Mannlíf

Benjamín Kristinsson hefur verið ráðinn safnvörður á Byggðasafni Húnvetninga og Strandamanna að Reykjum í Hrútafirði. Starfið var auglýst laust til umsóknar í janúarmánuði og rann umsóknarfresturinn út 15. febrúar sl.

Þórdís Einarsdóttir, nemandi í 9. bekk Húnavallaskóla, hlaut önnur verðlaun í sínum aldursflokki í smásögukeppni Félags enskukennara á Íslandi. Keppnin er haldin í tengslum við Evrópska tungumáladaginn. Er þetta í annað sinn sem Þórdís vinnur til verðlauna í þessari keppni.

Æfingar eru hafnar hjá Leikfélagi Sauðárkróks á Sæluvikustykki ársins. Er það farsinn Fullkomið brúðkaup eftir Robin Hawdon sem varð fyrir valinu. Undirbúningsfundur vegna uppsetningarinnar, sem haldinn var í síðustu viku, var vel sóttur.

Guðmundur Árni Hjartarson jarðfræðingur flytur erindi í Auðunarstofu kl. 17:00 á Gvendardegi, miðvikudaginn 16. mars, sem hann nefnir: Guðmundur biskup góði og brunnar hans.

Kaffihlaðborð og basar til styrktar Dagdvöl aldraðra í Skagafirði verður í Varmahlíðarskóla sunnudaginn 13. mars frá kl. 15-17. Allur ágóði rennur til kaupa á rafmagnslyftustól eða annarskonar hvíldarstólum.

Áhugahópur um menntun og framfarir, í samstarfi við Sveitarfélagið Skagaströnd og Farskólann á Sauðárkróki, boðar til fundar um menntunarmál í Félagsheimilinu Fellsborg á Skagaströnd klukkan 17:30 miðvikudaginn 9. mars.

Ísmótið Svínavatn 2016 verður haldið laugardaginn 5. mars og hefst kl. 11. Ísinn er afbragðs góður og vel lítur út með veður og færi. Skráningar eru um 130 og fjöldi þekktra og spennandi hrossa mætir til leiks, eins og fram kemur í fréttatilkynningu um mótið.

Þriðjudaginn 1. mars 2016 komu félagar í Veðurklúbbnum á Dalbæ saman til fundar. Fundurinn hófst kl. 13:55. Fundarmenn voru 13 talsins. Fundinum lauk kl. 14:20.

Árshátíð yngri nemenda í Varmahlíðarskóla verður haldin í Miðgarði, föstudaginn 4. mars kl. 15:00. Nemendur 1.-6. bekkjar sýna leikritið Hróa Hött eftir handriti Guðjóns Sigvaldasonar. Leikstjóri er Helga Rós Sigfúsdóttir og Stefán R. Gíslason sér um undirleik.

Miðvikudaginn 16. mars nk. kl. 11.00 mun Jessica Aquino nýráðinn starfsmaður Ferðamáladeildar Háskólans á Hólum og Selaseturs Íslands halda fyrirlestur í fyrirlestraröðinni Vísindi og graut, sem hún nefnir „Volunteer Tourists’ Perceptions of their Impacts in Vulnerable Communities.“ Fyrirlesturinn verður haldinn í stofu 302 og eru allir hjartanlega velkomnir.