nafn í úttektinni og því leitaði Feykir viðbragða hjá Aðdáendasíðu Kormáks og þar stóð ekki á svörum en umsjónarmaður furðar sig á valinu.Meira -
Atli Þór fullkomnar hóp Kormáks/Hvatar
feykir.is Austur-Húnavatnssýsla, Íþróttir, Vestur-Húnavatnssýsla 26.04.2024 kl. 09.44Síðasti dagur félagaskipta í efri deildum Íslandsmótanna í knattspyrnu var nú á miðvikudaginn. Þá bætti lið Kormáks/Hvatar við sig einum leikmanni því Atli Þór Sindrason var síðasta liðsstyrking hópsins fyrir mót.Meira -
Sæluvikan að bresta á
feykir.is Skagafjörður, Listir og menning 26.04.2024 kl. 08.34„Skipulagning Sæluviku gengur vel og viðburðir eru enn að bætast við,“ segir Heba Guðmundsdóttir sem hefur veg og vanda af skipulagningu Sæluvikunnar líkt og undanfarin ár og má því mögulega kalla verkefnastjóra Sæluvikunnar. „Það verða flestir fastir liðir á sínum stað á Sæluviku og mér finnst alltaf vera metnaður og spenna fyrir því að vera með hjá þeim sem skapað hafa þá hefð að standa fyrir viðburði á Sæluviku.“Meira -
Vinnustofa um gerð loftlagsstefnu sveitarfélaga
feykir.is Austur-Húnavatnssýsla, Vestur-Húnavatnssýsla 26.04.2024 kl. 08.32SSNV stóð fyrir vinnustofu í félagsheimilinu á Hvammstanga nú í vikunni um gerð loftlagsstefnu sveitarfélaga í samtarfi við KPMG. Vinnustofan var sérstaklega fyrir Húnavatnssýslur. Góð þátttaka var á vinnustofunni og áhugaverðar umræður sköpuðust.Meira -
Áfram Hvöt er nýtt stuðningsmannalag þeirra hvítu og rauðu
feykir.is Austur-Húnavatnssýsla, Listir og menning 26.04.2024 kl. 07.47„Ungmennafélaginu Hvöt hefur lengi vantað gott stuðningsmannalag en þónokkur ár eru síðan Ekki vera löt, allir í Hvöt kom út. Þegar ég hafði samband við Einar Örn og Baldur síðsumars 2023 stóð ekki á svörum. Úr varð þessi frábæri hittari sem mun án efa fá góðar viðtökur hjá félagsmönnum Hvatar, íbúum Húnabyggðar og bara öllum öðrum. Áfram Hvöt!” segir Grímur Rúnar Lárusson, formaður Ungmennafélagsins Hvatar, í færslu á Facebook-síðu Umf. Hvatar þar sem nýtt stuðningsmannalag, Áfram Hvöt, er kynnt til sögunnar.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.